ސައިކަލެއްގެ މަޑިދަށުން ގިނަ އަދަދެއްގެ ރުފިޔާ ވަގަށް ނެގި މައްސަލައިގެ ތުހުމަތުގައި ހައްޔަރުކުރި ބިދޭސީ މީހާ، އޭނާ އެ ފައިސާ ނެގި ކަމަށް އިންކާރު ކޮށްފިއެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝްގެ އުމުރުން 45 އަހަރުގެ ފިރިހެނެއް ކަމަށްވާ ޖަހަންގިރު އާލަމެވެ.
ކްރިމިނަލް ކޯޓުން ވަނީ މި މައްސަލައިގައި އޭނާ އިތުރު ފަސް ދުވަހަށް ބަންދު ކުރުމަށް މިއަދު އަމުރުކޮށްފައެވެ. ކޯޓު އަމުރުގައި ޖަހަންގިރާ ހަވާލާދީ ބުނެފައިވަނީ ފައިސާ ވަގަށް ނެގި ކަމަށްބުނެ، ވިޔަފާރީގެ މައްސަލައެއްގައި އޭނާ ފްރޭމްކޮށްފައިވާ ކަމަށެވެ.
ކޯޓު އަމުރުގައި ބުނަނީ ހުށަހެޅުނު ސީސީޓީވީ ވީޑިއޯއިން އޭނާ ސައިކަލެއްގެ މަޑިދަށް ފޭކޮށްގެން އެއްޗެއް ނަގާތަން ފެންނަ ކަމަށެވެ. އެހެން ނަމަވެސް އޭނާ ބުނާ ގޮތުގައި އެއީ ފައިސާއެއް ނޫން ކަމަށް ކޯޓު އަމުރުގައިވެއެވެ.
އޭނާ ބަންދުގައި ބަހައްޓަންޖެހޭ ސަބަބެއް ކަމަށް ކޯޓުން ފާހަގަކޮށްފައިވަނީ، އޭނާއަކީ ހެއްކަށް ނުފޫޒު ފޯރުވިދާނެ މީހަކަށް ވާތީ ކަމަށެވެ. އެ ގޮތުން ހެކިބަސް ދޭން ތިބި ފާރާތްތަކަކީ އޭނާއާ ގާތް، އަދި ނުފޫޒު ފޯރުވޭ ފަދަ މާހައުލެއްގައި ތިބި ބައެއް ކަމަން ފާހަގަކޮށްފައި ވެއެވެ.
މި މައްސަލައިގައި ފުލުހުން ބުނެފައިވަނީ އޭނާ ވަގަށް ނަގާފައިވާ ފައިސާ ގެޔަކަށް ވައްދާ ކަމަށެވެ.
ކޯޓު އަމުރުގައިވާ ގޮތުން، މި މައްސަލައިގައި ޖަހަންގިރާއި ސުވާލު ވެސް ކޮށްފައި ނުވާ ކަމަށާއި، އަދި މައްސަލައިގެ ތަހުގީގު ވެސް ލަސް ކަމަށް އޭނާގެ ވަކީލު ފާހަގަކޮށްފައިވެއެވެ.
ޖަހަންގިރަކީ ރާއްޖޭގެ ދެ މީހުންނާ ކައިވެނިކޮށް، އޭގެ ތެރެއިން އެކަކަށް ތިން ދަރީން ލިބިފައިވާ މީހެކެވެ. އަދި އޭނާ ރާއްޖޭގައި ދިރިއުޅެނީ ގަވާއިދާ އެއްގޮތަށްކަން ކޯޓު އަމުރުގައިވަނީ ފާހަގަ ކޮށްފައެެވެ.