ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެ ވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގަތުމަށް، ނިއުޔޯކުން ފުރާވަޑައިގެންފިއެވެ.
މި ދަތުރުފުޅުގައި ރައީސް މުޢިއްޒު ވަނީ އދ މަޖިލީހުގެ 79 ވަނަ ދައުރުގެ އާންމު ބަހުސްގައި ވާހަކަފުޅު ދައްކަވާފައެވެ. އަދި އެ މަނިކުފާނު ވަނީ ސެކިއުރިޓީ ކައުންސިލުގައި ވެސް ވާހަކަފުޅު ދައްކަވާފައެވެ.
ރާއްޖެ އދގެ މެންބަރަކަށްވީތާ 59 އަހަރު ވެފައިވާއިރު ދިވެހި ރައީސަކު ސެކިއުރިޓީ ކައުންސިލްގައި ވާހަކަފުޅު ދެއްކެވި މިއީ ފުރަތަމަ ފަހަރެވެ. އޭގެއިތުރުން ރައީސް ވަނީ އެކި ބަޔާންތައް އިއްވަވާ، އެތައް ސައިޑްލައިން އިވެންޓްތަކެއްގެ ރިޔާސަތު ވެސް ބަލަހައްޓަވާފައެވެ.
މި އިވެންޓްތަކުގައި މޫސުމަށް އަންނަ ބަދަލުތަކާއި، އިއާދަކުރަނިވި ހަކަތައާއި، އިޖްތިމާއީ އަދި އިގްތިސާދީ ގޮންޖެހުންތަކާއި، ޑިޖިޓަލައިޒޭޝަން ފަދަ މުހިންމު މައްސަލަތަކަށް އެމަނިކުފާނު ވަނީ އަލިއަޅުއްވާ ލައްވާފައެވެ.
އަދި ރައީސް ވަނީ އދ މަޖިލީހުގެ 79 ވަނަ ދައުރަށް ވަޑައިގެންނެވި އެކި ޤައުމުތަކުގެ ވަފުދުތަކުގެ އިސްވެރިންނާ ބައްދަލުކުރައްވާ، ގިނަ ބޭފުޅުންތަކަކާއެކު ބައްދަލުވުންތައް ބާއްވަވާފައެވެ.
މީގެ ތެރޭގައި އދގެ ސެކްރެޓަރީ ޖެނެރަލް އަންޓޯނިއޯ ގުޓެރެސްއާ އެމަނިކުފާނު ބައްދަލުކުރައްވާފައި ވާއިރު ނިއުޔޯކުގައި ދިރިއުޅުއްވާ ދިވެހި ރައްޔިތުންނާ ވެސް އެމަނިކުފާނު ވަނީ ބައްދަލުކުރައްވާފައެވެ.
މީގެއިތުރުން، ރައީސް ޑރ. މުޢިއްޒު ވަނީ ޕްރިންސްޓަން ޔުނިވާސިޓީގެ "ޑީންސް ލީޑާޝިޕް ސީރީޒް" ގެ ދަށުން ޕްރިންސްޓަން ސްކޫލް އޮފް ޕަބްލިކް އެންޑް އިންޓާނޭޝަނަލް އެފެއާޒްގައި ވާހަކަފުޅު ދައްކަވާފައެވެ. އަދި ނިއުޔޯކުގައި ހުންނަ ގޫގުލް އޮފީހަށް ޒިޔާރަތްކުރައްވާ އެމަނިކުފާނު ވަނީ އެ އޮފީސް ބައްލަވާލައްވާފައެވެ.