އަހަރުތަކެއް ފަހުން ބޮލީވުޑްގެ މަޝްހޫރު ދެމަފިރިން ކަމަށްވާ ސައިފާއި ކަރީނާ އެކީގައި ފިލްމަކަށް ސޮއިކުރަން ނިންމާފައިވާ ކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ގެނެސްދޭ ބައެއް ނޫސްތަކުން ބުނެފައިވާ ގޮތުން ދެ ތަރިން އެކީގައި ކުޅެން ނިންމާފައި ވަނީ މިދިޔަ އަހަރު ރިލީޒްކޮށް ބޮޑު ކާމިޔާބީއެއް ހޯދި ފިލްމު "އެނިމަލް"ގެ ޑައިރެކްޓަރު ސަންދީޕް ރެޑީ ވަންގާގެ ފިލްމަކަށެވެ.
މި ފިލްމަކީ 2021ގައި ސަންދީޕު އިއުލާނުކުރި ފިލްމު "ސްޕިރިޓް"އެވެ. ފިލްމު އިއުލާނު ކުރުމަށްފަހު ސަންދީޕި ބުނެފައި ވަނީ މި ފިލްމުގެ ލީޑް ރޯލްއިން ފެންނާނީ ސައުތު ސިނަމާގެ މަގުބޫލު އެކްޓަރު ޕްރަބާސް ކަމަށެވެ. ޓީ-ސީރީސްއާ ގުޅިގެން ސަންދީޕު އުފައްދާ މި ފިލްމުގައ ޕްރަބާސް ކުޅޭނީ ފުލުހެއްގެ ރޯލެވެ.
ސައިފް އާއި ކަރީނާ އެކީގައި ކުޅުނު ފިލްމު "ގުރުބާން"ގެ މަންޒަރެއް--ފޮޓޯ/އިންޑިއާޓުޑޭ
ބޮލީވުޑްގެ އެންމެ ގިނަ ބައެއްގެ ސަމާލުކަން ލިބޭ ދެމަފިރިން ކަމަށްވާ ސައިފާއި ކަރީނާ އެކީގައި ފިލްމުން ފެންނާނެ ކަމުގެ އިޝާރާތެއް މީގެކުރިން ސަންދީޕް ކޮށްފައިވާއިރު ފަހުގެ ރިޕޯޓުތައް ބުނާގޮތުން ދެ ތަރިން ފިލްމުގައި ފެންނާނީ ވަރަށް ވަރުގަދަ ވިލެންގެ ރޯލްތަކަކުންނެވެ. ނަމަވެސް ސަންދީޕުގެ ފަރާތުން މިކަން މިހާތަނަށް ކަށަވަރުކޮށްދީފައެއް ނުވެއެވެ.
ސައިފް އާއި ކަރީނާ އެންމެ ފުރަތަމަ އެކީގައި މަސައްކަތްކޮށްފައި ވަނީ ފިލްމު "އޮމްކާރާ"ގައެވެ. ދެ ތަރިންގެ ލޯބީގެ ގުޅުން ފެށުނު ފިލްމު "ތަޝަން"އަށް ފަހު އެންމެ ފަހުން އެކީގައި ކުޅުނު ފިލްމަކީ 2012ވަނަ އަހަރު ރިލީޒްވި ފިލްމު "އެޖެންޓް ވިނޯދް"އެވެ.
ސައިފްއާ އެކު ފިލްމެއްގައި މަސައްކަތް ކޮށްލުމަށް ވަރަށް ބޮޑަށް ޝައުގުވެރިވާ ކަމަށް ކަރީނާ ވަނީ ދާދިފަހުން މީޑިއާއަށް ދިން އިންޓަވިއުއެއްގައި ވެސް ބުނެފައެވެ.