ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިއުޔޯޚުގައި ހުންނަ ގޫގްލް އޮފީހަށް ޒިޔާރަތް ކުރައްވައި، އެ އޮފީހުގެ އިސްވެރީންނާ މަޝްވަރާ ކުރައްވައިފިއެވެ.
އެ އޮފީހަށް ރައީސް ކުރެއްވި ޒިޔާރަތުގައި، އެ މަނިކުފާނަށް މަރުހަބާ ދެންނެވީ ގޫގްލްގެ ޕަބްލިކް ސެކްޓާ ސީއީއޯ ކަރެން ދަހުތުއެވެ.
ރައީސް އޮފީހުން އެކްސްގައި ކުރި ޕޯސްޓެއްގައި ވަނީ، އެ ބައްދަލުކުރެއްވުމުގައި ޕަބްލިކް ސާވިސް ޑެލިވަރީގެ ތެރެއަށް އާޓިފިޝަލް އިންޓެލިޖެންސް ތައާރަފުކުރުމާ ގުޅޭ ގޮތުން މަޝްވަރާކުރެއްވި ކަމަށެވެ.
އަދި ޑިޖިޓަލް ލިޓަރެސީ ޕްރޮމޯޓު ކުރުމުގެ އިތުރުން، މޫސުމަށް އަންނަ ބަދަލުތަކަށް ޑޭޓާ ޑްރައިވް ސޮލިއުޝަންތަކާ ގުޅޭ ގޮތުން އެއްބާރުލުން ދީގެން މަސައްކަތް ކުރުމަށް މަޝްވަރާ ކުރައްވާފައިވާ ކަމަށް އެ އޮފީހުން ބުންޏެވެ.
ރައީސް މުޢިއްޒު ގޫގްލް އޮފީހަށް ޒިޔާރަތް ކުރައްވައި، އެ އޮފީހުގެ އިސްވެރިންނާ އެކު ވަނީ މަޝްވަރާ ކުރައްވާފައި -- ފޮޓޯ/ ރައީސް އޮފީސް
ރައީސް މުޢިއްޒު އދ.ގެ 79ވަނަ އާންމު ޖަލްސާގައި ބައިވެރިވެ ވަޑައިގަތުމަށް ކުރައްވަމުން ގެންދަވާ ދަތުރުފުޅުގެ ތެރެއިން އެ މަނިކުފާނު ދަނީ ގައުމުތަކުގެ އިސްވެރިންނާ ބައްދަލު ކުރައްވައި، މުހިންމު ދާއިރާތަކުން އެއްބާރުލުމާއި އެހީތެރިކަން އިތުރު ކުރެއްވުމަށް މަޝްވަރާތައް ކުރައްވަމުންނެވެ.
އެ ގޮތުން އެމެރިކާގެ ޔުނައިޓެޑް ސްޓޭޓްސް އެޖެންސީ ފޯ އިންޓަނޭޝަނަލް ޑިވެލޮޕްމަންޓް (ޔޫއެސްއެއިޑް)އިން ރާއްޖެއަށް 4.4 މިލިއަން ޑޮލަރު ދޭން ވަނީ ނިންމައިފައެވެ. އެކަން އިއުލާނުކުރީ، އދ.ގެ އާންމު މަޖިލީހުގެ ހަވާސާގައި ޔޫއެސްއެއިޑްގެ "ޑިމޮކްރަސީ ޑެލިވާސް" އިވެންޓުގައި ޔޫއެސްއެއިޑުގެ އެޑްމިނިސްޓްރޭޓާ ސަމައިންތާ ޕަވާއެވެ.
މިއީ ރައީސް އދ.ގެ އާންމު މަޖިލީހުގައި ބައިވެރިވަޑައިގަންނަވާ ފުރަތަމަ ފަހަރެވެ. އެމަނިކުފާނުގެ މި ދަތުރުފުޅު ދިމާވަނީ ރާއްޖެ އދ.ގެ މެންބަރު ގައުމަކަށް ވީތާ 59 އަހަރު ފުރޭ މުނާސަބަތާ ވެސް މެއެވެ.
ރައީސް އޮފީހުން ބުނީ އެ ދަތުރުފުޅު ނިންމަވާލެއްވުމަށްފަހު ރައީސް އެނބުރިވަޑައިގަންނަވާނީ ސެޕްޓެމްބަރު މަހުގެ 29ވާ އާދީއްތަ ދުވަހު ކަމަށެވެ.