ގޫގުލްގެ މައި ކުންފުނި އަލްފަބެޓްގެ ތިންވަނަ ކުއާޓަރުގެ އާމްދަނީ ދަށްވެދާނެކަމަށް މާލީ ތަޙްލީލުކުރާ ފަރާތްތަކުން ލަފާކޮށްފިއެވެ. މިގޮތުން އަންނަ އަންގާރަ ދުވަހު އިއުލާނުކުރާނެ ނަތީޖާގައި ފާއިތުވި ހަތަރު ކުއާޓަރުގެ ތެރެއިން އެންމެ ދަށް ކުރިއެރުން ފެނިގެންދާނެކަމަށް ޓެކް ރިޕޯޓްތައް ބުނެއެވެ.
މިދަށްވުމުގެ މައިގަނޑު ސަބަބެއްކަމަށް ބެލެވެނީ ގޫގުލް ސާޗް އަދި ޔޫޓިއުބްގެ އިޝްތިހާރު ވިޔަފާރިއަށް ކުރިމަތިވެފައިވާ ވާދަވެރިކަމެވެ. އެމެޒޯން އަދި ޓިކްޓޮކް ފަދަ ޕްލެޓްފޯމްތަކުން އިޝްތިހާރުދޭ ފަރާތްތަކަށް ލިބޭ ފުރުސަތުތައް އިތުރުވުމާ ގުޅިގެން ގޫގުލްގެ އިޝްތިހާރު ވިޔަފާރިއަށް ނޭދެވޭ އަސަރުކޮށްފައިވާކަމަށް ރިޕޯޓްތައް ބުނެއެވެ.
އަލްފަބެޓްގެ ކްލައުޑް ކޮމްޕިއުޓިން ވިޔަފާރި އާޓިފިޝަލް އިންޓެލިޖެންސްގެ ސަބަބުން ކުރިއަރަމުންދިޔަ ނަމަވެސް، މައި ވިޔަފާރީގެ ދަށްވުން އޭގެ އަސަރު ކުޑަކުރާނެކަމަށް ބެލެވެއެވެ. މީގެ އިތުރުން ޕަޕްލެކްސިޓީ އަދި ޗެޓްޖީޕީޓީ ފަދަ އައު ޓެކްނޮލޮޖީތަކުގެ ސަބަބުން ގޫގުލްގެ ސާޗް އިންޖިންގެ މަޤްބޫލުކަން ދަށްވެދާނެކަމުގެ ބިރު އޮތްކަމަށް ވެސް ރިޕޯޓްތައް ބުނެއެވެ.
އީމާކެޓާ އިން ފާހަގަކޮށްފައިވާ ގޮތުގައި އަންނަ އަހަރު ގޫގުލްގެ ސާޗް އިޝްތިހާރުގެ މާކެޓް ޝެއާ 50 ޕަސަންޓުން ދަށަށް ދާނެކަމަށް ލަފާކުރެވެއެވެ. މިއީ ފާއިތުވި 18 އަހަރުގެ ތެރޭގައި ފުރަތަމަ ފަހަރަށް މިކަން ދިމާވާނެކަމަށް ބެލެވޭއިރު، އެމެޒޯންގެ ސާޗް އިޝްތިހާރުގެ މާކެޓް ޝެއާ 24 ޕަސަންޓަށް އަރާނެކަމަށް ލަފާކުރެވެއެވެ.
އަލްފަބެޓްގެ ޖުމްލަ އާމްދަނީ މި ކުއާޓަރުގައި 12.6 ޕަސަންޓު އިތުރުވެ 86.31 ބިލިއަން ޑޮލަރަށް އަރާނެކަމަށް ލަފާކުރެވެއެވެ. ނަމަވެސް މިއީ ދެވަނަ ކުއާޓަރގެ 13.6 އިންސައްތައިގެ ކުރިއެރުމަށްވުރެ ދަށް އަދަދެކެވެ.
ކުންފުނީގެ ހިއްސާގެ އަގު ތިންވަނަ ކުއާޓާގައި ނުވަ ޕަސަންޓު ދަށްވެފައިވާއިރު، މިއީ 2022ވަނަ އަހަރުގެ ތިންވަނަ ކުއާޓަރުން ފެށިގެން އެންމެ ބޮޑު ދަށްވުމެވެ. ނަމަވެސް މުޅި އަހަރަށް ބަލާއިރު ހިއްސާގެ އަގު 17 ޕަސަންޓު މަތިވެފައިވެއެވެ.