ދުނިޔޭގެ ފަތުރުވެރިކަމުގެ ދުވަހާ ގުޅުވައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ން މުޅި ދުނިޔެއަށް ހުޅުވާލައިގެން "މޯލްޑިވްސް މޯމެންޓްސް 2024"ގެ ނަމުގައި މުބާރާތެއް ފަށައިފިއެވެ.
މި މުބާރާތަކީ މިއަދުން ފެށިގެން އަންނަ އޮކްޓޫބަރު މަހުގެ 12 ވަނަ ދުވަހުގެ ނިޔަލަށް ކުރިއަށްދާ މުބާރާތެކެވެ.
އެމްއެމްޕީއާރްސީން ބުނި ގޮތުގައި މި މުބާރާތުގެ އަމާޒަކީ ބައިވެރިންގެ ހުނަރު ދައްކާލުމުގެ އިތުރުން ރާއްޖޭގެ ހިތްގައިމު ރީތިކަމާއި މުއްސަނދި ސަގާފަތާއި ރާއްޖެއިން ފަތުރުވެރިންނަށް ލިބެން ހުރި ތަފާތު ތަޖުރިބާތައް މުޅި ދުނިޔެއަށް ދައްކާލުމެވެ.
އެގޮތުން, މި މުބާރާތުގައި ރާއްޖޭގެ އެންމެ ހިތްގައިމު ފޮޓޯތައް ނުވަތަ ވީޑިއޯތައް ޝެއާ ކުރެވޭނެއެވެ. އެ ފޮޓޯތަކާއި ވީޑިއޯތައް ޝެއާކުރާއިރު "މޯލްޑިވްސްމޯމެންޓްސް2024" ހޭޝްޓެގް ބޭނުންކޮށްގެން ފޭސްބުކް، އިންސްޓަގްރާމް، ޓިކްޓޮކް، އެކްސް ނުވަތަ ލިންކްޑްއިންގައި ކުރު ތަފްސީލަކާ އެކު ހިއްސާކުރަން ޖެހެއެވެ.
އެމްއެމްޕީއާރްސީން ބުނީ, އެއީ ރާއްޖޭގެ އިރުއޮއްސޭ ހިތްގައިމު މަންޒަރެއް ކަމުގައި ވިޔަސް، ކަނޑުއަޑީގެ ތަޖުރިބާއަކަށް ވިޔަސް، ނޫނީ ސަގާފީ ތަޖުރިބާއެއް ވިޔަސް އެ މުބާރާތުގައި ބައިވެރިވާ ބައިވެރިންނަށް ރާއްޖޭގެ ހިތްގައިމުކަން ދެއްކުމަށް ހިތްވަރުދޭން ކަމަށެވެ.
އެ މުބާރާތަކީ 18 އަހަރު ފުރިފައިވާ ބައިނަލްއަގުވާމީ އަދި ދިވެހީން ހިމެނޭ ގޮތަށް އާންމުންނަށް ހުޅުވާލައިގެން ބާއްވާ މުބާރާތެކެވެ. އެގޮތުން, ކޮންމެ ބައިވެރިއަކަށް ވެސް އޮރިޖިނަލް ތިން އެންޓްރީއެއް ހުށަހެޅޭނެއެވެ.
އެގޮތުން, ފޮޓޯތައް ހުށަހަޅަން ޖެހޭނީ 1:1 ރޭޝިއޯއެއްގައެވެ. ވީޑިއޯތައް ހުންނަން ޖެހޭނީ ދިގުމިނުގައި 60 ސިކުންތައް ވުރެ ދިގު ނޫން 16:9 ޕޯޓްރެއިޓް ފޯމެޓެއްގައެވެ.
އެމްއެމްޕީއާރްސީން ބުނީ, މި މުބާރާތަށް އޭއައިއިން އުފައްދާ ކޮންޓެންޓް ބަލައިނުގަނެވޭނެ ކަަމަށެވެ.
މި މުބާރާތުން އެއްވަނައަށް ދާ ފަރާތަށް ހަތަރު ރޭގެ ޚާއްސަ ޗުއްޓީއެއް ރެޑިސަން ބްލޫ ރިސޯޓް މޯލްޑިވްސްއިން ލިބޭނެއެވެ. އަދި, އެއްވަނައަށް ދާ ފަރާތުގެ ހުށަހެޅުން ވިޒިޓް މޯލްޑިވްސްގެ ސޯޝަލް މީޑިއާ ޗެނަލްތަކާއި އެހެނިހެން ޕްރޮމޯޝަނަލް ހަރަކާތްތަކުން ފެންނާނެއެވެ.
މުބާރާތުގެ ފަނޑިޔާރުކަން ކުރުމުގެ ކްރައިޓީރިއާގައި ބަލާނީ އެސްތެޓިކް ކޮލިޓީއާއި ތީމް ރެޕްރެސެންޓޭޝަންގެ އިތުރުން އެހެނިހެން ތަފާތު ކަންކަމަށް ކަމަށް ވެސް ބުންޏެވެ.