ފަލަސްތީނުގެ ޣައްޒާއާ ދެކޮޅަށް އިސްރާއީލުން ކުރަމުންދާ ހަނގުރާމާއަށް އެމެރިކާއިން ތާއީދުކުރަމުންދާތީ، އެކަން ފަލަސްތީނުގެ ރައީސް މަހްމޫދު އައްބާސް ވަރަށް ބޮޑަށް ކުށްވެރިކުރައްވައިފިއެވެ.
އައްބާސް އެގޮތަށް ވިދާޅުވީ, މިހާރު ކުރިއަށްދާ 79 ވަނަ އދ ގެ އާންމު މަޖިލީހުގައި ތަގުރީރުކުރައްވަމުންނެވެ.
"މިކަން ހުއްޓުވަންޖެހޭ. އަޅުގަނޑުމެންގެ ރައްޔިތުންނަށް ދިމާވާ ކަންކަމުގެ ޒިންމާ މުޅި ދުނިޔެއިން ނަގަންޖެހޭ،" އައްބާސް ވިދާޅުވިއެވެ.
އިސްރާއީލަށް ހަތިޔާރު ފޯރުކޮށްދިނުން ހުއްޓާލުމަށް ބައިނަލްއަގުވާމީ މުޖުތަމައު އައްބާސް ވަނީ އިލްތިމާސްކުރައްވާފައެވެ.
އެމެރިކާއަށް އިޝާރާތް ކުރައްވާ އައްބާސް ވިދާޅުވީ، އޮކްޓޯބަރު މަހުން ފެށިގެން އިސްރާއީލުގެ ހަމަލާތަކުގައި މަދުވެގެން 41،534 މީހުން ޝަހީދުކޮށްލައިފައިވާއިރު ހަނގުރާމަކުރަން ހަތިޔާރު ދިނުމާއި ޚާރިޖީ ގޮތުން އިސްރާއީލަށް ހިމާޔަތް ދިނުން އަދިވެސް ކުރިއަށްގެންދާ ކަމަށެވެ.
އައްބާސް ވަނީ ޣައްޒާގައި ހަނގުރާމަ ހުއްޓާލުމަށް ގޮވާލާ ސަލާމަތީ މަޖިލީހުގެ ގަރާރުތައް ތަކުރާރުކޮށް ވީޓޯކޮށްގެން އިސްރާއީލުގެ ހަމަލާ ކުރިއަށް ގެންދިއުމަށް އެމެރިކާއިން ހުއްދަ ދީފައިވާ ކަމަށް ވެސް ތުހުމަތުކުރައްވާފައެވެ.
އެމެރިކާއަކީ އިސްރާއީލުގެ މުހިންމު އެކުވެރިއެކެވެ. އެ ގައުމުން އަހަރަކު އެތައް ބިލިއަން ޑޮލަރެއްގެ އަސްކަރީ އެހީ އިސްރާއީލަށް ފޯރުކޮށްދެއެވެ.
ހަނގުރާމަ ނިމުމުން ޣައްޒާއިން އިސްރާއީލު ސިފައިން ފައިބައި ފަލަސްތީނު އޮތޯރިޓީން ހިންގާ އިސްރާއީލުން ހިފާފައިވާ ހުޅަނގު އައްސޭރީގެ ބައެއް ހިސާބުތަކުގައި ފަލަސްތީނުގެ ދައުލަތެއް ގާއިމުކުރުމަށް އައްބާސް ވަނީ ހުށަހަޅުއްވައިފައެވެ.