އެމެރިކާގެ އެންމެ ބޮޑު އެއް ޓެކްނޮލޮޖީ ކުންފުނި މައިކްރޯސޮފްޓުން, ބްރެޒިލްގައި 2.7 ބިލިއަން ޑޮލަރު (14.7 ބިލިއަން ބްރެޒިލިއަން ރެއައިސް) އިންވެސްޓްކުރާނެ ކަމަށް އިއްޔެ އިއުލާނުކޮށްފިއެވެ.
މި އިންވެސްޓްމަންޓުގެ މައިގަނޑު މަގުސަދަކީ ބްރެޒިލްގެ ކްލައުޑް އިންފްރާސްޓްރަކްޗާ އަދި އާޓިފިޝަލް އިންޓެލިޖެންސް (އޭއައި) ދާއިރާ ކުރިއެރުވުމެވެ.
މި ވަގުތު ބްރެޒިލްގެ އިޤުތިޞާދީ ދުވެލި ލަސްވެފައިވާ ދަނޑިވަޅެއްގައި މިފަދަ ބޮޑު އިންވެސްޓްމަންޓެއް އެ ގައުމަށް ލިބުމަކީ މުހިންމު ކަމެއްކަމަށް ރިޕޯޓްތައް ބުނެއެވެ.
މައިކްރޯސޮފްޓުން ބުނާ ގޮތުގައި އޭއައި ފުޅާ ދާއިރާއެއްގައި ބޭނުންކުރަން ފެށުމުން، މި 10 ވަރަކަށް އަހަރު ދުވަހުގެ ނިޔަލަށް ބްރެޒިލްގެ އިޤުތިޞާދީ ދުވެއްޔަށް 4.2 ޕަސެންޓޭޖް ޕޮއިންޓުގެ ކުރިއެރުމެއް ލިބޭނެއެވެ.
"އަޅުގަނޑުމެން ބްރެޒިލްގެ އޭއައި ބަދަލުކުރުމަށް އެހީތެރިވުމަށް އަދި އެ ބަދަލުވުމުގެ މަންފާ އެންމެންނަށް ލިބޭކަން ކަށަވަރުކުރުމަށް ވަރަށް ބޮޑަށް އަޒުމު ކަނޑައަޅާފައިވާނެ،" މައިކްރޯސޮފްޓުގެ ސީއީއޯ ސަތްޔާ ނަޑެއްލާ ވިދާޅުވިއެވެ.
މި އިންވެސްޓްމަންޓުގެ ދަށުން މައިކްރޯސޮފްޓުން ސާއޯ ޕައުލޯ ސްޓޭޓުގައި ހުރި ޑޭޓާ ސެންޓަރުތަކުގައި ކްލައުޑް އަދި އޭއައި އިންފްރާސްޓްރަކްޗާ ފުޅާކުރާނެއެވެ. އަދި، ކުރިއަށް އޮތް ތިން އަހަރުގެ ތެރޭގައި ފަސް މިލިއަން މީހުންނަށް އޭއައި ތަމުރީނު ދިނުމުގެ މަސައްކަތް ވެސް ކުރިއަށްގެންދާނެއެވެ.
މި އިންވެސްޓްމަންޓަކީ 2020 ގައި އިއުލާނުކުރި "މައިކްރޯސޮފްޓް މައިސް ބްރެޒިލް" ޕްރޮގްރާމުގެ ދަށުން ކުރާ އިންވެސްޓްމަންޓެކެވެ. މި ޕްރޮގްރާމުގެ މަގުސަދަކީ މައިކްރޯސޮފްޓުން ބްރެޒިލަށް ދެމެހެއްޓެނިވި ގޮތެއްގައި އެހީތެރިވެދިނުމެވެ.