ދެހާސް ބާވީސްވަނަ އަހަރު ބްރެޒިލްގެ ރައީސް ލުއިޒް އިނާސިއޯ ލޫލާ ޑަ ސިލްވާ އަވަހާރަކޮށްލުމަށް ރޭވިކަމުގެ ތުހުމަތުގައި ކުރީގެ ރައީސް ޖައިރް ބޮލްސޮނާރޯގެ އެޑްވައިޒަރެއް ހިމެނޭ ގޮތަށް ފަސް މީހަކު އެ ގައުމުގެ ފުލުހުން ހައްޔަރުކޮށްފައިވާ ކަމަށް ކަމާބެހޭ ފަރާތްތަކުން ބުނެފިއެވެ.
ފެޑެރަލް ފުލުހުން ބުނީ، ބަޣާވާތުގެ ރޭވުން ރާވާފައިވަނީ 2022 ވަނަ އަހަރުގެ ފަހުކޮޅު، ލޫލާ ވެރިކަމާ ހަވާލުވުމުގެ ކުރިން ކަމަށެވެ. ލޫލާގެ އިތުރުން ލޫލާގެ ނައިބު ރައީސް ޖެރަލްޑޯ އަލްކްމިންއާއި ސުޕްރީމް ކޯޓުގެ ފަނޑިޔާރު އެލެގްޒެންޑާ ޑި މޮރޭސް އަތުލައިގަތުމަށް ނުވަތަ މަރާލުމަށް ރާވާފައިވާ ކަމަށް ވެސް ސުޕްރީމް ކޯޓުން ނެރުނު އަމުރުގައި ބުނެފައިވެއެވެ.
ފަނޑިޔާރު މޮރޭސް ސޮއިކުރެއްވި އެ އަމުރުގައި ރިޓަޔާޑް ޖެނެރަލް މާރިއޯ ފަރްނާންޑޭސް ހިމެނޭ ގޮތަށް ޝައްކު ކުރެވޭ ފަސް މީހުން ހައްޔަރުކުރުމުގެ ހުއްދަ ދީފައިވެއެވެ.
ކޯޓު އަމުރުގައިވާ ގޮތުން އެމީހުން މަރާލަން ރާވާފައިވަނީ ވިހައެއް ދީގެން ނުވަތަ ގޮވާތަކެތި ބޭނުންކޮށްގެންނެވެ.
"ރައީސް ލޫލާއަކީ އެ މަނިކުފާނުގެ ސިއްޚީ ހާލުކޮޅު ނާޒުކު، ގިނަގިނައިން ހޮސްޕިޓަލަށް ޒިޔާރަތްކުރައްވާ ބޭފުޅަކަށްވާތީ، ވިހަ ނުވަތަ ކެމިކަލް ބޭނުންކޮށްގެން އަވަހާރަކޮށްލުމުގެ ފުރުސަތު އެބައޮތް،"
ހައްޔަރުކުރި ފަސް މީހުންނަށް ގައުމުން ބޭރަށް ދިއުން ނުވަތަ ރޭވުމުގައި ބައިވެރިވި ކަމަށް ޝައްކުކުރެވޭ އެހެން މީހުންނާ ގުޅުން ބޭއްވުން މަނާވާނެ ކަމަށް ފުލުހުން ބުނެއެވެ.
ލޫލާ އަވަހާރަކޮށްލުމަށް މަސައްކަތްކުރެއްވި ކަމަށް ތުހުމަތުކޮށް، މި އަހަރުގެ ފެބްރުއަރީ މަހު ބޮލްސޮނާރޯގެ ތަހުގީގު ވަނީ ފަށާފައެވެ. އެ ތަހުގީގު މި މަހުގެ ފަހުކޮޅު ނިމޭނެ ކަމަށް ބެލެވޭ ކަމަށް ސީއެންއެންއިން ރިޕޯޓުކޮށްފައިވެއެވެ.
ނަމަވެސް، ބަޣާވާތެއް ކުރަން އުޅުނުކަމުގެ ތުހުމަތުތައް ބޮލްސޮނާރޯ ވަނީ ތަކުރާރުކޮށް ދޮގުކުރައްވާފައެވެ.
ދެހާސް ބާވީސްވަނަ އަހަރުގެ އޮކްޓޯބަރު މަހު ރިޔާސީ އިންތިޚާބުގައި ލޫލާ ވަނީ ބޮލްސޮނާރޯގެ މައްޗަށް ކުރި ހޯއްދަވާފައެވެ. ބޮލްސޮނާރޯގެ ސަޕޯޓަރުން ވަނީ އެ ނަތީޖާއާ ދެކޮޅު ހަދައި، ބްރެޒިލިއާގައި ހަމަނުޖެހުން ހިންގާފައެވެ.