ފެނަކަ ކޯޕަރޭޝަނުގެ އޮފީހަކުން ފައިސާތަކެއް ގެއްލިގެން އުޅޭ މައްސަލައެއް ބަލަންފަށައިފިއެވެ.
ފެނަކައިގެ މީޑިއާ އޮފިޝަލް ވަނީ "ސަން"އަށް އެކަން ކަށަވަރު ކޮށްދެއްވައިފައެވެ.
މީޑިއާ އޮފިޝަލް ވިދާޅުވީ ފައިސާތަކެއް ގެއްލިގެން އުޅެނީ އައްޑޫ ސިޓީ މަރަދޫ ފޭދޫގައި ހުންނަ ފެނަކަ އޮފީހުން ކަމަށާއި ނަމަވެސް އެއީ ބަލަމުންދާ މައްސަލައަކަށް ވުމުން އެ މައްސަލައާ ގުޅޭ އެއްވެސް އިތުރު ތަފުސީލެއް ދެވެން ނެތް ކަމަށެވެ.
ބައެއް މީޑިއާތަކުން ރިޕޯޓުކޮށްފައިވާ ގޮތުގައި، ފެނަކައިން ބަލަމުން ދަނީ އެ އޮފީހުން އެކި ފަހަރުމަތިން 400،000 އެއްހާ ރުފިޔާ ގެއްލުނު މައްސަލައެކެވެ.
ފެނަކައަކީ ދިގު މުއްދަތެއް ވަންދެން ފައިދާނުވެ، ގެއްލުމުގައި ހިންގަމުން އައި ކުންފުންޏެކެވެ. އެ ކުންފުނީގައި ކޮރަޕްޝަންގެ ބޮޑެތި އަމަލުތައް ހިންގައިފައިވާ ކަމަށް ވެސް މީގެ ކުރިން ތުހުމަތުކޮށްފައިވެއެވެ.
ފެނަކައަކީ އެސްޓީއޯގެ ސަބްސިޑަރީ ކުންފުންޏަކަށް ހަމަޖެއްސެވުމަށް ރައީސް ޑރ. މުޙައްމަދު މުއިއްޒު ވަނީ ނިންމަވައިފައެވެ.