ބޭންކް އޮފް މޯލްޑިވްސް (ބީއެމްއެލް) އިން ނަގާފައިވާ ދެ ލޯނަކަށް ފައިސާ ނުދައްކައިގެން، މާލޭގެ ދެ ގެއެއް ނީލަމުގައި ވިއްކާލުމަށް އެ ބޭންކުން އިއުލާނުކޮށްފިއެވެ.
ބީއެމްއެލްއިން ނެރުނު ދެ އިއުލާނެއްގައިވާ ގޮތުން، ވިއްކާލަން އިއުލާނުކޮށްފައި ވަނީ މ. ބީޗްކޯނާ އާއި މ. ނާއިންފާރުއާގެއެވެ.
އެގޮތުން، އެ ދެ ގެ ރަހުނުކޮށް، ނަގާފައިވާ ލޯނާ ގުޅިގެން އެ ދެ ގޭގެ ރަހުނު ވިއްލާން ސިވިލް ކޯޓު މިދިޔަ އޮގަސްޓު 22ގައި އެ ބޭންކަށް ހުއްދަ ދީފައިވާ ކަމަށް ބީއެމްއެލްއިން ބުނެފައިވެއެވެ.
ވިއްކާލަން އިއުލާންކުރި ނާއިންފާރުއާގެ އަކީ 792 އަކަފުޓޫގެ ގެއެކެވެ. ނާއިންފާރުއާގެ ގަތުމަށް އަންނަ މަހުގެ 10ގެ މެންދުރު 12:00ގެ ކުރިން ނީލަން ހުށަހެޅޭއިރު، ގަތުމަށް ނީލަން ހުށަހެޅޭ އެންމެ ދަށް އަގަކީ 13 މިލިއަން ރުފިޔާއެވެ.
މީގެއިތުރުން، ބީއެމްއެލް ނީލަމަށް ހުޅުވާލި ބީޗްކޯނާއަކީ 927.33 އަކަފޫޓުގެ ބިމެކެވެ. ބީޗްކޯނާއަށް ނީލަން ހުށަހެޅޭ އެންމެ ދަށް އަގަކީ 23.8 މިލިއަން ރުފިޔާއެވެ. އަދި، ގެ ގަތުމަށް ނީލަން ހުށަހެޅުމުގެ ސުންގަޑިއަކީ އަންނަ މަހުގެ 15 ވަނަ ދުވަހުގެ މެންދުރު 12:00އަށެވެ.
ބީއެމްއެލްއިން ބުނާ ގޮތުގައި، އެ ދެ ގެ ވިއްކާލާނީ އެންމެ ބޮޑު އަގެއް ހުށަހަޅާ ފަރާތަކަށެވެ. ކޮންމެ ދުވަހެއްގެ ނީލަމުގެ އެންމެ މަތީ އަގު އެ ބެންކުގެ ވެބްސައިޓުގައި އިއުލާނުކޮށްފައި ހުންނާނެ ކަމަށް އެ ބޭންކުން ބުނެފައިވެއެވެ.
ނީލަން ނިންމާލާނީ އެންމެ މަތީ އަގު ކަމުގައި އިއުލާނުކުރެވޭ އަގަށް ބަދަލެއް ނައިސް، ފަސް ދުވަސް ވަންދެން އޮތުމުން ކަމަށް ބީއެމްއެލްއިން ބުންޏެވެ.