މި ހަފުތާގައި އެންމެ ފާހަގަކޮށްލެވޭ ކަމަކަށް އޮތީ ރައީސް ޑރ. މުޙައްމަދު މުއިއްޒު އދ.އަށް ކުރައްވަމުން ގެންދަވާ ދަތުރުފުޅެވެ. އެ މަނިކުފާނުގެ ދަތުރުފުޅުގެ ތެރެއިން ވަނީ އދ.ގެ އާންމު މަޖިލީހުގައި ވެސް ތަގުރީރުކުރައްވާފައެވެ.
ރައީސް މުއިއްޒުގެ ތަގުރީރުގައި ފާހަގަކުރެއްވި އެންމެ މުހިންމު އެއް ކަމަކީ 2040 ވަނަ އަހަރު އަންނައިރު ރާއްޖެއަކީ ފުރިހަމައަށް ތަރައްގީވެފައިވާ ގައުމަކަށް ހެދުމެވެ. އެއީ، ނުވާނެ ކަމެއް ނޫން ކަމަށާއި ޕްލޭނެއް އޮވެގެން ކުރާނަމަ އެއީ ހާސިލުކުރެވޭނެ ލަނޑުދަނޑިއެއް ކަމަށް އެ މަނިކުފާނު ވިދާޅުވިއެވެ.
އަމާޒަކީ 2030 ވަނަ އަހަރު ރާއްޖޭގެ ޖީޑީޕީއަށް ޑިޖިޓަލް އިކޮނަމީން 15 އިންސައްތަ ހޯދުން ކަމަށް އެ މަނިކުފާނު ވިދާޅުވިއެވެ.
'ސަން އެޑިޓާސް ޓޯކް' ޕޮޑްކާސްޓްގައި މި ހަފުތާގައި އަލިއަޅުވައިލީ ވެސް މި މައުޞޫއަށެވެ.
ޕޮޑްކާސްޓް ފައްޓަވަމުން ސަންގެ މެނޭޖިން އެޑިޓަރު އަހުމަދު ސާއިލް އަލީ ވިދާޅުވީ، ދުނިޔޭގެ ތަހުޒީބު ގައުމުތަކަށް ބަލައިލި ނަމަވެސް ޑިޖިޓަލް އިކޮނަމީގެ ބޭނުން އެންމެ ރަނގަޅަށް ހިފައިގެން މަހުޖަނުންނަށްވީ މީހުން މަދެއް ނޫން ކަމަށެވެ. އެ ފަދަ ފުރުސަތުތައް ދިވެހީންނަށް ވެސް ހޯދައިދިނުން މުހިންމު ކަމަށް އޭނާ ވިދާޅުވިއެވެ.
އެގޮތުން، ޕޭޕަލް، އެމަޒަން ފަދަ ޚިދުމަތްތައް އަދި، ޔޫޓިއުބް ފަދަ ވަސީލަތްތަކުން ވެސް ފައިސާ ހޯދަން މަގުފަހިކުރުމުގެ މުހިންމުކަން އޭނާ ފާހަގަކުރެއްވިއެވެ.
އެ މައުޞޫއުގައި ސަންގެ ޕޮލިޓިކަލް އެޑިޓަރު އަހުމަދު އިނާޙް ވަނީ ދުނިޔޭގައި މިހާރު ގްލޯބަލް ޖީޑީޕީގެ 15 އިންސައްތަ ޑިޖިޓަލް އިކޮނަމީން ހިއްސާކުރާކަން ފާހަގަކުރައްވައިފައެވެ.
އެހެންވެ، ރާއްޖެއަށް ވެސް ހަލުވި ކަމާ އެކު އެ ކުރިއެރުންތަކާއި ފަސޭހަތައް އަންނައިރު، އޭއައިއާއި އެ ނޫން ވެސް ކަންކަން ރެގިއުލޭޓް ކުރެވޭނެ ގާނޫނުތައް ހުރުމުގެ މުހިންމު ކަމާއި، ޓެކްނޮލޮޖީގެ ލިޔަންކިޔަން ނުދަތުން ނައްތާލުމުގެ މުހިންމުކަން ފާހަގަކުރެެއްވިއެވެ.
ސަންގެ މަލްޓިމީޑިއާ އެޑިޓަރު މުޙައްމަދު ނާއިލް ޙަފީޒް ވަނީ ޑިޖިޓަލް އިކޮނަމީއެއް އުފެއްދުމުގެ މުހިންމުކަން ފާހަގަކުރައްވައިފައެވެ.
އެގޮތުން، އެންމެން ޝާމިލުވާ އިގުތިސާދެއް ބިނާކުރުމުގައި ޑިޖިޓަލް އިކޮނަމީއެއްގެ ދައުރު ފާހަގަކުރައްވައި ނާއިލް ވަނީ މިހާރު ވެސް ރާއްޖޭގައި ވަރަށް ގިނަ ބަޔަކު އިންޓަނެޓުގެ ބޭނުންކުރާކަން ފާހަގަކުރައްވައިފައެވެ. އެ ގޮތުން، ރާއްޖޭގެ 60 އިންސައްތައަށްވުރެ ގިނަ މީހުން މިހާރު ވެސް އިންޓަނެޓް ބޭނުންކުރާ ކަމަށް އޭނާ ވިދާޅުވިއެވެ.
މުޅި ޕޮޑްކާސްޓް އައްސަވާލައްވާށެވެ.