މި ސަރުކާރުން އަޅައިފައިވާ މާލީ އިސްލާހީ ފިޔަވަޅުތައް ފާހަގަކޮށް، ބައިނަލްއަގުވާމީ ކްރެޓިޑް ރޭޓިން އޭޖެންސީ މޫޑީސްއިން ރާއްޖެއަށް ދީފައިވާ ކްރެޑިޓް ރޭޓިން ސީއޭއޭ2ގައި މި ވަނީ ދަމަހައްޓައިފިއެވެ. އެ ގޮތަށް ނިންމާފައިވަނީ ސަރުކާރުން އަޅަމުން އަންނަ މާލީ އިސްލާހީ ފިޔަވަޅުތައް ވެސް ފާހަގަކޮށްފައެވެ.
އޭގެ ތެރޭގައި، ރިޒޯޓުތަކަށް އަންނަ ކޮންމެ ފަތުރުވެރިއަކަށް 500 ޑޮލަރު މާރުކުރުމަށް އަންގައި މަރުކަޒީ ބޭންކް، އެމްއެމްއޭއިން އަލަށް ތައާރަފުކުރި ބޭރު ފައިސާއާބެހޭ ގަވާއިދާއި ޑިޕާޗާ ޓެކުހާއި އެއާޕޯޓު ޑިވަލޮޕްމަންޓަލް ފީ ބޮޑުކުރުން މޫޑީސްއިން ފާހަގަކުރިއެވެ.
އެ ފިޔަވަޅުތަކާ އެކު، ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑުކަމަށް މޫޑީސްއިން އަންދާޒާކޮށްފައިވެއެވެ.
މީގެ އިތުރުން، ފާއިތުވި މުއްދަތުގައި ރާއްޖެއަށް ބޭރު ފައިސާގެ ފައިނޭންސިން ހޯދުމުގައި ކާމިޔާބީތަކެއް ހާސިލުވެފައިވާ ކަމަށް ވެސް މޫޑީސްއިން ބުނެފައިވެއެވެ. އެގޮތުން، މިދިޔަ ސެޕްޓެމްބަރު މަހު ރާއްޖެއާއި އިންޑިއާއާއެކު 400 މިލިއަން އެމެރިކާ ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއް ގާއިމުކޮށްފައިވުމަކީ ރާއްޖޭގެ މާލީ ހާލަތު ރަނގަޅުކުރުމަށް ކޮށްފައިވާ މުހިންމު ކަމެއްކަމަށް މޫޑީސްއިން ބުނެފައިވެއެވެ.
އެހެންނަމަވެސް ރާއްޖެއިން ދައްކަން ޖެހޭ ބޮޑު ދަރަންޏާ ގުޅޭ ގޮތުން މި ފަހަރު ވެސް އެ އޭޖެންސީން ކަންބޮޑުވުން ފާޅުކުރިއެވެ. ޚާއްސަކޮށް، ޚަރަދު ކުޑަނުކުރެވޭތީ އެ ކަމުގެ ކަންބޮޑުވުން ފާޅުކޮށްފައިވެއެވެ.
'ސަން އެޑިޓާސް ޓޯކް'ގެ މި ހަފުތާގެ ޕޮޑްކާސްޓްގައި ވާހަކަދައްކަވަމުން މެނޭޖިން އެޑިޓަރު އަހުމަދު ސާއިލް އަލީ ވިދާޅުވީ، ޓެކްސް ނަގައި މިންވަރު އިތުރުކުރި ނަމަވެސް ހަގީގީ މައްސަލައަށް ހައްލެއް ނުލިބޭ ކަމަށެވެ. އެގޮތުން، ޚަރަދު ކުޑަކުރުމުގެ މުހިންމުކަން އޭނާ ފާހަގަކުރެއްވިއެވެ.
އޭނާ ވިދާޅުވީ، ރައްޔިތުންނަށް ދޭ އެއްވެސް ފައިސާއެއް ކަނޑާލަންވާނީ ސަރުކާރުގެ އެހެނިހެން ދިމާތަކުން ޚަރަދު ކުޑަކޮށްފައި ކަމަށެވެ.
ރާއްޖެއަށް ޒަމާނުއްސުރެ ދިމާވެގެން މި އުޅޭ މައްސަލައަކީ ލިބޭ އާމްދަނީއަށްވުރެ އެތައް އިންސައްތައެއް އިތުރަށް ޚަރަދުކުރުންކަން ފާހަގަކުރައްވައި ސާއިލް ވަނީ ޚަރަދު ކުޑަނުކުރުމުގެ ކަންބޮޑުވުން މޫޑީސްގެ ރިޕޯޓުގައި ވެސް ފާހަގަކޮށްފައިވާކަން ފާހަގަކުރައްވައިފައެވެ.
ޕޮޑްކާސްޓްގައި ވާހަކަދައްކަވަމުން ޑެޕިއުޓީ މެނޭޖިން އެޑިޓަރު އަހުމަދު އިނާހް ވަނީ ދައުލަތުގެ ޚަރަދުތައް އިތުރުވަމުން އައި ގޮތުގެ ތަފާސްހިސާބު ހިއްސާކުރައްވާފައެވެ. އޭނާ ވިދާޅުވީ، ދައުލަތުގެ ޚަރަދު ފާއިތުވި އަހަރުތަކުގެ ތެރޭގައި އެތައް ގުނައެއް އިތުރުވެފައިވާ ކަމަށެވެ.
އޭނާ ހިއްސާކުރެއްވި ތަފާސްހިސާބުގައި ބުނީ، 2008 ވަނަ އަހަރު ދައުލަތުގެ ޚަރަދު 9.8 ބިލިއަން ރުފިޔާގައި ހުރިއިރު މިހާރު އެ އަދަދު 40 ބިލިއަން ރުފިޔާއަށް އަރާފައިވާ ކަމަށެވެ.
އިނާހް ވިދާޅުވީ، ދުނިޔޭގެ ހުރިހާ ގައުމެއްގައި ވެސް އިލާހީ ފިޔަވަޅުތައް އެޅުމުގެ ކުރީގައި އެ ކަންކަން ތަންފީޒުކުރާނެ ގޮތުގެ ޕްލޭންތައް އާންމުކުރާނެ ކަމަށެވެ. އެ ފަދަ ކަންކަމުން ނުކުންނާނެ ނަތީޖާއާ މެދު ދިރާސާކުރަން ޖެހޭނެކަން އޭނާ ފާހަގަކުރެއްވިއެވެ. އެއަށް ފަހުގައި، އާންމުންނާ އެކު އެ ކަމުގައި މީހުން ދެކޭ ގޮތް ސާފުކުރާނެ ކަމަށާއި އެ ގޮތަށް އަމަލުކުރާ ނަމަ، ކޮންމެ ނިންމުމެއް ބަދަލުކުރަން ނުޖެހޭނެ ކަމަށް އޭނާ ވިދާޅުވިއެވެ.
މި ޕޮޑްކާސްޓްގައި މި މައުޞޫޢުގައި މި ނޫން ވެސް މުހިންމު އެތައް ވާހަކަތަކެއް ވަނީ ހިއްސާކޮށްފައެވެ. މުޅި ޕޮޑްކާސްޓް އައްސަވާލައްވާށެވެ.