މި ހަފުތާގެ އަންގާރަ ދުވަހަކީ މަސްވެރިންގެ ދުވަހެވެ. އެ ދުވަހާ ގުޅުވައި މަސްވެރިންނަށް ގިނަ އުފާވެރި ޚަބަރުތަކެއް ވެސް ލިބުނެވެ. އެންމެ ބޮޑު އެއް ކަމަކީ، މަސްވެރިން ބާނާ މަހަށް 48 ގަޑިއިރު ތެރޭ ފައިސާ ލިބުމެވެ.
ރައީސް ޑރ. މުހައްމަދު މުއިއްޒު ވަނީ ބޭންކް އޮފް މޯލްޑިވްސް (ބީއެމްއެލް)ގައި އެކައުންޓު ހުޅުވާފައި ހުރި ދޯނިތަކަށް މަސް ކިރާތާ 48 ގަޑިއިރު ތެރޭގައި މަހަށް ފައިސާ ދޭނެކަން އިއުލާނުކުރައްވައިފައެވެ. މަސްވެރިންނަށް އެސްޓީއޯ ރޭޓުގައި މާލޭގެ އިތުރުން އިތުރު ހަތަރު ސަރަހައްދަކުން ވެސް ތެޔޮ ލިބޭނެ އިންތިޒާމުތައް ވަނީ ހަމަޖައްސައިފިއެވެ.
ސަން އެޑިޓާސް ޓޯކްގެ މި ހަފުތާގެ ޕޮޑްކާސްޓްގައި ވެސް މައިގަނޑު ގޮތެއްގައި އަލިއަޅުވައިލީ މަސްވެރިންނާއި މަސްވެރިކަމުގެ ސިނާއަތަށް ހުރި ގޮންޖެހުންތަކުގެ މައްޗަށެވެ.
ޕޮޑްކާސްޓްގައި ވާހަކަދައްކަވަމުން ސަންގެ މެނޭޖިން އެޑިޓަރު އަހުމަދު ސާއިލް އަލީ ވިދާޅުވީ، ރާއްޖޭގެ މަސްވެރިކަމަށް ގިނަ ގޮންޖެހުންތަކެއް އެބަހުރި ކަމަށެވެ. އޭގެ ތެރޭގައި، ކިރާ މަހަށް ހަމަ އަގު ނުލިބުމާއި އައިސް ހޯދުމާއި ތެޔޮ ހޯދުމުގައި ހުރި ގޮންޖެހުންތައް އޭނާ ފާހަގަކުރެއްވިއެވެ.
އޭނާ ވިދާޅުވީ، މަސްވެރިކަން ކުރިއަރުވަން ސަރުކާރުން އެކަށޭނަ ގޮތެއްގައި މަސައްކަތްކުރަންޖެހޭ ކަމަށެވެ.
އެ ގޮތުން، މަސްވެރިކަން ކުރިއަރުވަން ރާއްޖެއިން ރޯ މެޓީރިއަލް ބޭރުކުރުމުގެ ބަދަލުގައި ގިނަ އުފެއްދުންތައް އުފައްދަންޖެހޭކަން އޭނާ ފާހަގަކުރެއްވިއެވެ. ސާއިލް ވިދާޅުވީ، ދުނިޔޭގެ އެހެން ގައުމުތަކުގައި ވެސް ކަނޑުން ބޮޑު ނަފާއެއް ހޯދާ ކަމަށެވެ. އެކަން ދިވެހީންނަށް ވެސް ކުރެވޭނެ ކަމަށް އޭނާ ވިދާޅުވިއެވެ.
ޕޮޑްކާސްޓްގައި ވާހަކަދައްކަވަމުން ޑެޕިއުޓީ މެނޭޖިން އެޑިޓަރު އަހުމަދު އިނާހް ވިދާޅުވީ، މަސްވެރިކަން ކުރިއަރުވަން އެންމެ ފުރަތަމަ ކަމެއްގެ ގޮތުގައި ރާއްޖޭގެ ރިސޯސަސް ހުރި މިންވަރު ވަޒަންކޮށް އެކަށިގެންވާ ދިރާސާއެއް ހަދަންޖެހޭ ކަމަށެވެ. ކަނޑުން ނަފާ ހޯދޭނެ އެންމެ ފުރިހަމަ ގޮތްތައް ހޯދަން އެކަށިގެންވާ މަސައްކަތްތަކެއް ކުރެވިފައި ނެތްކަން އޭނާ ފާހަގަކުރެއްވިއެވެ.
އިނާހް ވިދާޅުވީ، މަސްވެރިކަން ކުރިއަރުވަން މި ވަގުތު އޮތް އެންމެ ބޮޑު ދެ ގޮންޖެހުމަކީ މީހުން ނެތުމާއި ފައިސާއާއި ވަސީލަތްތައް ނެތުން ކަމަށެވެ. އެ ކަންކަން ހައްލުކޮށްގެން ނޫނީ މަސްވެރިކަމަށް ދެމެހެއްޓެނިވި ހައްލުތަކެއް ނުހޯދޭނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މަސްވެރިކަން ކުރިއަރުވަން އަދި ކަނޑުން ނަފާ ހޯދަން ގައުމީ ފެންވަރެއްގެ ދިރާސާތައް ހަދައި އެކަށިގެންވާ ޕްލޭނެއް ހަދަންޖެހޭ ކަމަށެވެ.
މި ހަފުތާގެ ޕޮޑްކާސްޓްގައި މަސްވެރިކަމާ ގުޅޭ ގޮތުން މި ނޫން ވެސް ގިނަ ވާހަކަތަކެއް ވަނީ ދައްކައިފައެވެ. މުޅި ޕޮޑްކާސްޓް އައްސަވާލައްވާށެވެ.