ދިވެހި އެންމެ ކުދި އަދި މެދުފަންތީގެ ވިޔަފާރިތަކުގެ މުދާ ގުދަން ކުރުމުގެ ފަހި ފުރުސަތު ހޯދައިދިނުމަށް ޓަކައި، ގުދަނެއްގެ ގޮތުގައި ބޭނުންކުރެވޭނެފަދަ ޖާގަ ތަނަވަސް އިމާރާތެއް އަޅަން ބިޒްނަސް ސެންޓާ ކޯޕަރޭޝަން (ބީސީސީ)އިން ހުޅުވާލައިފިއެވެ.
މި މަޝްރޫޢު ކުރިއަށް ގެންދިޔުމަށް ޓަކައި ބީސީސީން ކަނޑައަޅައިފައިވަނީ ޕާޓްނާޝިޕް އުސޫލުން، ކޮންޓްރެކްޓާ ފައިނޭންސިން ޖޮއިންޓް ވެންޗާ ނުވަތަ ލީސް މޮޑެލް ހިމެނޭ ގޮތަށެވެ.
އެ ކޯޕަރޭޝަނުން ވަނީ މި ޢިމާރާތުގެ މަސައްކަތް ކުރަން އެދި ޝައުގުވެރިކަން ފާޅުކުރާއިރު ފަރުމާ، އިންޖިނިއަރިން، ކޮންސްޓްރަކްޝަން އަދި ފެސިލިޓީ ހިންގާނެ ގޮތުގެ ތަފްސީލު ވެސް ހުށަހެޅުމަށް އެދިފައެވެ. އަދި މިކަމަށް ޝައުގުވެރިވާ ފަރާތްތަކުން ހުށަހަޅާ ޕްރޮޕޯޒަލްގައި އެ ފަރާތްތަކުން ހުށަހަޅާ ޕާޓްނާޝިޕް އުސޫލު ވެސް ކަނޑައަޅަން ވާނެ ކަމަށް ވަނީ ބުނެފައެވެ.
ކުދި ވިޔަފާރިތަކަށް ބޭނުންވެފައިވާ ލޮޖިސްޓިކަލް ސަޕޯޓު ފޯރުކޮށްދިނުމުގެ މަގުސަދުގައި ގާއިމުކުރާ މި ޢިމާރާތް އަޅަން ހަމަޖެހިފައިވަނީ ހުޅުމާލެ ފުރަތަމަ ފިޔަވަހީގައެވެ.
ރާއްޖޭގެ ކުދި އަދި މެދުފަންތީގެ ވިޔަފާރިތަކަށް އެހީތެރިކަން ފޯރުކޮށްދީ، ވިޔަފާރިތައް ކުރިއެރުވުމަށް ޓަކައި ކަމާގުޅުންހުރި ފަރާތްތަކާ ގުޅިގެން ބީސީސީއިން އަންނަނީ ގިނަ މަސައްކަތްތަކެއް ކުރަމުންނެވެ.