ދުނިޔޭގެ ކަނޑުތަކުގެ ތިންބައިކުޅަ ދެބައި ހިމާޔަތްކޮށް ބެލެހެއްޓުމަށް އެކުލަވާލާފައިވާ "ހައި ސީސް ޓްރީޓީ" އާއި މާކިއުރީ ޕޮލިއުޝަން ހުއްޓުވުމަށް އެކުލަވާލެވިފައިވާ މިނަމާޓާ ކޮންވެންޝަނުގައި ދިވެހިރާއްޖެއިން މިއަދު ބައިވެރިވެއްޖެއެވެ.
މީގެ ތެރެއިން ހައި ސީސް ޓްރީޓީގައި ބައިވެރިވުމަކީ ދުނިޔޭގެ ކަނޑުތަކުގެ ބޮޑުބައެއް ހިމާޔަތްކޮށް ބެލެހެއްޓުމަށް އެޅޭ މުހިންމު ފިޔަވަޅެއް ކަމަށާއި، މި މުޢާހަދާގައި ބައިވެރިވުމުން، ދިވެހިރާއްޖެއަކީ މި މުޢާހަދާގެ "ސްޓޭޓް ޕާޓީ"އަކަށް ވެފައިވާ ކަމަށް ވެސް ސަރުކާރުން ވަނީ ބުނެފައެވެ.
"ހައި ސީސް ޓްރީޓީ"އަކީ އދ.ގެ ބެލުމުގެ ދަށުން އެކުލަވާލާފައިވާ މުޢާހަދާއެކެވެ. މި މުޢާހަދާގެ މަގުސަދަކީ ގައުމުތަކުގެ ސަރަޙައްދުން ބޭރުގައިވާ ކަނޑުތަކާއި އޭގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމާއި ހިމާޔަތްކުރުމެވެ.
މި މުއާހަދާގައި ބައިވެރިވުމަކީ، މިހާރު ނިއުޔޯކުގައި ކުރިއަށްދާ އދ.ގެ 79 ވަނަ ޖެނެރަލް އެސެމްބްލީގައި ދިވެހިރާއްޖެއިން ހާސިލުކުރި މުހިންމު ކާމިޔާބީއެއް ކަމުގައި ވެސް ސަރުކާރުން ވަނީ ބުނެފައެވެ.
ހައި ސީސް ޓްރީޓީގައި ރާއްޖެއިން ސޮއިކުރީ މި މަހުގެ ތިންވަނަ ދުވަހުގައެވެ.
މިނަމާޓާ ކޮންވެންޝަނުގައި ބައިވެރިވުމަށް ރައީސް ޑރ. މުޙައްމަދު މުއިއްޒު ރައްޔިތުންގެ މަޖިލީހަށް ހުށަހެޅުއްވީ މިދިޔަ ޑިސެންބަރުމަހުގެ 11ވަނަ ދުވަހުގައެވެ. އަދި މަޖިލީހުން އެ މުއާހަދާގައި ބައިވެރިވުމަށް ފާސްކުރީ މިދިޔަ މެއިމަހުގެ 13ގައެވެ.
މިއާއެކު ރާއްޖެ ވެފައިވަނީ ހައި ސީސް ޓްރީޓީގައި ބައިވެރިވި ނުވަވަނަ ގައުމުގެ އިތުރުން، މިނަމާޓާ ކޮންވެންޝަނުގައި ބައިވެރިވި 150ވަނަ ގައުމަށެވެ.
މި ކަމާ ގުޅިގެން އެންވަޔަމަންޓް މިނިސްޓަރު ތޯރިގު އިބްރާހީމް އެކްސްގައި ކުރެއްވި ޕޯސްޓެއްގައި ވިދާޅުވީ ހައި ސީސް ޓްރީޓީގެ ސަބަބުން ދުނިޔޭގެ ބަޔޯޑައިވަސިޓީ ރައްކާތެރިކުރުމުގެ މަސައްކަތްތަކަށް ގިނަގުނަ ފައިދާތަކެއް ލިބޭނެ ކަމަށް އުއްމީދު ކުރައްވާ ކަމަށެވެ.
އަދި މިނަމާޓާ ކޮންވެންޝަނުގެ ދަށުން ކުރިޔަށް އޮތް އަހަރުތަކުގައި މާކިއުރީ ޕޮލިއުޝަން މަދުކުރުމާއި، ދުނިޔެ ހޫނުވުން ކުޑަކުރުމަށް ކުރާ މަސައްކަތުގައި ރާއްޖެއިން އެއްބާރުލުން ދޭނެ ކަމަށް މިނިސްޓަރު ވިދާޅުވިއެވެ.
ކަނޑާއި ކަނޑުގެ ދިރުންތައް ހިމާޔަތްކޮށް ދެމެހެއްޓެނިވި ގޮތެއްގައި ބޭނުން ކުރުމުގެ އިތުރުން، މާކިއުރީ ފަދަ ވިހަ މާއްދާތައް ދޫކުރުމުން ދިރިއުޅުމާއި، ސިއްހަތާއި ތިމާވެށި ރައްކާތެރިކުރުމަށް މަސައްކަތް ކުރާނެ ކަމުގެ ޔަގީންކަން ސަރުކާރުން ވަނީ ދީފައެވެ.