މަލޭ ފަޅުތެރެއަށް ގަސްތުގައި ކަޅުތެޔޮ އެޅި މައްސަލައެއް މާލޭ ސިޓީކައުންސިލުން މިއަދު ބަލަން ފަށައިފިއެވެ.
މާލޭގެ ފަޅުތެރެއަށް ކަޅުތެޔޮ ހަމެއް އޮއްސާލާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ. ވީޑިއޯއިން ފެންނަ ގޮތުގައި ފަޅުތެރޭގައި އަޅާފައި އޮތް "ހަވާސް" ނަމަކަށް ކިޔާ ދޯންޏެއްގައި ހުރި މީހަކު ރީނދޫ ކުލައިގެ ކައްކާ ތެޔޮ ހަމެއްގައި ހުރި ކަޅުތެޔޮ މޫދަށް އޮއްސާލައެވެ. ބެލެވޭ ގޮތުގައި މިއީ ބިދޭސީއެކެވެ.
މި މައްސަލައާ ގުޅިގެން "ސަން"އަށް މައުލޫމާތު ދެމުން މާލެ ސިޓީ ކައުންސިލުން ބުނީ ފަޅުތެރެއަށް ކަޅުތެޔޮ އެޅި މައްސަލަ އެ ކައުންސިލުގެ ސަމާލުކަމަށް އައިސްފައި ވާކަމަށެވެ. އަދި އެ މައްސަލަ ބަލަމުންދާކަމަށް ކައުންސިލުން ބުންޏެވެ.
އެގޮތުން ސޯޝަލް މީޑިއާގައި ދައުރުވަމުންދާ ވީޑިއޯއަކީ ކޮން އިރެއްގެ ވީޑިއޯއެއްތޯ ބެލުމުގެ މަސައްކަތް ސިޓީ ކައުންސިލުން މިވަގުތު ކުރަމުން އަންނަކަމަށް އެ ކައުންސިލުގެ މީޑިއާ އޮފިޝަލް ވަނީ ވިދާޅުވެފައެވެ.
ނަމަވެސް މިކަމުގައި އަދި މިހާތަނަށް އެންވާރަމެންޓަލް ޕްރޮޓެކްޝަން އެޖެންސީ އީޕީއޭގެ ބަހެއް ލިބިފައެެއް ނުވެއެވެ. ތިމާވެއްޓާއި ބެހޭ މިފަދަ ކަންކަން ބަލައި ފިޔަވަޅު އަޅަމުން އަންނަނީ އެ އެޖެންސީންނެވެ.
މި ވީޑިއޯއާ ގުޅިގެން ގިނަ ބަޔަކު އަންނަނީ ނުރުހުން ފާޅުކުރަމުންނެވެ.
"މީވަރަށް ދެރަކަމެއް. މިކަހަލަ ކަންކަން ނުކުރުން އެދެން އަޅުގަނޑުމެން ނެތިދިޔަސް އަޅުގަންޑުމެންގެ ދަރީން މިގައުމުގަ އުޅެންޖެހޭނެ،" އެކްސްގައި މީހަކު ލިޔެފައި ވެއެވެ.
އިތުރު މީހަކު ވަނީ މިކަމާ ގުޅިގެން އަޅާ ފިޔަވަޅެއް އާންމުންނަށް އެނގޭނެހެން އާންމުކުރަން ގޮވައިލައިފައެވެ.
މޫދަށް ތެޔޮ އެޅުމުގެ ސަބަބުން ސިއްހީ މައްސަލަތައް ކުރިމަތިވުމާއި މޫދުގެ ފެންގަނޑު ތަގައްޔަރުވެ، މޫދުގައި އުޅޭ ތަފާތު ބާވަތްތަކުގެ ދިރޭތަކެއްޗަށް އޭގެ ސަބަބުން އުނދަގުލާ ކުރިމަތިވާނެއެވެ.