ކ. ކަނޑުއޮތްގިރީގައި ހިންގި މަސް ކާރުހާނާގެ ސެޓަޕް ޅ. ފެލިވަރަށް ބަދަލުކޮށް ނިމިފައިވާ ކަމަށާއި މި ހަފުތާގައި އެ ތަނުގެ މަސައްކަތް ފެށޭނެ ކަމަށް ސަރުކާރުގެ މަސް ކުންފުނި، މިފްކޯއިން މިއަދު ބުނެފިއެވެ.
އެމްއެންޑީއެފްގެ ބޭނުމަށް މިފްކޯއިން ކަނޑުއޮތްގިރި ހަވާލުކުރީ މިދިޔަ އޮގަސްޓު މަހު ހަތަރެއްގައެވެ. އެހެންވެ، އެ ރަށުގައި ކަންނެލި މަސްވެރިންނަށް ޚާއްސަކޮށް ހިންގި މަސް ކާރުހާނާ ވަގުތީ ގޮތުން ފެލިވަރަށް ބަދަލުކުރަން މިފްކޯއިން ވަނީ ނިންމާފައެވެ.
އެގޮތުން، އެ ކާރުހާނާ ފެލިވަރަށް ބަދަލުކުރަނީ އެ ތަނުގެ މަސައްކަތްތައް ކުރެވޭ ވަރުގެ ބިމެއް ހުޅުމާލެއިން ހަމަޖެހެންދެން ކަމަށް އެ ކުންފުނިން މީގެ ކުރިން ވަނީ ބުނެފައެވެ.
އެ މަސައްކަތް މިހާރު ކުރިއަށްދާ ގޮތާ ގުޅުވައި 'ސަން'އިން ސުވާލު ކުރުމުން މިފްކޯގެ މީޑިއާ އޮފިޝަލް ވިދާޅުވީ، ކާރުހާނާގެ ސެޓަޕް ފެލިވަރަށް ބަދަލުކޮށްފައިވާ ކަމަަށެވެ. އެ ކާރުހާނާގެ މަސައްކަތް މި ހަފުތާގައި ފެށޭނެ ކަމަށާއި ކަނޑުއޮތްގިރީގައި ބައެއް ހެވީ މެޝިނަރީސް ފަދަ ސާމާނުތަކެއް އެބަހުރި ކަމަށް އޮފިޝަލް ވިދާޅުވެފައިވެއެވެ.
ފެލިވަރު: ކަނޑުއޮތްގިރީގައި ހިންގި ކާރުހާނާ ފެލިވަރަށް ބަދަލުކޮށް، މިހަފްތާގައި މަސައްކަތް ފަށަނީ -- ފޮޓޯ/ އެމްޓީސީސީ
ކޭއޯޖީގައި [ކަނޑުއޮތްގިރި] އެބަހުރި ބައެއް ހެވީ މެޝީނަރީސް ކަހަލަ ހެވީ ޑިއުޓީ އެއްޗެހިތަކެއް. އެ އެއްޗެހިތައް އެއްކޮށް ގެންދިޔައީމާ ދެން މުޅި ތަން އެއްކޮށް ރީލޮކޭޝަންގެ މަސައްކަތް ނިމޭނީ، މިފްކޯގެ މީޑިއާ އޮފިޝަލް
އޮފިޝަލް ވިދާޅުވި ގޮތުގައި، މިފްކޯގެ މުދާތައް ބާލައި، ކަނޑުއޮތްގިރި ހުސްކުރަން އެމްއެންޑީއެފްއިން ދިން މުއްދަތު ވަނީ އިތުރުކޮށްދީފައެވެ. އެ މުއްދަތު އިތުރުކޮށްދިނީ އަންނަ މަހު 15ގެ ނިޔަލަށެވެ.
އޭގެ އިތުރުން، މީގެ ކުރިން އެ ކުންފުނިން ބުނި ގޮތުގައި، ކުއްލިއަކަށް އެ ކާރުހަނާ ފެލިވަރަށް ބަދަލުކުރުމަކީ ވަރަށް ބޮޑު ޗެލެންޖެކެވެ.
ނަމަވެސް، ހުޅުމާލެއިން ރަނގަޅު ތަނެއް ލިބެން ދެން މި ވަގުތަށް އެ ތަނުގެ މަސައްކަތްތައް ފެލިވަރަށް ބަދަލުކުރަން ޖެހޭ ކަމަށާއި އެ ކަމުގައި ޚަރަދުތަކެއް ހިނގާނެ ކަމަށް އޭރު މިފްކޯއިން ބުނެފައިވެއެވެ.