ވޭތުވެދިޔަ އަށް މަސް ދުވަހު ފެނަކައިގެ ޚަރަދުން 60 އިންސައްތަ ކުޑަކުރެވިއްޖެ ކަމަށް ފެނަކަ ކޯޕަރޭޝަނުގެ މެނޭޖިން ޑިރެކްޓަރު މުއާޒް މުޙައްމަދު ރަޝީދު މިއަދު ވިދާޅުވެއްޖެއެވެ.
ދަރަނީގެ މައްސަލަ ބޮޑުވެފައި އޮތް ފެނަކަ ކުންފުނި، އެސްޓީއޯގެ ދަށަށް ބަދަލުކުރަން ސަރުކާރުން ވަނީ ނިންމައިފައެވެ.
ޚަރަދު ކުޑަކުރަން ފެނަކައިން އަޅާފައިވާ ފިޔަވަޅުތަކާ ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ، ވޭތުވެދިޔަ އަށް މަސް ދުވަހުގެ ތެރޭގައި މިދިޔަ އަހަރުގެ މި މުއްދަތާ އަޅާ ބަލާއިރު 60 އިންސައްތަ ޚަރަދު ކުޑަކުރެވިފައިވާ ކަމަށެވެ.
ފެނަކައިގެ އިސްވެރިން: އެ ކުންފުނިން ވަނީ ޚަރަދު 60 އިންސައްތަ ކުޑަކޮށްފައި --- ސަން ފޮޓޯ/ އަމަން ލަތީފް
މުއާޒް ވިދާޅުވީ، މިހާ ބޮޑު އަދަދެއް ސޭވް ކުރެވިފައިވަނީ ކުންފުނީގެ މުއައްޒަފުންގެ ވަރަށް ބޮޑު އެހީތެރިކަމާ އެކުގައި ކަމަށެވެ.
"މިދިޔަ އަހަރުގެ މި މުއަދަތުގެ ތެރޭގައި 150 މިލިއަން ރުފިޔާ ޚަރަދު ކުރެވުނުއިރު މި އަހަރުގެ އޮގަސްޓު މަހުގެ ނިޔަލަށް އޮޕަރޭޝަނަލް ކޮސްޓުގެ ގޮތުގައި ޚަރަދުކުރެވުނީ 60 މިލިއަން ރުފިޔާ،" މުއާޒު ވިދާޅުވިއެވެ.
އޭނާ ވިދާޅުވީ، ޚަރަދު ކުޑަކުރުމަށް ވަރަށް ގިނަ ދާއިރާތަކުން މަސައްކަތް ކުރެވި އެކަން ކާމިޔާބު ވެސް ވެފައިވާ ކަމަށެވެ. އެގޮތުން، މީގެ ކުރިން ސީއެސްއާރުގެ ގޮތުގައި ގަސްތުގައި ބޭކާރު ޚަރަދުތަކެއް ކޮށްފައިވާ ކަމަށް އޭނާ ތުހުމަތުކުރިއެވެ.
"އެއްވެސް ކަހަލަ ހިފެހެއްޓުމެއްނެތި އެއްވެސް އުސޫލެއް ނެތި ސީއެސްއާރުން 2023 ވަނަ އަހަރުގައި މަސައްކަތް ކުރެވިފައި ހުރިކަން އަޅުގަނޑުމެންނަށް ފާހަގަކުރެވުނީ،" މުއާޒް ވިދާޅުވިއެވެ.
އޭނާ ވިދާޅުވީ، މެނޭޖްމެންޓުން ކުންފުންޏާ ހަވާލުވެ، ފުރަތަމަ ކަމަކަށް ވެސް ކޮށްފައިވާނީ ސީއެސްއާރުގެ ދަށުން ޚަރަދުކުރަމުންދިޔަ ކޮމްޕޯނަންޓް އެއްކޮށް މަޑުޖައްސާލުން ކަމަށެވެ. އެގޮތުގެ މަތީން މިދިޔަ އަހަރު 9.3 މިލިއަން ރުފިޔާ ޚަރަދުކުރެވުނު ކަމަށާއި ނަމަވެސް މި އަހަރުގެ އެ މުއްދަތުގެ ތެރޭގައި ޚަރަދުކުރެވިފައި ވާނީ 174،000 ރުފިޔާ ކަމަށް އޭނާ ވިދާޅުވިއެވެ.
ފެނަކަ އެމްޑީ މުއާޒް: އެ ކުންފުނިން ވަނީ ޚަރަދުތައް ކުޑަކޮށްފައި --- ސަން ފޮޓޯ/ އަމަން ލަތީފް
އޭނާ ތަފުސީލުކޮށްދެއްވި ގޮތުގައި، މި އަހަރު ޚަރަދުކުރި 174،000 ރުފިޔާގެ ތެރެއިން އެއް ލައްކަ ރުފިޔާއަކީ ފަލަސްތީނަށް އެހީވާން ކުރިއަށް ގެންދިޔަ ޓެލަތޯނަށް ހަދިޔާކުރި ފައިސާއެވެ. ބާކީ 74،000 ރުފިޔާއަކީ ކުރިން ސީއެސްއާރުގެ ގޮތުގައި ކޮށްފައި ހުރި ބައެއް ކަންތައްތަކަށް ޚަރަދުކޮށްފައިވާ ފައިސާއެވެ.
ޖުމްލަ ގޮތެއްގައި މި މެނޭޖްމެންޓުން ސީއެއްއާރުގެ ގޮތުގައި އެއްވެސް ޚަރަދެއް ކޮށްފައިނުވާނެ ކަމަށް އޭނާ ވިދާޅުވިއެވެ. އޭނާ ވިދާޅުވީ، އެންމެ ބޮޑު ޚަރަދެއް ކުންފުނިން ސަލާމާތްކުރީ ކުންފުނީގެ ލޮޖިސްޓިކް އުފުލުމަށް ކުރަންޖެހޭ ކަނޑު ދަތުރުތަކުން ކަމަށެވެ.
އެގޮތުން، މިދިޔަ އަހަރުގެ މި މުއްދަތުގައި 74.7 މިލިއަން ރުފިޔާ އެ ކަމަށް ޚަރަދުކޮށްފައިވާއިރު، މި މަހުގެ މި މުއްދަތުގައި ޓްރާންސްޕޯޓަށް ޚަރަދުކޮށްފައިވަނީ 11.7 މިލިއަން ރުފިޔާ ކަމަށް އޭނާ ވިދާޅުވިއެވެ.