އަންނަ ނޮވެމްބަރު މަހު ބާއްވާ އެމެރިކާގެ ރިޔާސީ އިންތިޚާބުން ބަލިވެއްޖެނަމަ، ހަތަރު އަހަރު ފަހުން ދެން ބާއްވާ އިންތިޚާބުގައި ވާދަނުކުރައްވާނެ ކަމަށް އެމެރިކާގެ އިދިކޮޅު ރިޔާސީ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް އެގޮތަށް ވިދާޅުވީ ޕްރެޒެންޓަރު ޝަރީލް އެޓްކިސަންގެ ޝޯ "ފުލް މެޝާ" އަށް ދެއްވި އިންޓަވިއުއެއްގައެވެ.
"އަޅުގަނޑަށް ހީވަނީ އަޅުގަނޑުމެންނަށް ކާމިޔާބު ލިބޭނެހެން،" އާދިއްތަ ދުވަހު ދެއްކި އިންޓަވިއުގައި ޓްރަމްޕް އިތުރަށް ވިދާޅުވި އެވެ.
ޓްރަމްޕަށް ކާމިޔާބު ލިބިވަޑައިގެންފިނަމަ، ހަވާއީގެ ކުރީގެ ރިޕަބްލިކަން ޓޫލްސީ ގަބާޑް، ޓެކް ބިލިއަނަރު އީލޮން މާސްކް ނުވަތަ ކުރީގެ މިނިވަން ރިޔާސީ ކެންޑިޑޭޓް ރޮބަޓް އެފް ކެނެޑީ ޖޫނިއާ ކެބިނެޓް މަގާމުތަކަށް އައްޔަން ކުރައްވާނަންތޯވެސް އެ ޝޯގައި ޓްރަމަޕާ ވަނީ ސުވާލުކޮށްފައެވެ. އެ ސުވާލަކަށް ސީދާ ޖަވާބެއް ނުދެއްވި ނަމަވެސް ޓްރަމްޕް އެކަން ދޮގުކުރައްވައިފައެއްނުވެއެވެ.
ޓްރަމްޕް ވިދާޅުވީ މިދިޔަ މަހު ރިޔާސީ ރޭހުން ފެއަށް ޖެހިވަޑައިގެން އޭނާއަށް ތާއީދުކުރެއްވި ކެނެޑީއަކީ ސިއްހަތާއި ތިމާވެށީގެ ދާއިރާގައި ތަޖުރިބާކާރު ބޭފުޅެއް ކަމަށެވެ.
ނަމަވެސް ކެބިނެޓަށް ވަކި ބަޔަކު ގެނައުމަށް އެއްވެސް މީހަކާ ޑީލް ނުހައްދަވާ ކަމަށް ޓްރަމްޕް ވިދާޅުވިއެވެ.
ނޭވީ ސީލްގެ ކުރީގެ ޝޯން ރަޔަންއަށް އޮގަސްޓް މަހު ދެއްވި އިންޓަވިއުއެއްގައި ޓްރަމްޕް ވިދާޅުވީ ޓެކް ބިލިއަނަރު މަސްކް އޭނާގެ ކެބިނެޓްގައި ހިދުމަތް ކުރައްވާނެ ކަމަށް އުންމީދު ނުކުރައްވާ ކަމަށާއި އެއީ އެކި ކުންފުނިތަކުގައި އޭނާގެ ޒިންމާތައް ހުރުމުން ކަމަށެވެ. ނަމަވެސް އޭނާއަކީ ގައުމުގެ ކުރިއެރުމަށް ވަރަށް ރަނގަޅު ޚިޔާލުތައް ދެއްވޭނެ ބޭފުޅެއް ކަމަށް ޓްރަމްޕް އޭރު ވިދާޅުވިއެވެ.
މި މަހުގެ ކުރީކޮޅު ޓްރަމްޕް ވަނީ ފެޑެރަލް ޚަރަދުތައް ކުޑަކުރުމަށް ސަރުކާރުގެ އެފިޝަންސީ ކޮމިޝަނެއް އުފެއްދުމަށް މާސްކް ރާވާފައިވާ ޕްލޭން ތަސްދީގު ކުރައްވާނެ ކަމަށްވެސް ވިދާޅުވެފައެވެ.