ރާއްޖޭގައި މެރިކަލްޗާކުރަން ޝައުގުވެރިވާ ފަރާތްތަކަށް މޫދު ކޮށްޓާއި ދިރޭ ކުދި ފާނަ ވިއްކާ ޕްރޮގްރާމެއް ހިންގަން ފިޝަރީސް މިނިސްޓްރީން ނިންމައި، އެ ތަކެތި ގަންނަން ނަން ނޯޓުކުރަން ހުޅުވާލައިފިއެވެ.
އެ މިނިސްޓްރީން ބުނީ، މޫދުކޮށްޓާއި ދިރޭ ފާނަ އަމިއްލަ ފަރާތްތަކަށް ލިބޭ ގޮތް ހެދުމުގެ މަގުސަދަކީ ފާނަ ބޮޑުކޮށްގެން މެރިކަލްޗާ ވިޔަފާރި ފުޅާކުރަން އިތުރަށް މަގުފަހުކޮށްދިނުން ކަމަށެވެ.
އެ ޕްރޮގްރަމުގެ ތެރެއިން ތިން މީޓަރު ފުޅާ، ތިން މީޓަރު ދިގު، އަށް ގޮޅި ހިމެނޭ، (ޖުމްލަ 72 އަކަ މީޓަރުގެ) 57 މޫދުކޮށި އެއް ލައްކަ ރުފިޔާއަށް ވިއްކަން ހަމަޖެހިފައިވާ ކަމަށެވެ.
އެގޮތުން، މޫދު ކޮށިތައް ވިއްކާނީ ކޮށީގެ ފްރޭމާއި ދާގަނޑުތަކާއި ވަލާއި ނަގިލި ހިމެނޭ ގޮތަށް ކަމަށް މިނިސްޓްރީގެ މައުލޫމާތު ކަރުދާހުގައި ފާހަގަކޮށްފައިވެއެވެ.
މޫދުކޮށި ވިއްކުމަށް ހަމަޖެހިފައިވަނީ ކޮށީގެ އަގު ދައްކާ ޚަލާސްކުރާ ތަރުތީބުން ކަމަށްވާއިރު، ގަންނަ މޫދު ކޮށި ކ. މަނިޔަފުށިން ގެންދަން ޖެހޭނީ އެ ގަންނަ ފަރާތަކުންކަން މިނިސްޓްރީން ބުނެފައިވެއެވެ.
މީގެ އިތުރުން، ކުދި ފާނަ ވިއްކަނީ މަނިޔަފުށީގައި ހިންގާ ރިސާޗު ހެޗަރީގައި ކުރިއަށް ގެންދާ ފާނަ އާލާކުރުމުގެ ރިސާޗް ޕްރޮގްރާމްގެ ތެރެއިންނެވެ. އެގޮތުން، ބޮޑު މިނުގައި ހަޔަކާއި ދިހަ ސެންޓިމީޓަރުގެ ފާނައެއް ވިއްކާނީ 15 ރުފިޔާއަށް ކަމަށް މިނިސްޓްރީން ބުނެފައިވެއެވެ.
ފާނަ ވިއްކުމުގައި ވެސް ބަލަނީ ޝައުއުގުވެރިކަން ފާޅުކުރާ ތަރުތީބަށެވެ.
އެހެންވެ، އެ ތަކެތި ގަންނަން އެދޭ ފަރާތްތަކުން [email protected]v އަށް އެޕްލިކޭޝަން ހުށަހެޅުމަށް މިނިސްޓްރީން ވަނީ ހުޅުވާލާފައެވެ. ތަކެތި ގަތުމުގެ ކުރިން ތަކެތި ބަލައިލުމަށް ޝައުގުވެރިވާ ފަރާތްތަކުން 3339251 ނުވަތަ 3322242 ގުޅައިގެން ތަކެތި ބެލޭނެ އިންތިޒާމު ހަމަޖެހޭނެ ކަމަށް މިނިސްޓްރީން މައުލޫމާތު ދެއެވެ.