ހައުސިން މިނިސްޓްރީއާއި އިންފްރަސްޓްރަކްޗާ މިނިސްޓްރީ ހިންގި އިމާރާތުގައި މިއަދު ހިނގި އަލިފާނުގެ ހާދިސާއާ ގުޅިގެން, މާދަމާ ރޭ ބޭއްވުމަށް ހަމަޖެހިފައި އޮތް މަސްވެރިންގެ ދުވަހުގެ ރަސްމީ ޖަލްސާ ފަސްކޮށްފިއެވެ.
ފިޝަރީޒް މިނިސްޓްރީން މިއަދު ނެރުނު ބަޔާނެއްގައި ބުނީ، މިއަދު ހިނގައިދިޔަ ހިތާމަވެރި އަލިފާނުގެ ހާދިސާއާ ގުޅިގެން 44ވަނަ މަސްވެރިންގެ ދުވަހުގެ މުނާސަބަތުގައި މާދަމާރޭ ދަރުބާރުގޭގައި ބޭއްވުމަށް ހަމަޖެހިފައިވާ ރަސްމީ ހަފުލާ ފަސްކޮށްފައިވާ ކަމަށެވެ. ހަފުލާއަށް ދައުވަތު އަރުވައިފައިވާ ފަރާތްތަކަށް ހަފުލާ ބާއްވާނެ ދުވަހެއް ފަހުން ހިއްސާކުރާނެ ކަމަށް އެ މިނިސްޓްރީން ބުނެފައިވެއެވެ.
ހައުސިން މިނިސްޓްރީ ހިންގާ އިމާރާތުގައި އަލިފާން ރޯވުން: މި އަލިފާނުގެ ހާދިސާއާ ގުޅިގެން ތިން މިނިސްޓްރީއެއްގެ މަސައްކަތް ވަނީ ހުއްޓުމަކަށް އައިސްފައި-- ސަން ފޮޓޯ: މުޙައްމަދު ހަމްޒާ
ހައުސިން މިނިސްޓްރީއާއި އިންފްރަސްޓްރަކްޗާ މިނިސްޓްރީ ހިންގި އިމާރާތުގައި މިއަދު ހިނގި އަލިފާނުގެ ހާދިސާގައި، އެ އިމާރާތްވަނީ ބޭނުން ނުކުރެވޭ ވަރަށް އަނދައިފައެވެ. މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.
ހެނދުނު ހިނގި އަލިފާނުގެ ހާދިސާގެ ސަބަބުން ހައުސިން މިނިސްޓްރީއާއި އިންފްރާސްޓަރަކްޗާ މިނިސްޓްރީގެ އިތުރުން އެންވަޔަރަމަންޓް މިނިސްޓްރީއަށް ވެސް ބޮޑެތި ގެއްލުންތަކެއް ލިބި, އެ ތިން މިނިސްޓްރީގެ މަސައްކަތްތައް މިހާރު ވަނީ ވަގުތީ ގޮތުން ހުއްޓުމަކަށް އައިސްފައެވެ. އަދި މާލެ ސިޓީ ކައުންސިލުން ދޭ ޚިދުމަތްތަކަށް ވެސް ވަނީ ބުރޫއަރައިފައެވެ.
އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހިފައިވާ 50 މީހަކަށް ސޯޝަލް ސެންޓަރުން ވަގުތީ ގޮތުން ބޯހިޔާވަހިކަން ވަނީ ފޯރުކޮށްދީފައެވެ.
މި ހާދިސާ ހިނގަން މެދުވެރިވި ސަބަބު އަދިއެއް ނޭނގެއެވެ.