ސައުދީ އަރަބިއްޔާގެ އެހީގައި ގއ. ކޫއްޑޫގައި 4،000 ޓަނުގެ އިތުރު ކޯލްޑް ސްޓޯރޭޖް ފެސިލިޓީއެއް ގާއިމުކުރުމަށް އިންޑިއާގެ ކުންފުންޏަކާ މިއަދު ހަވާލުކޮށްފިއެވެ.
ރައީސް އޮފީހުގައި ބޭއްވި ރަސްމިއްޔާތެއްގައި ފިޝަރީސް މިނިސްޓްރީން ބުނީ ރާއްޖޭގައި މިވަގުތު 8500 ޓަނުގެ ކޯލްޑް ސްޓޯރޭޖް ކެޕޭސިޓީ ގާއިމުކޮށްފައިވާ ކަމަށާއި ސަރުކާރުގެ އަމާޒަކީ އެ ކެޕޭސިޓީ ތިން ގުނަ އިތުރުކޮށް، 25،000 ޓަނަށް އެރުވުން ކަމަށެވެ.
އެ މަސައްކަތުގެ ދަށުން ކޫއްޑޫގެ ކޯލްޑް ސްޓޯރޭޖަށް 4،000 ޓަނު އިތުރުކުރުމަށް، އިންޑިއާގެ ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓެޑާ ހަވާލުކުރުމަށް ފިޝަރީސް މިނިސްޓްރީއާ ދެމެދު މިއަދު ވަނީ އެއްބަސްވުމުގައި ސޮއިކޮށްފައެވެ.
އެ އެއްބަސްވުމުގައި ސޮއިކުރެއްވީ ފިޝަރީސް މިނިސްޓަރު އަހުމަދު ޝިޔާމާއި ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓެޑްގެ މެނޭޖިން ޑިރެކްޓަރު އަޝިޝް އަބްރޯއި އެވެ.
އެއް އަހަރު ތެރޭ ނިންމުމަށް ހަވާލުކުރި، 6.65 މިލިއަން ޑޮލަރުގެ އެ މަޝްރޫއު ހިންގާނީ ސައުދީ ޑެވެލޮޕްމެންޓް ފަންޑުގެ އެހީގައި ކަމަށް މިނިސްޓްރީން ބުންޏެވެ.
އާރުއެސްޑަބްލިޔު ގާއިމުކުރަން އެހީތެރިވެދޭ ފެސިލިޓީގެ ދަށުން އެހީ ލިބޭ ފަރާތަކަށް ލިޔުން ހަވާލުކުރުން -- ފޮޓޯ/ ރައީސް އޮފީސް
ރައީސް އޮފީހުގައި އޮތް ރަސްމިއްޔާތުގައި ވަނީ، އިސްލާމިކް ޑިވެލޮޕްމެންޓް ބޭންކް (އައިއެސްޑީބީ)ގެ ފައިނޭންސިން ފެސިލިޓީއެއްގެ ދަށުން ދޯނިތަކުގައި އާރްއެސްޑަބްލިއު ސިސްޓަމް ނުވަތަ ވަތުގައި ފެން ފިނިކުރާ ނިޒާމު ގާއިމުކުރުމުގެ ފުރުސަތު ލިބޭ މީހުންނަށް ލިޔުން ހަވާލުކޮށްފައެވެ.
އައިއެސްޑީބީން އެ ފެސިލިޓީ ފޯރުކޮށްދެނީ އެ ބޭންކުން 100 ދޯންޏެއްގައި އާރުއެސްޑަބްލިޔު ސިސްޓަމްތައް އެޅުމަށް ކުރިއަށްގެންދާ "ސަޕޯޓް ޕީޕަލްސް ލައިވްލީހުޑްސް އިން ދަ ފިޝަރީސް ސެކްޓާ އިން މޯލްޑިވްސް ތްރޫ ސަސްޓެއިނެބުލް އެނާޖީ" މަޝްރޫއުގެ ދަށުންނެވެ.
އެ ފެސިލިޓީގެ ދަށުން ނަގާ ތަކެތީގެ އަގުގެ 35 ޕަސެންޓް ދައްކާނީ ސަރުކާރުންނެވެ. އެ ފެސިލިޓީގެ ދަށުން ރަހުނަކާ ނުލައި އެއް ލައްކަ ރުފިޔާއިން ފެށިގެން ދެ މިލިއަން ރުފިޔާއާ ހަމައަށް އާރުއެސްޑަބްލިޔު ސިސްޓަމަކާއި ޖެނެރޭޓަރަކާއި ސޯލާ ޕެނަލް ގަތުމަށް ފައިސާ ލިބޭނެއެވެ.
އެ ފެސިލިޓީ ބައްޓަން ކޮށްފަައިވަނީ ހަ މަހުގެ ގްރޭސް ޕީރިއަޑަކާއެކު 10 އަހަރުން ފައިސާ އަނބުރާ ދައްކާ ގޮތަށެވެ.
އެ ފެސިލިޓީއަށް އެޕްލިކޭޝަން ހުށަހަޅަން މިދިޔަ ސެޕްޓެމްބަރު މަހުގެ 22ގައި ހުޅުވާލުމުން 31 އެޕްލިކޭޝަން ލިބިފައިވާ ކަމަށް ފިޝަރީސް މިނިސްޓްރީން ބުންޏެވެ. އޭގެ ތެރެއިން 21 އެޕްލިކޭޝަން ޕްރޮސެސް ކުރަމުން އަންނައިރު، މިއަދު 13 މީހަކަށް ވަނީ އެ ފެސިލިޓީ ހަމަޖެއްސުމުގެ ލިޔުން ހަވާލުކޮށްފައެވެ.
އެ ލިޔުންތައް ހަވާލުކޮށްދެއްވީ ރައީސް ޑރ. މުޙައްމަދު މުއިއްޒެވެ.
މިއަދު ރައީސް ވަނީ، މަސްވެރިންނާއި އާންމު ރައްޔިތުންނަށް އެސްޓީއޯގެ ރޭޓުގައި ތެޔޮ ލިބޭނެ ގޮތް ހަމަޖައްސައިދިނުމުގެ ގޮތުން ކޮންމެ އަތޮޅެއްގައި ފިއުލް ސްޓޯރޭޖް ގާއިމުކުރުމުގެ މަޝްރޫއު ވެސް އިފުތިތާހުކޮށްދެއްވައިފައެވެ.
މިނިސްޓަރު ޝިޔާމް ވަނީ، މި ސަރުކާރު ފެށިއިރު އެންމެ ބޮޑެތި ގޮންޖެހުންތައް ދިމާވެފައި ވަނީ މަސްވެރިކަމުގެ ދާއިރާއަށް ކަމަށާއި މި ދައުރުގެ ފުރަތަމަ ތިން އަހަރު ތެރޭ އެ ގޮންޖެހުންތަކަށް ހައްލު ހޯދައިދޭނެ ކަމަށް ވިދާޅުވެފައެވެ.