އދ.ގެ އާންމު މަޖިލީހުގެ 79ވަނަ ސެޝަންގައި ތަގުރީރު ކުރެއްވުމަށް އެމެރިކާއަށް ރައީސް ޑރ. މުޙައްމަދު މުއިއްޒު ކުރައްވާ ރަސްމީ ދަތުރުފުޅުގައި އެމެރިކާގެ ނިއުޔޯކަށް މިރޭ ވަޑައިގެންފިއެވެ.
ރައީސް އޮފީހުން ބުނި ގޮތުގައި އެ މަނިކުފާނު މިހާރު ހުންނެވީ ނިއުޔޯކުގެ ޖޯންއެފް ކެނެޑީ އެއާޕޯޓަށް ދަތުރުފުޅުކުރައްވައި، ނިއުޔޯކު ސިޓީގައެވެ.
އެއާޕޯޓުން ރައީސަށާއި، އެ މަނިކުފާނުގެ އަރިހުގައި ވަޑައިގެންނެވި ބޭފުޅުންނަށް މަރުހަބާ ދެންނެވީ ރާއްޖެއިން އދ. އަށް ކަނޑައަޅުއްވައިފައި ހުންނަވާ ދާއިމީ މަންދޫބު ޑރ. އަލީ ނަސީރު މުޙައްމަދެވެ.
ރައީސް، އާންމު މަޖިލީހުގެ 79 ވަނަ ސެޝަންގައި ތަގުރީރުކުރައްވާނީ އަންނަ އަންގާރަ ދުވަހެވެ.
މިއީ ރައީސް އދ.ގެ އާންމު މަޖިލީހުގައި ބައިވެރިވަޑައިގަންނަވާ ފުރަތަމަ ފަހަރެވެ. އެމަނިކުފާނުގެ މި ދަތުރުފުޅު ދިމާވަނީ ރާއްޖެ އދ.ގެ މެންބަރު ގައުމަކަށް ވީތާ 59 އަހަރު ފުރޭ މުނާސަބަތާ ވެސް މެއެވެ.
ރައީސް އޮފީހުން ބުނީ އެ ދަތުރުފުޅު ނިންމަވާލެއްވުމަށްފަހު ރައީސް އެނބުރިވަޑައިގަންނަވާނީ ސެޕްޓެމްބަރު މަހުގެ 29ވާ އާދީއްތަ ދުވަހު ކަމަށެވެ.