މިދިޔަ އަންގާރަ ދުވަހު ޓެކްސީ ގަވައިދަށް ގެނައި އިސްލާހާއެކު 10,000 ރުފިޔާ ދީގެން ޓެކްސީ ރަޖިސްޓްރީ ކުރެވޭ ގަވާއިދު އުވާލާފައިވާ ކަމަށް ޓްރާންސްޕޯޓް މިނިސްޓްރީން މިއަދު ބުނެފިއެވެ.
އެ މިނިސްޓްރީން މިއަދު އެކްސްގައި ކުރި ޕޯސްޓެއްގައި ބުނީ، ޓެކްސީ ގަވައިދަށް އިސްލާހު ގެނައީ، ގަރާޖަކާ ނުލާ 10،000 ރުފިޔާއަށް ޓެކްސީ ރަޖިސްޓްރީ ކުރެވޭ ގޮތަށް މިދިޔަ އަހަރު ގެނައި އިސްލާހު އުނިކުރުމަށް ފަހު ކަމަށެވެ.
މިދިޔަ ހަފުތާގައި ގެނައި އިސްލާހަކީ ޓެކްސީ ގަވައިދުގެ ދަށުން ކުރިން އެ ގަވައިދުގައި އޮތް ގޮތަށް އަމަލު ކުރަން ގެނައި އިސްލާހެއް ކަމަށް މިނިސްޓްރީން ބުނެފައިވެއެވެ.
މީގެއިތުރުން، އެ ގަވައިދަށް މިދިޔަ އަހަރުގެ ގެނައި ބަދަލަކީ ގާނޫނީ ގޮތުން ކުރިއަށް ނުގެންދެވޭނެ ނިންމުމެއް ކަމަށް އެޓާނީ ޖެނެރަލް އޮފީސް (އޭޖީ) އިން މިދޔަ އަހަރުގެ ނޮވެންބަރު ނުވަ ވަނަ ދުވަހު ލަފާދީފައިވާތީ އެ އިސްލާހަށް އެއްވެސް އިރެއްގައި އަމަލުކޮށްފައި ނުވާނެ ކަމަށް މިނިސްޓްރީން ބުނެފައިވެއެވެ.
ފަހުން ގެނައި އިސްލާހުގެ ދަށުން މިނިސްޓްރީން ވަނީ ސެންޓަރެއްގައި ރަޖިސްޓްރީކޮށްގެން ނޫނީ، ޓެކްސީތަކަށް ލައިސަންސް ނުލިބޭ ގޮތަށް ވެސް ހަދާފައެވެ.