ރަސްފަންނުގައި ބަޔަކަށް ވަޅިން ބިރު ދައްކައި ފޭރުނު ދެ މީހަކު ހައްޔަރުކޮށްފި

ރޭ ރަސްފަންނުގައި ބަޔަކަށް ވަޅިން ބިރު ދައްކައި ފޭރުނު ދެ މީހަކު ހައްޔަރުކޮށްފިއެވެ.

ފުލުހުން މީޑިއާތަކާ ހިއްސާކުރި މެސެޖެއްގައި ބުނީ ރޭ ރަސްފަންނުގައި ތިބި ބިދޭސީންތަކަކަށް ވަޅިން ބިރުދައްކައި، ލާރި ނުދީފި ނަމަ އިނގިލިތައް ބުރިކޮށްލާނެ ކަމަށް ބުނެ އިންޒާރުދީގެން، އެ ދެ ބިދޭސީ މީހުންގެ ވޮލެޓުގައި ހުރި ފައިސާ ފޭރިގެންފައިވާ ކަމަށެވެ.

އެ މައްސަލައިގައި ސ. ހިތަދޫ، އަތިރީއާގެ، އަހުމަދު ސިވާތާއި ހަމަ އެ ރަށުގެ ޑެލައިޓްފޭސް ގެޔަށް ނިސްބަތްވާ މުހައްމަދު ސާލިމް ރޭ ހައްޔަރުކޮށްފައިވާ ކަމަށް ފުލުހުން ބުންޏެވެ. އެ ދެ މީހުން އަތުލައިގަތް ކަމަށް ތުހުމަތުވާ ފައިސާވެސް ހޯދައިފައިވާ އެ މުއައްސަސާއިން ބުންޏެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.

ރަސްފަންނުގައި މީގެ ކުރިން ވައްކަމުގެ މައްސަލަތަކެއް ފެންމަތިވެފައިވެއެވެ. އެގޮތުން މީހުން މޫދަށް އެރި އުޅެނިކޮށް، އެ މީހުންގެ ވޮލެޓާއި ދަބަސް ފަދަ ތަކެތި ވަގަށް ނެގުމުގެ މައްސަލަ ފުލުހުންނަށް ރިޕޯޓުކޮށްފައިވެއެވެ.

ފުލުހުންނާ ރިޕޯޓުކުރާ މައްސަލަތަކާ ގުޅޭ ގޮތުން އާންމުކޮށްފައިވާ ތަފާސްހިސާބުން ދައްކާ ގޮތުގައި މިހާތަނަށް އެންމެ ގިނައިން ރިޕޯޓުކޮށްފައި ވަނީ ވައްކަމުގެ މައްސަލަތަކެވެ. އެގޮތުން ވައްކަމުގެ 2،658 މައްސަލަ ރިޕޯޓުކޮށްފައިވާއިރު ފޭރުމުގެ 369 މައްސަލަ ރިޕޯޓުކޮށްފައިވެއެވެ.