ހިންދީ ސިނަމާގެ ކުރީގެ ބަތަލާ އަދި ލެޖެންޑު އެކްޓަރު އަމީތާބް ބައްޗަންގެ އަންހެނުން ޖަޔާ ބައްޗަންއަކީ މިޒާޖުގައި ވަރަށް ރުންކުރު މީހެއްގެ ގޮތުގައި މީޑިއާ ރިޕޯޓަރުންގެ މެދުގައި މަޝްހޫރު ބަތަލާއެކެވެ.
މީޑިއާ ރިޕޯޓަރުން އެއްވެ އެއްފަހަރާ ސުވާލުތައް ކުރިމަތިކޮށް ފޮޓޯތައް ނެގުމަކީ ޖަޔާ ވަރަށް ރުޅި އަންނަ އެހާމެ ނަފުރަތުކުރާ ކަމެކެވެ. ޚާއްސަކޮށް ކެމެރާގެ ފްލެޝް ބޭނުންކޮށް ތަކުރާރުކޮށް ފޮޓޯ ނަގާ ރިޕޯޓަރުންނާ ދިމާލަށް ވަރަށް ހަރުކަށިކޮށް ފޮޓޯ ނުނަގަން ވެސް ޖަޔާ އަންގާފައި އެބަހުއްޓެވެ.
ފިލްމީ ޚަބަރުތައް ގެނެސްދޭ އިންޑިއަން އެކްސްޕްރެސްގައި ބުނެފައިވާ ގޮތުގައި ޖަޔާ ފިލްމު ކުޅުނު ދުވަސްވަރަކީ މީޑިއާ ރިޕޯޓަރުން މިހާރު މިއުޅޭހާ ހަރަކާތްތެރިކޮށް އުޅުނު ޒަމާނެއް ނޫނެވެ. އޭރު ފިލްމީ ތަރިއެއްގެ އިންޓަވިއު ގެނެސްދިނުމަކީ ވެސް މިހާރާ އަޅާ ބަލާއިރު ހާސް ބައި ތަފާތުތަކެއް އޭގައި އެކުލެވޭ ކަމެކެވެ. މިހާރުގެ ސެލެބްރިޓީ އިންޓަވިއުތަކުގައި ކުރާ ކަހަލަ ޒާތީ ދިރިއުޅުމުގެ ސުވާލުތަކަށް އޭރު މާބޮޑު ސަމާލުކަމެއް ނުދެއެވެ.
އެހެންކަމުން މި ޒަމާނުގައި ސެލެބްރިޓީންނަށް މީޑިއާތަކުން ދެމުންދާ ސަމާލުކަމާއި އެންމެން ބޮނޑިއަކަށް ތިބެ ފިލްމީ ތަރިންނަށް އުނދަގޫވާ ގޮތަށް ފޮޓޯ ނެގުމަކީ ޖަޔާއަށް ވަރަށް އާ ކަމެއް ކަމަށް މީޑިއާ ރިޕޯޓަރަކު ވަނީ ބުނެފައެވެ. ފިލްމު އިންޑަސްޓްރީގައި މަސައްކަތްކުރާ މީހަކު ބޭރުތެރެއިން ފެނުމާ އެކު ފޮޓޯ ނެގުމަކީ ޖަޔާ އެއްގޮތަކަށް ވެސް ގަޔާވާ ކަމެއް ނޫނެވެ.
ޖަޔާ ބައްޗަން އަދި އަމީތާބް ބައްޗަން--ފޮޓޯ/ޖީކިއުއިންޑިއާ
މީގެއިތުރުން ބައެއް ކެމެރާމަނުން ފޮޓޯ ނެގުމުގެ ވަށްޓަފާޅިއަށް ގެނެސްފައިވާ ބަދަލުތަކާއެކު ބައެއް ފަހަރު ބިންމަތީ އޮށޯވެތިބެ ފޮޓޯ ނަގާކަމަށާއި އެހެން ތިބެ ފޮޓޯ ނަގާ އެންގަލް އެއްގޮތަކަށް ވެސް ނުވިސްނޭ ކަމަށް ބަތަލާ ވަނީ ބުނެފައެވެ.
ބައެއް ޕްރެސް ކޮންފަރެންސް ތަކުގައި މީޑިއާ ރިޕޯޓަރުންނާ ވަރަށް ރީތި ބަހުން މުހާތަބުކުރާ ބަތަލާ އެންމެފަހުން ބެލުންތެރިންނަށް ފެނިފައި ވަނީ ދަރުމާ ކުންފުނިން ގެނެސްދިން ފިލްމު "ރޮކީ އޯރް ރާނީ"އިންނެވެ.