މާލެއަށް ނިސްބަތްކޮށް ކ. މާލެ ބޭނުން ކުރުމަކީ ގާނޫނާ ޚިލާފު ކަމެއް ކަމަށާއި އެއީ ރަނގަޅު ކުރަން ޖެހޭ ކަމެއް ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު މިއަދު އިލްތިމާސް ކުރައްވައިފިއެވެ.
މިނިސްޓަރު އާދަމް ޝަރީފް އެކްސްގައި މިފަދައިން ވިދާޅުވެ ޕޯސްޓެއްކުރެއްވީ މިހާރު ގިނަ ލިޔުންތަކެއްގައި މާލެއަށް ނިސްބަތްކޮށް "ކ. މާލެ" ޖަހައިފައިވާ ތަން ފެނިވަޑައިގަންނަވާކަމަށް ވިދާޅުވެއެވެ.
މިނިސްތަރު ކުރެއްވި ޕޯސްޓެއްގައި ވިދާޅުވީ، ގާނޫނުގައި އަސާސީގެ 14 ވަނަ މާއްދާގައި ރާއްޖޭގެ ވެރިކަން ކުރާ ރަށަކީ "މާލެ" ކަމަށެވެ.
ގާނޫނު އަސާސީީގައި ވެރިކަން ކުރާ ރަށަކަށް މާލެ ބަޔާންކޮށްފައިވީ ނަމަވެސް، "ކ. މާލެ" ކަމަށް ބަޔާންކޮށް ނޯންނާނެ ކަމަށް މިނިސްޓަރު ވިދާޅުވިއެވެ.
އޭގެއިތުރުން، ސަރުކާރުގެ "ގިނަ" ރަސްމީ ލިޔުންތަކުގައި "ކ. މާލެ" ކަމުގައި ލިޔެފައި ނޯންނަ ކަމަށާއި ކ. އަތޮޅުގައި މާލެ އޮތް ނަމަވެސް ވެރިކަން ކުރާ ރަށަކީ މާލެ ކަމަށްވާތީ ކުރިއަށް "ކ" އިތުރުކޮށްގެން ނުލިޔާނެ ކަމަށް އާދަމް ޝަރީފް ވިދާޅުވެފައިވެއެވެ.
އިތުރަށް މިނިސްޓަރު ވިދާޅުވީ، ކ. މާލެ ބޭނުންކުރުމަކީ ގަނޫނުގައި އޮންނަ ގޮތާ ޚިލާފު ކަމެެއް ކަމަށާއި މިފަހަކަށް އައިސް ކ. މާލެ ކިޔުމާއި ލިޔުން އިތުރުވެފައިވާ ކަމަށެވެ.
އެއީ ކުޑަކަމެއް ނޫން ކަމަށާއި އެކަން ރަނގަޅު ކުރަން ޖެހޭކަން މިނިސްޓަރު ފާހަގަކޮށްފައިވެއެވެ.
ވެރިރަށް މާލެއަކީ ސިޓީއެއްގެ ދަރަޖަ ދީފައި އޮންނަ ރަށަކަށް ވުމާއެކު މާލޭ ސިޓީގެ ގޮތުގައި ވެސް ލިޔުންތަކުގައި މާލެއަށް ނިސްބަތްކޮށްފައި ހުރެއެވެ.