މާލޭ ސިޓީ ކައުންސިލުން މި އަހަރަށް 487 މިލިއަން ރުފިޔާގެ ބަޖެޓެއް މިއަދު ފާސްކޮށްފިއެވެ.
އެ ކައުންސިލުން މި އަހަރަށް ލަފާކުރާ ބަޖެޓު ފާސްކުރީ މާލޭ ސިޓީ ކައުންސިލްގެ ހަތަރުވަނަ ދުއުރުގެ 178 ވަނަ ރަސްމީ އާންމު ޖަލްސާގައެވެ. ޖަލްސާގައި މި އަހަރަށް ލަފާކުރާ އާމްދަނީއާއި ޚަރަދުގެ ތަފުސީލުތައް ހުށަހެޅިއެވެ.
މާލޭ ސިޓީ ކައުންސިލުން ބުނީ، މި އަހަރަށް އެ ކައުންސިލުން ފާސްކުރި ޖުމުލަ ބަޖެޓަކީ 487،225،846.50 ރުފިޔާ ކަމަށެވެ.
ބަޖެޓު ހުށަހެޅުމަށް ފަހު، ބަޖެޓާ ބެހޭ ގޮތުން ވާހަކަދައްކަވަމުން، ޑެޕިއުޓީ މޭޔަރު އަޙުމަދު ނަރީޝް ވިދާޅުވީ، އާންމުކޮށް މާލެ ސިޓީގައި ނުގެންގުޅޭ ބާވަތުގެ ވެހިކަލްތައް، މާލެސިޓީ ކައުންސިލްގައި އެބަހުރި ކަމަށާއި އެ ފަދަ ވެހިކަލްތަކުގެ ބޭނުން ހިފުމަށް ކުންފުނިތަކާއި އަމިއްލަ ފަރާތްކަން އެދެމުންދާ ކަމަށެވެ.
އެ ފަދަ ވެހިލަކްތައް އިތުރަށް ހޯދައި، އެ ތަކެތި ކުއްޔަށް ދީގެން މާލެ ސިޓީ ކައުންސިލަށް ރަނގަޅު ޢާމްދަނީއެއް ލިބުމުގެ ފުރުޞަތު އޮތްކަން އޭނާ ފާހަގަކުރެއްވިއެވެ.
ބަޖެޓާ ބެހޭގޮތުން ވާހަކަ ފުޅުދައްކަވަމުން، ކައުންސިލަރް މުޙައްމަދު ސައިފު ފާތިޙު ވިދާޅުވީ، ކޮންމެ އަހަރެއްގެ ދައުލަތުގެ ބަޖެޓުން މާލެސިޓީ ކައުންސިލަށް ދޭން ޤާނޫނުގައި ކަނޑައަޅުއްވާފައިވާ މިންވަރު ނުލިބޭ ކަމަށެވެ.
ސައިފު ވިދާޅުވީ، މިދިޔަ އަހަރަށް ވުރެ ދައުލަތުގެ ބަޖެޓް، އެތައް ތަނަކުން އިތުރުވިއިރު، ދައުލަތުގެ ބަޖެޓުން މާލެ ސިޓީ ކައުންސިލަށް ދޭން ނިންމި ފައިސާގެ ޢަދަދު، އެ އަހަރަށް ވުރެ، މި އަހަރު 23 މިލިޔަން ރުފިޔާ މަދު ކަމަށެވެ.