ޓީވީ ޝޯތަކަށް ލިބޭ އެންމެ ޝަރަފުވެރި އެވޯޑު ކަމަށްވާ ޕްރައިމް ޓައިމްގެ އެމީގެ މި އަހަރުގެ ހަފުލާގެ ހޯސްޓުންގެ ތެރޭގައި އިންޑިއާގެ މަޝްހޫރު ކޮމޭޑިއަން-އެކްޓަރު ވީރް ދާސް ހިމެނިއްޖެއެވެ.
މި އަހަރުގެ ނޮވެމްބަރު މަހުގެ 25 ވަނަ ދުވަހު ނިއުޔޯކް ސިޓީގައި ބޭއްވުމަށް ހަމަޖެހިފައިވާ އެމީ އެވޯޑް ހަފުލާ ހޯސްޓު ކުރުމުގެ ފުރުސަތު ލިބިފައިވާކަން ވީރް ދާސް ވެސް ވަނީ ސޯޝަލް މީޑީއާގައި އިއުލާނުކޮށްފައެވެ. މިއީ އިންޑިއާގެ ފިލްމީ ތަރިއަކު އެމީ އެވޯޑު ހަފުލާ ހޯސްޓުކުރާ ފުރަތަމަ ފަހަރު ވެސް މެއެވެ.
އަމިއްލަ ކޮމެޑީ ޝޯ "ވީރް ދާސް: ލޭންޑިން"އިން މިދިޔަ އަހަރު އެންމެ މޮޅު ކޮމެޑީ ކެޓަގަރީން އެމީ އެވޯޑު ކާމިޔާބުކުރި ވީރް ދާސްއަށް ހޯސްޓު ކުރުމުގެ ފުރުސަތު ލިބުމާ ގުޅިގެން ސަޕޯޓަރުންނަށާއި އެމީ އެވޯޑު އިންތިޒާމު ކުރާ ފާރަތްތަކަށް އޭނާ ވަނީ ޝުކުރު އަދާކޮށްފައެވެ.
ބައިނަލްއަޤުވާމީ ޕްލެޓްފޯމަކުން އިންޑިއާއަށް ނިސްބަތްވާ ފަންނާނަކަށް ފުރުސަތު ލިބުމަކީ މުޅި އިންޑިއާ ފަޚުރުވެރިވާނެ ކަމެއް ކަމަށް ވެސް ވީރް ވަނީ ބުނެފައެވެ.
ވީރް ދާސް މިދިޔަ އަހަރު ކާމިޔާބުކުރި އެމީ އެވޯޑް ޓްރޮފީއާ އެކު --ފޮޓޯ/ޓެލެގްރާފްއިންޑިއާ
ސްޓޭންޑް އަޕް ކޮމެޑީއެއްގެ އިތުރުން ވީރަކީ ބައެއް ޓެލެވިޒަން ޕްރޮޖެކްޓްތަކުގައި ވެސް މަސައްކަތްކޮށްފައިވާ މީހެކެވެ. އޭގެ ތެރޭގައި އޭބީސީގެ ސްޕައި ޑްރާމާ ކޮމެޑީ "ވިސްކީ ކަވޭލަޔަ"، ނެޓްފްލިކްސްއިން ގެނެސްދިން "ހަސްމުކް" އަދި އެމޭޒަން ޕްރައިމްގެ ޓްރެވެލް ޝޯ "ޖެސްޓިނޭޝަން އަންނޯން" ހިމެނެއެވެ.
ވީރް އެންމެ ފަހުން ބެލުންތެރިންނަށް ފެނިފައިވަނީ މި މަހުގެ ހަވަނަ ދުވަހު އެމޭޒަން ޕްރައިމްގައި ރިލީޒްކުރި ސީރީޒް "ކޯލް މީ ބޭ"އިންނެވެ. މިއީ ބަތަލާ އަނަނިޔާ ޕާންޑޭ ލީޑް ރޯލުން ފެނުނު ބަތަލާގެ ކެރިއަރުގެ ފުރަތަމަ ވެބް ސީރީޒެވެ.