މިރޭ ބޭއްވި "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތު ނިންމާލުމުގެ ގޮތުން، ގައުމީ ސަލާމް ހުށަހަޅައިދިން ޚާއްސަ އެހީއަށް ބޭނުންވާ ކުދިންނަށް ރައީސް ޑރ. މުހައްމަދު މުއިއްޒު ސެލިއުޓް ކުރައްވައިފިއެވެ.
އެހެން ޚާއްސަ ރަސްމިއްޔާތުތަކެކޭ އެއްގޮތަށް މިރޭގެ ރަސްމިއްޔާތު ވެސް ނިންމާލީ ގައުމީ ސަލަމުންނެވެ. ގައުމީ ސަލާމުން ރަސްމިއްޔާތު ނިންމާލާ ވަގުތު ޖެހުމުން އެކަން އިއުލާނު ކުރުމަށް ފަހު، ގައުމީ ސަލާމް ހުށަހަޅައިދިމުނަށް ސްޓޭޖް ފުރާލީ ޚާއްސަ އެހީއަށް ބޭނުންވާ ތުއްތު ކުދިންތަކުންނެވެ. ބައެއް ކުދިން ފޮރުޅުލީ ގޮނޑީގައި ސްޓޭޖަށް އެރި އިރު، އަނެއްބައި ކުދިން ތިބީ ކޮޅަށެވެ. މި ހުރިހާ ދަރިވަރުން ވެސް ތިބީ އެ ކުދިން ތަމްސީލުކުރާ ސްކޫލެއްގެ ޔުނީފޯމުގައެވެ.
އެކުދިން ވަނީ ގައުމީ ސަލާމުގައި ކިޔާ ބަސްތައް އިޝާރާތުން ދައްކުވައިދީ، ޖަލްސާގެ ހުރިހާ ހާޒިރީންނަށް ގައުމީ ސަލާމް ހުށަހަޅައިދީފައެވެ. މި ހުށަހެޅުން ނިންމާލުމަށްޓަކައި މި ދަރިވަރުން ގައުމީ ސަލާމުގެ ފަހު ބަސް "ސަލާމް" ދައްކުވައިދިނީ ސެލިއުޓަކުންނެވެ.
އެއާއެކު ފެނުނީ ރައީސް ވެސް އެކުދިންގެ ހުށަހެޅުމަށް ސެލިއުޓް ކުރެއްވި މަންޒަރެވެ. ބޮޑު ހިނިތުންވުމަކާއެކު އެކުދިންނަށް ސެލިއުޓް ކުރެއްވުމަށް ފަހު އެކުދިންނަށް ތަރުހީބު ދިނުމުގެ ގޮތުން ރައީސް އަތްޖައްސަވައެވެ.
އެއާއެކު އެތައް ބަޔަކު ވަނީ އެ ހިނދުކޮޅުގެ ފޮޓޯތައް ސޯޝަލްމީޑިއާގައި ހިއްސާކޮށް އެއީ މާނަފުން ރީތި ހިނދުކޮޅެއްގެ ގޮތުގައި ސިފަކޮށްފައެވެ. މި ފޮޓޯ ސޯޝަލް މީޑިއާގައި ހިއްސާކުރި މީހަކު ބުނެފައި ވަނީ ފޮޓޯއިން ދައްކުވައިދެނީ ތަފާތު އިހުސާސެއް ކަމަށެވެ.
މިއަހަރުގެ މިނިވަން ދުވަހުގެ ޖަލްސާގައި ދައުލަތަށް ދިގު މުއްދަތަކަށް ޚިދުމަތްކުރެއްވި ބޭފުޅެއްގެ އަގުވަޒަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވި ޝަރަފުގެ ބެޖު ވެއްޓުނަ ނުދިނުމުން ވެސް އެމަނިކުފާނަށް އެތައް ބަޔަކު ތައުރީފުކުރިއެވެ.
އެ ވީޑިއޯއިން ފެންނަނީ ކ. ތުލުސްދޫ، ރޯޒީ، ޚާލިދު ގާސިމާ ބެޖު ހަވާލުކުރައްވަނިކޮށް، ޚާލިދުގެ އަތުން ބެޖު ދޫވާ މަންޒަރެވެ. ނަމަވެސް، ރައީސް އެ ބެޖު ވެއްޓުނަނުދީ، ހުޝިޔާރުކަމާއެކު ހިފަހައްޓަވައެވެ.