ޅ. ހިންނަވަރާއި ނައިފަރުގައި ފުލުހުން އިއްޔެ ފެށި ޑުރަގު އޮޕަރޭޝަނުގައި ދެ ލައްކައަށް ވުރެ ގިނަ ރުފިޔާއާއި ބޭރު ފައިސާ އެކު ފަސް މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
މި އޮޕަރޭޝަނުގައި ހައްޔަރުކޮށްފައިވަނީ:
- އުމުރުން 48 އަަހަރުގެ ޅ. ހިންނަވަރު، އަގީދުގެ، ހުސެއިން އީސާ ފުޅު
- އުމުރުން 36 އަހަރުގެ ޅ. ހިންނަވަރު، މިދިލިމާގެ، އަޙްމަދު މުޙައްމަދު
- އުމުރުން 46 އަހަރުގެ ޅ. ނައިފަރު، ޑޭޒީހިޔާ، ޢަބްދުﷲ ޒަކަރިއްޔާ
- އުމުރުން 35 އަހަރުގެ ޅ. ހިންނަވަރު، ފެހިގެ، މުޙައްމަދު އިރުޝާދު
- އުމުރުން 44 އަހަރުގެ އދ. މަހިބަދޫ، ކުޅިބަލާގެ، ފާތިމަތު ރީމާ
އެ މީހުންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން، އިސާފުޅާއި އަޙުމަދު މުހައްމަދު ހަތް ދުވަހަށް ބަންދުކޮށް، ޒަކަރިއްޔާ ބަންދަށް 15 ދުވަސް ޖަހާފައިވާ ކަމަށް ފުލުހުން ބުނެއެވެ. އަދި، ރީމާ 12 ދުވަހަށް ބަންދު ކުރުމަށާއި އިރުޝާދު ތިން ދުވަހަށް ބަންދު ކުރަން ކޯޓުން އަމުރުކޮށްފައިވެއެވެ.
ފުލުހުން ހިއްސާކުރި މައުލޫމާތުގައި ބުނީ، އިއްޔެ ހިންނަވަރާއި ނައިފަރުގައި ކުރިއަށް ގެންދިޔަ އޮޕަރޭޝަނުގައި 12 ތަނެއް ބަލައި ފާސްކޮށް، ފަސް މީހަކު ހައްޔަރުކޮށްފައިވާ ކަމަށެވެ.
އެ ބަލައި ފާސްކުރުމުގެ ތެރެއިން ބަރުދަނުގައި 86.26 ގުރާމްގެ މަސްތުވާތަކެތި ކަމަށް ބެލެވޭ ތަކެތި ފެނިފައިވާ ކަމަށާއި 293،000 ދިވެހި ރުފިޔާއާއި އެމެރިކާ ޑޮލަރުގެ އިތުރުން ޔޫރޯ ފެނިފައިވާ ކަމަށް ފުލުހުން ބުނެއެވެ.
ފުލުހުން މައުލޫމާތު ދީފައިވާ ގޮތުގައި، ހައްޔަރުކުރި ފަސް މީހުންގެ އިތުރުން އެހެން މީހުން ވެސް ބަލައި ފާސްކޮށްފައިވެއެވެ.
މީގެ ކުރިން ފުލުހުން ބުނި ގޮތުން އޮޕަރޭޝަން ކުރިއަށް ގެންދަނީ ޑުރަގު އެންފޯސްމަންޓާއި ނޯތު ޕޮލިހުން ގުޅިގެނެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
މަސްތުވާތަކެތި އަތުލައިގަތުމަށް ދޭތެރެއަކުން ފުލުހުން އޮޕަރޭޝަންތައް ހިންގައެވެ. އެގޮތުން، ކުރިއަށް ގެންދާ އޮޕަރޭޝަންތަކުގައި ބައެއް ފަހަރަށް ގިނަ އަދަދެއްގެ މަސްތުވާތަކެތި އަތުލައިގަނެފައި އެބަހުއްޓެވެ.
ފާހަގަކޮށްލެވޭ ގޮތުގައި، ހޯމް މިނިސްޓްރީން ވަނީ ރާއްޖެއަށް 500 ގްރާމަށްވުރެ އިތުރަށް މަސްތުވާތަކެތި އެތެރެކުރާނަމަ އަދަބަކީ މަރުގެ އަދަބުކަމަށް ކަނޑައަޅާ، މަސްތުވާތަކެއްޗާ ބެހޭ ގާނޫނަށް އިސްލާހު ހުށަހަޅަން ބިލެއް ޑްރާފްޓުކޮށްފައެވެ.