ޅ. ނައިފަރާއި ހިންނަވަރުގައި ފުލުހުން ޑުރަގު އޮޕަރޭޝަނެއް މިއަދު ފަށައިފިއެވެ.
މި ކަމާ ގުޅުވައި މީޑިއާތަކާ ހިއްސާކުރި މެސެޖެއްގައި ބުނީ، ޑުރަގު އެންފޯސްމަންޓާއި ނޯތު ޕޮލިހުން ގުޅިގެން ޑުރަގު އޮޕަރޭޝަނެއް ކުރިއަށްގެންދާ ކަމަށެވެ.
އަދި، އޮޕަރޭޝަން ނިމުމުން އިތުރު މައުލޫމާތު ހިއްސާކުރާނެ ކަމަށް ފުލުހުން ބުނެފައިވެއެވެ.
މަސްތުވާތަކެތި އަތުލައިގަތުމަށް ދޭތެރެއަކުން ފުލުހުން އޮޕަރޭޝަންތައް ހިންގައެވެ. އެގޮތުން، ކުރިއަށް ގެންދާ އޮޕަރޭޝަންތަކުގައި ބައެއް ފަހަރަށް ގިނަ އަދަދެއްގެ މަސްތުވާތަކެތި އަތުލައިގަނެފައި އެބަހުއްޓެވެ.
ފާހަގަކޮށްލެވޭ ގޮތުގައި، ހޯމް މިނިސްޓްރީން ވަނީ ރާއްޖެއަށް 500 ގްރާމަށްވުރެ އިތުރަށް މަސްތުވާތަކެތި އެތެރެކުރާނަމަ އަދަބަކީ މަރުގެ އަދަބުކަމަށް ކަނޑައަޅާ، މަސްތުވާތަކެއްޗާ ބެހޭ ގާނޫނަށް އިސްލާހު ހުށަހަޅަން ބިލެއް ޑްރާފްޓުކޮށްފައެވެ.
މަސްތުވާތަކެއްޗާ ބެހޭ ގާނޫނުގައި ވާގޮތުން، މަސްތުވާތަކެތި އެތެރެކުރާ މީހުންނަށް ދެވޭ އަދަބަކީ އުމުރަށް ޖަލަށްލުމެވެ. ނުވަތަ 100،000 ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
ރާއްޖޭގައި މަރުގެ އަދަބު ކަނޑައަޅާފައި އޮންނަނީ ހަމައެކަނި، މަރުގެ މައްސަލަތަކަށެވެ. އެހެންކަމުން، މިއީ މަސްތުވާތަކެތީގެ މައްސަލައެއްގައި މިފަދަ ހަރުކަށި އަދަބެއް ދޭން ސަރުކާރަކުން ހުށަހެޅި ފުރަތަމަ ފަހަރެވެ.