އެމެރިކާގެ ރިޔާސީ އިންތިޚާބަށް ގާތްގަnޑަކަށް އަށް މަސް ވާން ކައިވެރިވެފައި ވަނިކޮށް އޭބީސީ ނޫހުން އިންތިޒާމުކޮށްގެން މިއަދު ބޭއްވި ރިޔާސީ ބަހުސްގައި ދެ ބޭފުޅުން ވެސް އެއްބޭފުޅަކު އަނެއް ބޭފުޅަކަށް ހޫނު ބަހުގެ ހަމަލާތައް ރައްދުކުރައްވައިފިއެވެ.
ގާތްގަޑަކަށް 90 މިނެޓަށް ދިގު ދެމިގެންދިޔަ ބަހުސްގައި ދެ ބޭފުޅުންވެސް ވަނީ ސިޔާސަތުތަކަށާއި ޒާތީ ކަންކަމަށް ވެސް ފާޑުވިދާޅުވެފައެވެ.
އަލްޖަޒީރާއިން ބުނެފައިވާ ގޮތުގައި ޓްރަމްޕް ވަނީ ހެރިސް އަކީ އޯޕަން ބޯޑަރު ސިޔާސަތުތައް ގެންގުޅުއްވައި، ބަޑި ގެންގުޅުން މަނާކުރަން މަސައްކަތްކުރައްވާ ބޭފުޅެއްގެ ގޮތުގައި ސިފަކުރައްވައިފައެވެ.
އަދި އެ ކަމަނާއަކީ އެމެރިކާގެ ރައީސް ޖޯ ބައިޑެން ސިޔާސީ ގޮތުން އެއްގޮތް ބޭފުޅެއްކަމަށް ވެސް ޓްރަމްޕް ވިދާޅުވިއެވެ.
ރައްދުގައި ހެރިސް ވަނީ ޓްރަމްޕް މަގާމަށް ފިޓްކަމާ މެދު ސުވާލު އުފައްދަވައިފައެވެ. އަދި ޓްރަމްޕް ވާހަކަފުޅުދައްކަވަމުން ގެންދެވިއިރު، މަލާމާތުގެ ގޮތުން ހިނިފުޅުވަޑުވާތަން ވެސް އެތައް ފަހަރަކު ފެނިފައިވެއެވެ.
ތިރީގައި މިވަނީ ރިޔާސީ ބަހުސުން ފާހަގަވި ކަންކަމެވެ.
- ޓްރަމްޕް ހުއްޓާނުލައި ވާހަކަދެއްކުން
މުޅި ބަހުސްގައި ވެސް ޓްރަމްޕްގެ ވާހަކަފުޅުތައް ވަރަށް ގިނައެވެ. މޮޑަރޭޓަރުންގެ ސުވާލުތަކަށް ނުގުޅޭ ޖަވާބު ދެއްވުމާއި، އަވަސް އަވަހަށް މައުޟޫއު ބަދަލުކުރައްވާ ތަން ވެސް ފެނިފައިވެއެވެ.
ޖަވާބުތަކަށް ފޯކަސް ނުކުރެއްވުމާއި، ރަނގަޅު ޖަވާބު ދެއްވުމުގެ ބަދަލުގައި ގިނަ ފަހަރު ބައްލަވައިފައި ވަނީ ހެރިސްއަށް ބަހުގެ ހަމަލާއެއް ދެއްވޭތޯ ކަމަށް އަލްޖަޒީރާއިން ބުނެއެވެ.
- ހެރިސް ޓްރަމްޕަށް ދެއްވި ހޫނު ބަހުގެ ހަމަލާތައް
އަނެއްކޮޅުން ހެރިސް ވަނީ ޓްރަމްޕަށް ހޫނު ބަހުގެ ހަމަލާތަކެއް ދެއްވައިފައެވެ.
ދެހާސް ސޯޅަވަނަ އަހަރު ޓްރަމްޕް ވެރިކަމަށް ވަޑައިގަތުމަށްފަހު، އޭނާއަށް އެހީތެރިވި ގިނަ ބަޔަކު ޓްރަމްޕާ ދުރަށް ވަޑައިގެންނެވި ކަމަށް ހެރިސް ވިދާޅުވިއެވެ.
އަދި ޓްރަމްޕަކީ "ބަލިކަށި" ކެންޑިޑޭޓެއް ކަމަށް ވިދާޅުވެ، އެމެރިކާގެ ލީޑާޝިޕާމެދު މުޅި ދުނިޔެ ހޭނެ ކަމަށް ޓްރަމްޕް ވިދާޅުވި ވިދާޅުވުން، އެމަނިކުފާނަށް އަމާޒުކުރެއްވިއެވެ.
ގައުމުތަކުގެ ޚުދުމުޚުތާރު ވެރިން އަނެއްކާވެސް ރައީސް ކަމަށް ޓްރަމްޕް ހޮއްވަވަން ބޭނުންފުޅުވާކަން އެނގިވަޑައިގަންނަވާކަމަށާއި، އެކި ކަހަލަ ހަދިޔާތައް ދީގެން އެމީހުން ބޭނުންވާ ކަންކަން ޓްރަމްޕް ލައްވާ ކުރުވާނެ ކަމަށް ވެސް އެ ކަމަނާ ވިދާޅުވިއެވެ.
ނަމަވެސް ރިޕަބްލިކަން ޕާޓީއާއި ޑިމޮކްރެޓިކް ވެރިކަމުގައި ވެސް ވަނީ މުޅި ދުނިޔޭގެ ޚުދުމުޚުތާރު ސަރުކާރުތަކާއި ލީޑަރުންނާ ގާތް ގުޅުމެއް ބާއްވައިފައިވާކަން ފާހަގަކުރާކަމަށް އަލްޖަޒީރާއިން ބުނެފައިވެއެވެ.
- ޣައްޒާއާ ބެހޭ ގޮތުން ދެ ބޭފުޅުން ވެސް އެއް ވާހަކަތަކެއް
ޣައްޒާގައި ހިނގަމުންދާ ހަނގުރާމައާ ބެހޭ ގޮތުން ސުވާލު ކުރުމުން ދެ ކެންޑިޑޭޓުން ވެސް ތަކުރާރުކުރެއްވީ އާންމުކޮށް ދައްކަވާ އެއް ވާހަކަތަކެކެވެ.
އިސްރާއީލުގެ އަސީރުން ދޫކޮށްލުމަށް ޝަރުތުކޮށް، ޣައްޒާ ހަނގުރާމަ ހުއްޓާލުމުގެ އެއްބަސްވުމަކަށް ތާއީދުކުރައްވާ ކަމަށް ހެރިސް ވިދާޅުވިއެވެ. ނަމަވެސް އިސްރާއީލަށް ހަތިޔާރު ފޯރުކޮށްދިނުން ހުއްޓައިނުލައްވާނެ ކަމަށާއި، ތާއީދު ކުރައްވަނީ ދެ ދައުލަތުގެ ސުލްހައަށް ނުވަތަ ޓޫ ސްޓޭޓް ސޮލިއުޝަންއަކަށް ކަމަށް ހެރިސް ވަނީ ވިދާޅުވެފައެވެ.
ޓްރަމްޕް ވަނީ އެމަނިކުފާނު ވެރިކަމުގައި ހުންނެވިނަމަ މެދުއިރުމަތީގެ ހަނގުރާމަ ނުހިނގާނެ ކަމަށް ވިދާޅުވެފައެވެ. އަދި ހެރިސްއަކީ އިސްރާއީލަށާއި އަރަބި ދުނިޔެއަށް ނަފްރަތު ކުރައްވާ ބޭފުޅެއް ކަމަށްވެސް ޓްރަމްޕް ވިދާޅުވިއެވެ.
އޭގެ އިތުރުން ޓްރަމްޕް ވަނީ އީރާނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް ބައިޑަންގެ ވެރިކަމުގައި އުވާލި ކަމަށް ތުހުމަތު ކުރައްވައިފައެވެ.
ޔުކްރެއިނާމެދު ދެ ކެންޑިޑޭޓުންގެ ޚިޔާލު ތަފާތު
ރަޝިއާ ޔޫކްރެއިން ހަނގުރާމައާ ގުޅިގެން އެމެރިކާގެ އެންމެ ބޮޑު ދެ ސިޔާސީ ޕާޓީން ގެންގުޅެނީ ތަފާތު ޚިޔާލުތަކެކެވެ.
ޔޫކްރެއިންއަށް އިތުރަށް ހަތިޔާރު ފޯރުކޮށްދިނުމަށް ރިޕަބްލިކަން ޕާޓީން ދެކޮޅު ހަދާ ނަމަވެސް ޑިމޮކްރެޓުން ބޮޑުތަނުން ތާއީދު ކުރަނީ ޔޫކްރޭނަށެވެ.
އެ ހަމަނުޖެހުން ނިމުމަކަށް ގެނައުމަށް އެއްބަސްވުމަކަށް ބާރުއަޅާނެ ކަމަށް ޓްރަމްޕް ވިދާޅުވިއިރު، ރަޝިއާއިން ޔޫކްރެއިނަށް އަރައިގަތުމާ ދެކޮޅަށް ހަނގުރާމަ ކުރުމަށް ޔޫކްރެއިންއަށް އެހީތެރިވާން ޖެހޭނެ ކަމަށް ހެރިސް ވިދާޅުވިއެވެ.