އިންޑިއާގެ މުމްބާއީގެ ކަނޑު އަޑީގައި ހަދަމުން އަންނަ އާދިތު ޓަނަލް, ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް އިއްޔެ ބައްލަވާލައިފިއެވެ.
ކޮންސްޓްރަކްޝަން މިނިސްޓްރީން ބުނީ، މުމްބައީގެ ކަނޑުއަޑީގައި ހަދާ ޓަނަލަކަށް މިނިސްޓަރު މުއްތަލިބް ޒިޔާރަތްކުރައްވާފައިވާ ކަމަށެވެ.
މި ޒިޔާރަތުގައި ސްޓޭޓް މިނިސްޓަރު އިބްރާހިމް ތާޢާމް މުޙައްމަދާއި ސްޓޭޓް މިނިސްޓަރު އިސްމާޢީލް ޙަމީދުގެ އިތުރުން ރާއްޖެއަށް ކަނޑައަޅުއްވާފައި ހުންނަވާ އިންޑިއާގެ ހައި ކޮމިޝަނަރު މުނު މަހާވަރު ވެސް ބައިވެރިވެވަޑައިގެންނެވި ކަމަށް މިނިސްޓްރީން ބުނެއެވެ.
އެ ޓަނަލަކީ މުމްބާއީއާއި އަހުމަދާބާދާ ދެމެދު ރޭލުން ދަތުރުކުރުމަށް ހަދާ 7.1 ކިލޯމީޓަރުގެ ޓަނަލެއް ކަމަށާއި އެ ޓަނަލަށް ޒިޔާރަތްކުރުމުގެ މަގުސަދަކީ ރާއްޖޭގެ އުމްރާނީ ތަރައްގީގެ މަޝްރޫއުތަކަށް ބޭނުންކުރެވިދާނެ އާ ޓެކްނޮލޮޖީތަކާއި ގޮތްތައް ދެނެގަތުން ކަމަށް މިނިސްޓްރީން ބުންޏެވެ.
މިނިސްޓަރު މުއްތަލިބާއި އެހެނިހެން އިސްވެރިން މުމްބާއީގެ ކަނޑުއަޑީގައި ހަދާ ޓަނަލް ބައްލަވާލައްވަނީ: އެ ޒިޔާރަތް ކުރެއްވީ ރާއްޖޭގައި އެފަދަ މަޝްރޫއުތައް ހިންގުމަށް ތަޖުރިބާ ހޯދުމަށް ކަމަށް މިނިސްޓްރީން ބުނޭ --- ފޮޓޯ/ ކޮންސްޓްރަކްޝަން މިނިސްޓްރީ
މިނިސްޓްރީން އިތުރަށް ބުނެފައިވާ ގޮތުން، މި ޒިޔާރަތުގެ ސަބަބުން ރާއްޖެއާއި އިންޑިއާއާ ދެމެދު އޮންނަ ގުޅުން އިތުރަށް ބަދަހިވެ، ދެ ގައުމުގެ މެދުގައި ޓެކްނިކަލް މަޢުލޫމާތު ޙިއްޞާކުރުމަށް މަގުފަހިވެގެންދާނެ ފަހި ފުރުޞަތަކަށް ވާނެއެވެ.
ފާހަގަކޮށްލެވޭ ގޮތުގައި، ފުށިދިއްގަރުފަޅު ހިއްކައިގެން ހަދާ ރަސްމާލެ، މާލެ ސިޓީއާ ގުޅުވާނީ ކަނޑު އަޑީގެ ޓަނަަލަކުން ކަމަށް ރައީސް ޑރ. މުޙައްމަދު މުއިއްޒު ވިދާޅުވެފައިވެއެވެ.
އެ ޓަނަލް ހަދާނީ އޭގެ އެތެރެއިން ރޭލުގައި ދަތުރުކުރާއިރު ކަނޑުއަޑީގެ ރީތި މަންޒަރުތައް ފެންނަ ގޮތަށް ކަމަށް އޭރު ރައީސް ވިދާޅުވިއެވެ.