ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) ހޯމް މިނިސްޓްރީގެ ދަށަށް ބަދަލު ކުރުމާ ގުޅިގެން ލޯކަލް ގަވަނަންސް މިނިސްޓަރު އާދަމް ޝަރީފް އުމަރު އެ ނިންމުމަށް މަރުހަބާ ވިދާޅުވެއްޖެއެވެ.
ރައީސް ޑރ. މުޙައްމަދު މުޢިއްޒު އިއްޔެ ވަނީ ކޭމް، ހޯމްލޭންޑް މިނިސްޓްރީގެ ދަށަށް ބަދަލުކުރަން ނިންމަވާފައެވެ.
އެ ކަމާ ގުޅިގެން މިނިސްޓަރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، ކޭމްގެ ސްޓާފުންނާއި ކޯ ޕާޓްނަރުން ކަމަށްވާ ދިރާގު، އުރީދޫ، އާރުއޯއެލް، ސެޓްލިންކް އަދި ސްޓާލިންކްގެ މުވައްޒަފުންނާ އެކު މަސައްކަތްކުރެވުމަކީ އުފެއްދުންތެރި ތަޖުރިބާއެއް ކަމަށެވެ.
މުޅި ގައުމާއި ދުނިޔޭގައި ޓެލެކޮމްގެ ދާއިރާގެ ޚިދުމަތްތައް ފުޅާކޮށް އިތުރުކުރުމުގެ ސިޔާސަތުގެ ދަށުން ޓެލެކޮމްގެ ބައިވެރިންނާ އެކު އުފެއްދުންތެރި ބައްދަލުވުންތަކާއި ވޯކިން ސެޝަންތައް ކުރިއަށް ގެންދެވިފައިވާކަން މިނިސްޓަރު ފާހަގަކުރެއްވިއެވެ.
މި މަސައްކަތުގެ ދަށުން ސްޓޭކްހޯލްޑަރުންގެ ބައްދަލުވުންތަކާއި މަޝްވަރާތަކުގެ ސިލްސިލާތައް ކުރިއަށް ގެންދެވުނުކަން ފާހަގަކުރައްވައި މިނިސްޓަރު ވިދާޅުވީ އުރީދޫ ޕީސް ކޭބަލް ލޯންޗުކުރުމާއި ދިރާގު އެސްއީ-ވީ-އެމްއީ ސަބްމެރިން ކޭބަލް ލޯންޗުކުރުމުގައި ބައިވެރިވުމުގެ ފުރުސަތު ވެސް ލިބިވަޑައިގެންނެވި ކަމަށެވެ.
އަދި، ރައީސް މުޢިއްޒުގެ އިރުޝާދުފުޅުގެ ދަށުން ކޭމްއިން ރާއްޖޭގައި ފުރަތަމަ ފަހަރަށް ބަރަހަނާ މަންޒަރުތައް ފެންނަ ސައިޓުތައް ބްލޮކް ކުރުމަކީ ތާރީޚީ ނިންމުމެއްކަން މިނިސްޓަރު ފާހަގަކުރެއްވިއެވެ. ހޯމް މިނިސްޓްރީގެ ދަށަށް ކޭމް ބަދަލުވުމާ އެކު، މިނިސްޓަރު އަލީ އިހުސާންގެ ގާބިލު ލީޑަޝިޕްގެ ދަށުން ކޭމްއިން ގައުމަށް ޚިދުމަތް ކުރާނެކަން ޔަގީންކުރާ ކަމަށް އާދަމް ޝަރީފް ވިދާޅުވިއެވެ.
މިނިސްޓަރު ކުރެއްވި ޕޯސްޓުގައިވަނީ ކުރިއަށް އޮތް ތަނުގައި ކޭމްއަށް ކާމިޔާބީއަށް އެދިވަޑައިގެންފައެވެ. އަދި، ދިރާގާއި، އުރީދޫއާއި، އާރުއޯއެލްއާއި ސެޓްލިންކް އަދި ސްޓާލިންކުން ދިން އެއްބާރުލުމާއި އެހީތެރިކަމަށް ޝުކުރު އަދާކުރައްވައިފައެވެ.
ކޭމް އަކީ ރާއްޖޭގެ ކޮމިއުނިކޭޝަން ދާއިރާ ރެގިއުލޭޓުކޮށް، ކުރިއެރުވުމުގެ ޒިންމާ މަތިކޮށްފައިވާ އޮތޯރިޓީއެކެވެ. މި އޮތޯރިޓީގެ ބައެއް ޒިންމާތަކުގެ ތެރޭގައި:
- ޓެލެކޮމިއުނިކޭޝަންގެ ޚިދުމަތްތައް ފޯރުކޮށްދިނުމަށް ބޭނުންވާ މިންގަނޑުތައް ކަނޑައެޅުން.
- ދިވެހިރާއްޖޭގައި ބޭނުންކުރެވޭ ޓެލެކޮމިއުނިކޭޝަން އިކުއިޕްމަންޓް ބަލައި ފާސްކޮށް، ހުއްދަދިނުން.
- ސެޓަލައިޓްގެ ގުޅުން ޤާއިމުކުރުމަށް ކުރެވޭ މަސައްކަތްތައް ރެގިއުލޭޓުކުރުމާއި، އެ ކަންކަން އިންޓަނޭޝަނަލް ޓެލެކޮމިއުނިކޭޝަންސް ޔޫނިއަންއާއި ކަމާބެހޭ ބައިނަލްއަޤުވާމީ ޖަމިއްޔާތައް ނުވަތަ އިދާރާތަކާއެކު ވިލަރެސްކުރުން.
- ރޭޑިއޯ ކޮމިއުނިކޭޝަން އިކުއިޕްމަންޓާއި ސްޕެކްޓްރަމް ބޭނުންކުރުމަށް ލައިސަންސް ދޫކުރުމާއި، ކަމާބެހޭ ކަންކަން ބެލެހެއްޓުން.
- ދިވެހިރާއްޖޭގައި ޕޯސްޓުގެ ޚިދުމަތް ދޭ ފަރާތްތައް ރަޖިސްޓަރީކޮށްދިނުން.
- ޕޯސްޓުގެ ދާއިރާ ރެގިއުލޭޓުކުރުމާބެހޭ ބައިނަލްއަޤްވާމީ މިންގަނޑުތައް ކަނޑައެޅުމުގައި ދިވެހިރާއްޖެއިން ދޭން ބޭނުންވާ ލަފަޔާއި މަޝްވަރާދިނުމާއި، ޕޯސްޓާބެހޭ ބައިނަލްއަޤްވާމީ ފޯރަމްތަކުގައި ދިވެހިރާއްޖެ ތަމްސީލުކުރުން.
މި އޮތޯރިޓީ 2016ވަނަ އަހަރު އުފެއްދިއިރު، މިދިޔަ ސަރުކާރުގައި މި އޮތޯރިޓީ އޮތީ އެންވަޔަރަމަންޓް އެންޑް ޓެކްނޮލޮޖީ މިނިސްޓްރީގެ ދަށުގައެވެ. މި އޮތޯރިޓީ ލޯކަލް ގަވަމަންޓް މިނިސްޓްރީގެ ދަށަށް ބަދަލުކުރީ މި ސަރުކާރުންނެވެ.