ކުށުގެ މައްސަލަ ހައްލު ކުރުމަށް ޚިޔާލު ތަފާތުވުންތައް ދޫކޮށްލައި، އެއްބައިވަންތަކަމުގެ ރޫހެއްގައި ގުޅިގެން މަސައްކަތް ކުރުމުން، މި ދުނިޔެއަކީ އަންނަން އޮތް ޖީލުތަކަށް ރައްކާތެރި ތަނަކަށް ހެދިދާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ޗައިނާގެ ލިއަންޔުންގަންގް ސިޓީގައި ބާއްވަމުން އަންނަ ގްލޯބަލް ޕަބްލިކް ސެކިއުރިޓީ ކޯޕަރޭޝަން ފޯރަމް 2024ގައި ތަގުރީރު ކުރައްވަމުންނެވެ.
ތަގުރީރު ކުރައްވަމުން މިނިސްޓަރު ވިދާޅުވީ ކުށް މަދުކުރުމަކީ ހަމަ އެކަނި އެއް ގައުމަކުން ނުވަތަ އެންމެ ޖަމިއްޔާއެއްގެ މަސައްކަތުން ކުރެވޭނެ ކަމެއް ނޫން ކަމަށާއި، އެ ކަން ކުރުމަށް ބޭނުންވަނީ އެންމެން ވެސް އެކަމުގެ ޒިންމާ ހިއްސާކޮށް، ފިޔަވަޅުއަޅައިގެން މަސައްކަތް ކުރުން ކަމަށެވެ.
މިނިސްޓަރު ވިދާޅުވި ގޮތުގައި މިއަދު ދުނިޔޭގައި ހިނގާ ޓެރަރިޒަމާއި، ސައިބަ ކްރައިމް އަދި ރޭވިގެން ހިންގޭ ކުށްތަކަކީ ގައުމެއްގެ ބޯޑަރާ ހަމައިން ހުއްޓުވޭ ކަންކަމެއް ނޫނެވެ. މި ފަދަ ކުށްތައް ދުނިޔޭގެ އެކި ކަންކޮޅުތަކަށް ފެތުރިގެންދާކަން މިނިސްޓަރުގެ ވާހަކައިގައި ފާހަގަ ކުރެއްވިއެވެ.
މި ފަދަ މައްސަލަތައް ހައްލު ކުރުމުގައި ދިމާވާ ބޮޑެތި ގޮންޖެހުންތައް ހައްލު ކުރެވޭނީ ގައުމުތަކާއި، ބައިނަލްއަގުވާމީ ޖަމިއްޔާތަކާއި ޕްރައިވެޓް ސެކްޓާގެ އިތުރުން މުޖުތަމައުތައް އެކުގައި މަސައްކަތްކޮށްގެންކަން މިނިސްޓަރު ފާހަގަ ކުރެއްވިއެވެ. އެ ގޮތުން އެންމެން ގުޅިގެން ނެޓްވޯކެއްގެ ތެރެއިން މި ކަމަށް މަސައްކަތް ކުރުމަކީ ކޮންމެހެން ކުރަންޖެހޭ ކަމެއް ކަމަށް އިހުސާން ވިދާޅުވިއެވެ.
މި ފޯރަމް ކުރިއަށްދަނީ މި މަހުގެ ފަސްވަނަ ދުވަހުން ފެށިގެން މާދަމާގެ ނިޔަލަށެވެ.
މި ފޯރަމްގެ މަގުސަަދަކީ ޕަބްލިކް ސެކިއުރިޓީ ދާއިރާގެ ސްޓޭކްހޯލްޑަރުން އެއްތަނަކަށް އެއްކުރުމާއި، މި ދާއިރާގައި ހިމެނޭ ގިނަ މަސައްލަތަކަށް ފޯކަސް ކުރުމެވެ.
ހޯމް މިނިސްޓްރީން ބުނީ މި ދަތުރުފުޅުގެ ތެރެއިން މިނިސްޓަރު އިހުސާން ބެއިޖިންއަށް ވަޑައިގެން ޗައިނާގެ މިނިސްޓާ އޮފް ޕަބްލިކް ސެކިއުރިޓީ ވަންގް ޝިއާއޯހޮންގް އާއި ބައްދަލުކުރައްވާފައިވާ ކަމަށެވެ. މި ބައްދަލު ކުރެއްވުމުގައި ދެ ގައުމުން އެއްބާރުލުން ދިނުމުގެ ދާއިރާތަކާ ބެހޭ ގޮތުން މަޝްވަރާ ކުރެއްވިއެވެ. އަދި ފުޅާ ދާއިރާއެއްގައި ހޯމް ސެކްޓާއަށް ބޭނުންވާ އެހީތެރިކަން ހޯދުމާ ގުޅޭ ގޮތުން ވެސް ފުޅާ ދާއިރާއެއްގައި މަޝްވަރާތައް ކުރެއްވި ކަމަށް ހޯމް މިނިސްޓްރީން ބުންޏެވެ.
ގްލޯބަލް ޕަބްލިކް ސެކިއުރިޓީ ކޯޕަރޭޝަން ފޯރަމް 2024ގައި ބައިވެރިވެ ވަޑައިގަތުމަށް ހޯމް މިނިސްޓަރު އިހުސާން ޗައިނާއަށް ކުރައްވަމުންގެންދަވާ ދަތުރުފުޅުގައި ކޮމިޝަނާ އޮފް ޕޮލިސް އަލީ ޝުޖާއު ވެސް ބައިވެރިވެ ވަޑައިގަންނަވައެވެ.