އއ. އުކުޅަހުގައި ހަތަރު މީހުން އަރުވައިގެން ސައިކަލު ދުއްވި މީހަކު އިއްޔެ ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ވަނީ މިދިޔަ އާދިއްތަ ދުވަހު ހަވީރު އުކުޅަހު، ޑޭޒީމާގޭ، އަޙުމަދު ނަސީމް، އެ ރަށު ބަނދަރު ސަރަހައްދުން ސައިކަލަކަށް ހަތަރު މީހުން އަރުވައިގެން ބާރު ސްޕިޑުގައި ނުރައްކާތެރިކޮށް ދުއްވި ކަމަށެވެ.
ފުލުހުން އެ ސައިކަލު މަޑުކުރަން އެންގުމުން ފުލުހުންގެ އަމުރަށް ނުކިޔަމަންތެރިވެ، ހަޑިހުތުރު ބަހުން ހަޅޭއްލަވައި އަޑުގަދަކޮށް އެ ސަރަހައްދުގެ އާންމު މަސްލަހަތު ނަގާލައި، ފުލުހުންގެ ދައުރު އަދާކުރުމަށް އޭނާ ހުރަސް އެޅި ކަމަށް މެސެޖުގައިވެއެވެ. އަދި އޭނާ އަމުރަށް ނުކިޔަމަންތެރިވެ ސައިކަލު މަޑުނުކޮށް ބާރު ސްޕީޑުގައި ދުއްވާފައިދިޔަ ކަމަށް ވެސް ފުލުހުން ބުންޏެވެ.
އެ މައްސަލައާ ގުޅިގެން ނަސީމު އިއްޔެ ކޯޓު އަމުރެއްގެ ދަށުން ހައްޔަރު ކޮށްފައި ވާކަމަށާއި އޭނާގެ ބަންދަށް ހަތް ދުވަހުގެ މުއްދަތެއް ޖަހައިފައިވާ ކަމަށް ފުލުހުން ބުންޏެވެ.
އެ މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.