ހުޅުމާލެ ފުރަތަމަ ފިޔަވަހީގެ ސަހަރާ ކުރިމައްޗަށްވާ ގޮތަށް އޮންނަ ބިން, ހަތަރުފުރޮޅުލީ ވެހިކަލްތައް ޕާކު ކުރަން ދިނުމަށް ނިންމައިފިއެވެ.
މިއަދު އެ ސަރަހައްދުގައި ބޭއްވި ނޫސްވެރިންގެ ބައްދަލުވުމެއްގައި ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ، 90،000 އަކަފޫޓު ހުންނަ އެ ބިމުގެ 50،000 އަކަފޫޓު ޚާއްސަ ކުރަނީ ހަތަރު ފުރޮޅުލީ ވެހިކަލްތަކަށް ކަމަށެވެ.
އެ ބިމުގެ ބާކީ 40،000 އަކަފޫޓު ޚާއްސަކުރަނީ ހުޅުމާލެ މަގުތަކުގައި ނުގަވައިދުން ޕާކުކޮށްފައި ހުންނަ ވެހިކަލްތައް ޓޯ ކުރުމަށް ފަހު ބެހެއްޓުމަށް ކަމަށާއި ކުރިއަށް އޮތް ދެ ދުވަހެއްގެ ތެރޭ އެ ބިމުގައި ޕާކު ކުރަން ފުރުސަތު ހުޅުވާލާނެ ކަމަށް އަމީން ވިދާޅުވިއެވެ.
ޕާކު ކުރުމަށް ހުޅުވާލުމުގެ ކުރިން މިހާރު އަންނަނީ އެ ބިން ސާފުކޮށް، ބިންގަނޑު އެއްވަރުކުރުމުގެ މަސައްކަތްތައް ކުރަމުން ކަމަށް އޭނާ ވިދާޅުވިއެވެ.
މިނިސްޓަރު އިތުރަށް ވިދާޅުވީ، އެބިމުގައި ޕާކު ކުރުމުގެ އިންތިޒާމުތައް ހަމަޖައްސަނީ ހުޅުމާލޭގައި އަޅާ ޕާކިން ބިލްޑިންގުތަކުގެ މަސައްކަތް ނިމެންދެން ކަމަށެވެ.
މިތަނަކީވެސް ރައީސް ވަރަށް ޚާއްސަ އިސްކަމެއް ދެއްވައިގެން ކުރައްވަމުން ގެންދަވާ މަސައްކަތުގެ ތެރެއިން އެއްކަން. މިތަނަށް އެބައޮތް އެޗްޑީސީގެ ޕްލޭނެއްވެސް. އެ ޕްލޭން އަންނަންދެން މި ތަން ބޭނުންކުރެވޭނެޓްރާންސްޕޯޓް މިނިސްޓަރު މުޙައްމަދު އަމީން
ފާހަގަކޮށްލެވޭ ގޮތުގައި، މިދިޔަ މަހު 22ގައި ވަނީ މާލެ ސަރަހައްދުގައި ނުގަވާއިދުން ހުރި ވެހިކަލްތައް ގަވާއިދަށް ފެއްތެންދެން ވަގުތީ ގޮތުން ޕާކުކުރަން ހުޅުމާލޭ ދެވަނަ ފިޔަވަހިން ބިމެއް ހަމަޖައްސާފައެވެ.
ޕާކިން މައްސަލަ ހައްލު ކުރަން ހުޅުމާލޭގައި އަޅާ 15 ޕާކިން ބިލްޑިންގުތައް ތަރައްގީކުރުމަށް ޝައުގުވެރިވާ ފަރާތްތަކަށް އެ ފުރުސަތު ވަނީ ހައުސިން ޑިވެލޮޕްމަންޓު ކޯޕަރޭޝަނުން ހުޅުވާލާފައެވެ.
މީގެކުރިން ހައުސިން ޑިވެލޮޕްމަންޓު ކޯޕަރޭޝަންގެ މެނޭޖިން ޑައިރެކްޓަރު އިބްރާހީމް ފަޒުލް ރަޝީދު ވިދާޅުވި ގޮތުގައި، އުންމީދަކީ ކުރިއަށް އޮތް ދެ އަހަރެއް ތެރޭ މާލޭ ސަރަހައްދުގެ ޕާކިން މައްސަލަ ހައްލުކުރުމެވެ.