ފާރުތަކުގައި ކުރެހުމާއި ކޭކުގައި ކުރެހުމަށް މަޝްހޫރު، ހުނަރުވެރި އާޓިސްޓް އަލީ އާޒިމް (ޒިމް), މިދިޔަ މަހުގެ ކުރީކޮޅު އުޅުނީ ވ. އަތޮޅުގައެވެ. އެ ހިތްގައިމު މާހައުލުގައި 28 އަހަރުގެ ޒުވާން ކުރެހުންތެރިޔާ ދިޔައީ އެކްސްކާޝަން ސެންޓަރަކާއި ޑައިވިން ސެންޓަރެއްގެ ބޭރު ފާރުގައި ކުރެހުމުގެ ބޮޑު ދެ ޕްރޮޖެކްޓެއްގެ މަސައްކަތް ކުރަމުންނެވެ. އޭނާގެ އެ މަސައްކަތް ސޯޝަލް މީޑިއާ މެދުވެރިކޮށް އެތައް ބަޔަކު ދިޔައީ ބަލަމުންނެވެ.
މި މަސައްކަތް ނިންމާލުމަށް ފަހު، މާލޭގެ ހަލަބޮލިކަމަށް އެނބުރި އައިތަނާ އޭނާ ބަލިވީ ހަމަ ކުއްލިއަކަށެވެ. ބައްޔެއްގެ އެއްވެސް އަލާމާތެއް ނެތި ކުއްލިއަކަށް ބަނޑަށް ވާންފެށި ތަދުން އޭޑީކޭ ހޮސްޕިޓަލަށް ދިޔައެވެ.
ޒިމްގެ ކުރެހުމެއް --
"މިދިޔަ މަހުގެ 12ވަނަ ދުވަހު ހޮސްޕިޓަލުން ވަގުތުން އޮޕަރޭޝަނެއް ކުރީ. ކޮށްފަ ނެގީ ތަދުވާތަން. ދެން ހޮސްޕިޓަލުން ނެގި ތަން ބޭރަށް ޓެސްޓު ހަދަން ފޮނުވައިގެން 15 ދުވަސް ފަހުން ރިޒަލްޓް ލިބުނު އިރު، ކެންސަރު ހުރިކަމަށް ދައްކަނީ،" ޒިމް ބުންޏެވެ.
އޭނާގެ ބަލީގެ ހާލަތު މިވަގުތު އަދި މާބޮޑަކަށް ނޭނގެއެވެ. ހަށިގަނޑުގައި ކެންސަރު ހުރީ ކިހާ މިންވަރަކަށް ކަމެއް ވެސް ނޭނގެއެވެ. ޑޮކްޓަރުން އެދެނީ ވީ އެންމެ އަވަހަކަށް ރާއްޖެއިން ބޭރަށް ފުރައި ޓެސްޓުތައް ހެދުމަށެވެ.
އެހެންކަމުން، މި ޚަބަރާއެކު ހިތުގައި އުފެދޭ ހުރިހާ ސުވާލެއްގެ ޖަވާބު ލިބޭނީ، ރާއްޖެއިން ނެހެދޭ ޓެސްޓުތަކެއް ބޭރަށް ގޮސް ހަދައި އޭގެ ނަތީޖާ ލިބުމުންނެވެ.
"އޭޑީކޭއިން އެންގީ ވީހާ ވެސް އަވަހަކަށް އިންޑިއާއަށް ފުރަން. އެހެންވީމަ މާދަމާ ނޫން އަނެއް ދުވަހު ފުރަން ރެޑީ ވެފައި އޮތީ،" އޭނާ ބުންޏެވެ.
މި ބާވަތުގެ ކެންސަރު ދެނެގަތުމަށްޓަކައި އޭނާ ބޯންމެރޯގެ ޓެސްޓެއް ހަދަން ޖެހެއެވެ. އަދި ގިނަ އަދަދެއްގެ ލޭގެ ޓެސްޓުތައް ވެސް ހަދަން ޖެހުމުން އިންޑިއާގައި ހޭދަވާނީ ކިހާ ދުވަހެއް ކަމެއްވެސް ނޭނގެއެވެ.
"ވަރަށް ބޭނުންވޭ މިކޮޅުން ބަލަން ޓެސްޓުތަކުގެ ނަތީޖާ. އެކަމަކު ޑޮކްޓަރުން ބުނަނީ ހަމަ ވަގުތު ބޭކާރު ނުކޮށް ފުރައިގެން ދިއުމަށް."
ކުއްލިއަކަށް ލިބުނު ކެންސަރުގެ ބިރުވެރި ޚަބަރު އޭނަ ސިފަކުރީ ލިބުނު "ޝޮކެއް"ގެ ގޮތުގައެވެ. މި ޚަބަރާއެކު ޒިމްގެ މުޅި އާއިލާ ވެސް ރޮއްވާލީއެވެ.
"އެކަމަކު މިހާރު މި ހުރީ ފަރުވާއަށް މެންޓަލީ ޕްރިޕެއާ ވެގެން. ފުރަތަމަ ހަމަ ގަބޫލެއްވެސް ނުކުރެވުނު މިކަމެއް. އަދި އިންޑިއާއަށް ގޮސްފައި ލިބޭނީ ކޮންކަހަލަ ޚަބަރެއްކަމެއް ނޭނގޭ. އެކަމަކު މިހާރު ފަރުވާކޮށް މިކަންކަމާ ކުރިމަތިލާން ރެޑީ،" ޒިމް ބުންޏެވެ.
އޭނާގެ ފަރުވާގެ ޚަރަދުގެ އެއްބައި މިހާރު ވަނީ އާސަންދައިން ހަމަޖެހިފައެވެ. ނަމަވެސް، އިންޑިއާގައި ހޭދަވާނީ ކިހާ ދުވަހެއްކަން ނޭނގޭތީ ބޮޑު ހޭދައެއް އާސަންދައިގެ ބޭރުން ކުރަންޖެހޭނެކަމަށް ވަނީ ބެލެވިފައެވެ. އެހެންކަމުން، ކެންސަރާ ދެކޮޅަށް ޒިމް ކުރާ ދަތުރުގައި އެހީތެރިކަން ފޯރުކޮށްދޭން އެއްވެސް މީހަކު ބޭނުންވާނަމަ އެކަން ހެޔޮހިތުން ބަލައިގަންނާނެ ކަމަށް ޒިމް ބުންޏެވެ.
ކުޅަދާނަ ހުނަވެރިއެއްގެ ހައިސިއްޔަތުން ޒިމް ކުރި މަސައްކަތުން އޭނާ ވަނީ ރާއްޖޭގެ ގިނަ ބައެއްގެ އިހުތިރާމާއި ލޯބި ހޯދައިފައެވެ. މޯލްޑިވިއަންގައި ކެބިން ކްރޫއަކަށް މަސައްކަތްކުރި ހަ އަހަރު ވެސް އޭނާ ދިޔައީ އެ ހިތްހެޔޮކަމުން އެތައް ބައެއްގެ ހިތްތަކުން ޖާގަ ހޯދަމުންނެވެ. އަދި މަސައްކަތް ކުރުމަށްފަހު ލިބޭ ހުސް ވަގުތުގައި ކޭކުގައި އާއި ފާރުތަކުގައި ކުރެހުމުގެ މަސައްކަތްތައްކޮށް، އާޓިސްޓުންގެ ކޮމިއުނިޓީގެ ލޯބި ވެސް އޭނާ ހޯދިއެވެ.
މޯލްޑިވިއަންއިން ވަކިވެ ވޭތުވެދިޔަ ދެ އަހަރު ޒިމް ހޭދަކޮށްފައިވަނީ ކެފޭތައް ފަދަ ތަންތަނުގެ ފާރުތަކުގައި ކުރަހައި އެތަންތަނަށް ދިރުމެއް ދީ، އޭނާގެ ހުނަރުން އެތައް ބަޔަކު އުފާކޮށްދިނުމުގައެވެ.
މީގެ އިތުރުން އޭނާގެ ހުނަރު އެތައް ބަޔަކަށް ދަސްކޮށްދިނުމަށް ޒިމް ވަނީ އޭނާގެ އުފަން ރަށް އއ. ތޮއްޑޫގެ އިތުރުން މާލޭގައި ވެސް ކްލާސްތައް ނަގައިދީފައެވެ. ކުރެހުމުގެ އިތުރުން ޒިމްއަކީ ޓީވީއެމްގައި ޝޯތައް ވެސް ހުށަހަޅައިދިން ހުނަރުވެރި ޕްރެޒެންޓަރެކެވެ.
އެކައުންޓް ނަމްބަރު:
- 7730000559402 - ޔޫއެސްޑީ (އަލީ އާޒިމް)
- 7730000087017 - ފައިސާ (އަލީ އާޒިމް)