އެމެރިކާގެ ރައީސް ޑޮނަލްޑް ޓްރަމްޕްގެ އާ ޚާރިޖީ ސިޔާސަތާ އެއްގޮތަށް، ބޭރު ގައުމުތަކަށް ދެމުން އައި އިންސާނީ އެހީތަކާއި ތަރައްގީގެ މަޝްރޫއުތަކަށް ދޭ އެހީތައް މެދުކަނޑާލުމަށް އެ ގައުމުގެ ޚާރިޖީ ވުޒާރާއިން އަމުރުކޮށްފިއެވެ.
އެ ޑިޕާޓްމަންޓުގެ ފޮރިން އެސިސްޓެންސް އޮފީހުން ޑްރާފްޓްކޮށް، ޚާރިޖީ ވަޒީރު މާކޯ ރޫބިއޯ ސޮއިކުރައްވާފައިވާ އެ އަމުރުގައިވާ ގޮތުން މިހާރު ކުރިއަށްގެންދާ އެހީގެ ޕްރޮގްރާމްތަކުގެ އިތުރުން އާ ޕްރޮގްރާމްތައް ފެށުންވެސް ވަނީ މަނާކޮށްފައެވެ.
ނަމަވެސް އިސްރާއީލަށާއި މިސްރަށް އެމެރިކާއިން ފޯރުކޮށްދޭ އަސްކަރީ އެހީ އަދިވެސް ކުރިއަށް ގެންދާނެ ކަމަށް އެ އަމުރުގައިވެއެވެ. އަދި ނިކަމެތިންނަށް ކާބޯތަކެތި ފޯރުކޮށްދިނުމަށް ހިންގަމުންދާ ޕްރޮގްރާމްތައް މި އަމުރުން އިސްތިސްނާވާނެ ކަމަށްވެސް ރޫބިއޯގެ އޮފީހުން ބުނެފައިވެއެވެ.
އެ ފިޔަވަޅުގެ ސަބަބުން ދުނިޔޭގެ އެކި ކަންކޮޅުތަކުގައި ތިބި އެހީއަށް ބޭނުންވެފައިވާ މީހުންނަށް ގެއްލުން ވާނެ ކަމަށްބުނެ އިންސާނީ އެހީ ފޯރުކޮށްދޭ ޖަމިއްޔާތަކުން ވަނީ ކަންބޮޑުވުން ފާޅުކޮށްފައެވެ.
އެމެރިކާއަކީ ދުނިޔޭގެ އެންމެ ގިނައިން އެހީ ފޯރުކޮށްދޭ އެއް ގައުމެވެ. އެގޮތުން 2023 ވަނަ އަހަރު އެކަނިވެސް 72 ބިލިއަން ޑޮލަރުގެ އެހީ އެމެރިކާއިން ވަނީ ފޯރުކޮށްދީފައެވެ.
މި މަހުގެ 20 ވަނަ ދުވަހު ވެރިކަމާ ހަވާލުވެވަޑައިގެން މަދު ގަޑިއިރުތަކެއްގެ ތެރޭގައި ޚާރިޖީ ސިޔާސަތާ އެއްގޮތްވާ ގޮތުގެ މަތިން ކަންކަން މުރާޖައާ ކުރެވެންދެން ބޭރުގެ ގައުމުތަކަށް ފޯރުކޮށްދޭ އެހީ 90 ދުވަހަށް މަޑުޖައްސާލުމަށް ޓްރަމްޕް ވަނީ އަމުރުކުރައްވާފައެވެ.
އެ އަމުރާ ގުޅިގެން ރެފިއުޖީޒް އިންޓަނޭޝަނަލްގެ ރައީސް ޖެރެމީ ކޯނިންދީކް ވިދާޅުވީ މިއީ "މޮޔަ ނިންމުމެއް" ކަމަށާއި އަމުރުގައިވާ ގޮތަށް އެކަން ތަންފީޒުކޮށްފިނަމަ ގިނަ ބައެއްގެ ފުރާނަ ގެއްލިގެންދާނެ ކަމަށެވެ.
ޓްރަމްޕްގެ އެ އަމުރަކީ ގާނޫނާ ޚިލާފު އަމުރެއް ކަމަށްބުނެ އެމެރިކާގެ ކޮންގްރެސްގެ ބައެއް ބޭފުޅުންވެސް ވާހަކަފުޅު ދައްކަވާފައިވާ ކަމަށް ރޮއިޓާސްއިން ރިޕޯޓުކޮށްފައިވެއެވެ.
ނަން ނުޖެހުމަށް އެދި ޔޫއެސްއެއިޑްގެ އޮފިޝަލަކު ވިދާޅުވީ ޔޫކްރޭންގައި ހިންގާ މަޝްރޫއުތަކުގެ ޒިންމާ އުފުލާ އޮފިސަރުންނަށް ހުރިހާ މަސައްކަތެއް ހުއްޓާލުމަށް އަންގާފައިވާ ކަމަށެވެ. މަސައްކަތް ހުއްޓާލާފައިވާ މަޝްރޫއުތަކުގެ ތެރޭގައި ސްކޫލްތަކަށް އެހީތެރިވުމާއި، މައިމީހާއަށް ދޭ ކުއްލި ފަރުވާއާއި ކުޑަކުދިންނަށް ވެކްސިން ދިނުން ފަދަ ސިއްޙީ އެހީތެރިކަން ފޯރުކޮށްދިނުން ހިމެނޭ ކަމަށް އޮފިޝަލް ވިދާޅުވިއެވެ.
ޕްރޮގްރާމްތައް ކުރިއަށް ގެންދިއުމާއި، ބަދަލުކުރުމާއި، ނުވަތަ ނިންމުމާ ބެހޭ ނިންމުންތައް ނިންމާނީ ކުރިއަށް އޮތް 85 ދުވަހުގެ ތެރޭގައި ރިވިއު ކުރުމަށް ފަހު ރޫބިއޯ ކަމަށްވެސް އެ އަމުރާ ހަވާލާދީ ރޮއިޓާސްއިން ބުނެއެވެ.
އެމެރިކާއިން އެ އަމުރު ނެރެފައި ވަނީ އިސްރާއީލުން ޣައްޒާގައި ކުރި ހަނގުރާމަ ނިމުމަކަށް އައިސް، ޣައްޒާއާއި ސޫދާން ހިމެނޭހެން ދުނިޔޭގެ ގިނަ ގައުމުތަކަކަށް ބަނޑުހައިހޫނުކަމުގެ މައްސަލަތައް ކުރިމަތިވެފައިވާ ދަނޑިވަޅެއްގައެވެ.