އިމިގްރޭޝަނުގެ ޔުނިފޯމާއި ވައްތަރު ހެދުމެއް އަޅައިގެން ތިބޭ ބަޔަކު، އާންމުންނަށް ގުޅައި، ޒާތީ މައުލޫމާތާއި ބޭންކު ކާޑުގެ މައުލޫމާތު ހޯދަމުންދާތީ އެ ކަމަށް ސަމާލުވާން އިމިގްރޭޝަނުން މިއަދު އިލްތިމާސްކޮށްފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި ވަނީ "ވަޓްސްއެޕް" މެދުވެރިކޮށް ރާއްޖެއިން ބޭރު ޤައުމެއްގެ ނަންބަރުން އަންނަ ވީޑިއޯ ކޯލްތަކެއްގައި އިމިގްރޭޝަން ޔުނިފޯމާ ވައްތަރު ޔުނިފޯމެއް އަޅައިގެން ތިބޭ ބަޔަކު، އާންމުންނަށް ގުޅައި، އެ މީހުންގެ ޒާތީ މަޢުލޫމާތާއި، ބޭންކު ކާޑުގެ މަޢުލޫމާތު ހޯދަމުންދާކަން ފާހަގަކުރެވިފައިވާ ކަމަށެވެ.
އެއީ، އެއްވެސް ހާލެއްގައި އިމިގްރޭޝަންގެ އޮފިސަރުންގެ އަމަލެއް ނޫންކަމުގެ ޔަގީންކަންދީ، އެ އިދާރާއިންވަނީ އެންމެހައި ފަރާތްތަކުން ވެސް މި ފަދަ ކޯލްތަކަށް ސަމާލުވުމަށް އިލްތިމާސްކޮށްފައެވެ.
މަކަރާއި ހީލަތުން ފައިސާ ހޯދުމަކީ މިހާރު ރާއްޖޭގައި އާންމު ކަމެކެވެ. އެކި ދުވަސްވަރު އެކި އުކުޅުތައް ބޭނުންކޮށްގެން މި ފަދަ ކުށްތަކަށް އަރައިގަންނައިރު، ކަމާ ގުޅުންހުރި އިދާރާތަކުން އަންނަނީ މި ފަދަ ކަންކަމާއި ގުޅިގެން އާންމުން ހޭލުންތެރިކޮށް، މައުލޫމާތު ދެމުންނެވެ.