މަސް މާރުކޭޓް ސަރަހައްދު ބަަލައި ފާސްކޮށް ގަވާއިދާ ޚިލާފަށް އުޅުނު 39 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
ކޮންޓްރޯލާ އޮފް އިމިގްރޭޝަން މުޙައްމަދު ޝަމްޢާން ވަހީދު އެކްސްގައި ކުރެއްވި ޕޯސްޓެއްގައި ވަނީ މަސް މާރުކޭޓު ސަރަހައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިޔަ މަސް ބޯޓުތަކާ ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވާ ކަމަށެވެ.
ގިނަ ބައެއްގެ ކަންބޮޑުވުމާ އެކު، ޓާސްކު ފޯހުން އެ ސަރަހައްދުގައި އަޅާފައިވާ މަސް ބޯޓުތައް ބަލައި ފާސްކޮށް 39 މީހަކު އިމިގްރޭޝަންގެ ބަންދަށް ގެންދެވިފައިވާ ކަމަށް ޝަމްޢާންގެ ޕޯސްޓުގައި ވަނީ ބުނެފައެވެ.
ރާއްޖޭގައި ގަވާއިދާ ޚިލާފަށް އުޅޭ 5،000 އެއްހައި ބިދޭސީން މި ސަރުކާރުން ވެރިކަމަށް އައި ފަހުން ޑީޕޯޓުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވަނީ ވިދާޅުވެފައެވެ.
އިހުސާން ވަނީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މުޅި ރާއްޖޭގައި މިހާރު 138 ރަށެއްގައި ބަޔޮމެޓްރިކް ޑާޓާ ނެގުމުގެ މަސައްކަތް ކުރިއަށް ގެންދާ ކަމަށާއި އޭގެ ތެރެއިން 10،000 އަށްވުރެ ގިނަ މީހުންގެ ބަޔޮމެޓްރިކްސް ނަގައިފައިވާކަން ފާހަގަކުރައްވާފައެވެ.