ހުޅުމާލޭ ފުރަތަމަ ފިޔަވަހީގައި ހުންނަ ފުލުސް ސްޓޭޝަންގެ ދޮރުގެ ލައިޓެއް ތަޅާލި މައްސަލައެއްގައި ހައްޔަރުކުރި މީހަކު އަތުން މަސްތުވާތަކެތި ކަމަށް ބެލެވޭ އެއްޗެއް ފެނިފައިވާ ކަމަށް ފުލުހުން މިއަދު ބުނެފިއެވެ.
މި މައްސަލައިގައި ހައްޔަރުކޮށްފައިވަނީ މާލެ، ހ. ހެމަވަތިގޭ، ޒައިދާން މުޙައްމަދު ޒާހިރު (24)އެވެ.
ފުލުހުން މީޑިއާތަކަށް ހިއްސާކުރި މެސެޖެއްގައި ބުނީ، ޒައިދާނަކީ ނުރައްކާތެރިކޮށް ދުއްވިމުން ފުލުހުން ޓޯކުރި އޭނާގެ ސައިކަލެއް ބަލައި ފުލުސް ސްޓޭޝަނަށް ދިޔަ މީހެއް ކަމަށެވެ.
އެކަމަކު، އޭނާ ވަނީ ހުޅުމާލޭ ފުލުސް ސްޓޭޝަންގެ ހުޅަނގު ފަރާތު ދޮރުގެ ލައިޓެއް ތަޅާލައިފައެވެ. އެހެންވެ، ރޭ 4:15 އެހާކަންހާއިރު ފުލުހުން އޭނާ ހައްޔަރުކުރިއެވެ.
އޭނާ ހައްޔަރުކޮށް ބަލައި ފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް ހުރި އެއް ރަބަރު ޕެކެޓެއް އޭނާ ލައިގެންހުރި ޖީންސުގެ ޖީބުން ފެނުނު ކަމަށް ފުލުހުން ވަނީ ބުނެފައެވެ.
ޒައިދާން ފުލުސް ސްޓޭޝަނަށް ގެއްލުންދިން މައްސަލައާއި އޭނާގެ ގައިން މަސްތުވާތަކެތި ފެނުނު މައްސަލަ ވެސް ފުލުހުން އަންނަނީ ތަހުގީގުކުރަމުންނެވެ.
މި ފަހުން މާލޭ ސަރަހައްދުގައި ނުރައްކާތެރިކޮށް ދުއްވާ އުޅަނދުފަހަރުގެ ސަބަބުން ހިނގާ އެކްސިޑެންޓުތައް ގިނަވެ، ފުލުހުން އަންނަނީ ބާރަށް ދުއްވާ އުޅަނދުތައް ހިފަހައްޓައި ވަގުތުން ޓޯ ވެސް ކުރަމުންނެވެ. އަދި، މަގުމަތުގައި ހަރަކާތްތެރިވާ ފުލުހުންގެ އަދަދު ވެސް ވަނީ އިތުރުކޮށްފައެވެ.