އާމްދަނީ ހޯދުމުގެ ބޭނުމުގައި ގޭގައި ކާބޯތަކެތި އުފައްދާ ފަރާތްތަކަށް ލޯގޯ ދޫކުރުން ހުއްޓާލައި، އެ މަސައްކަތް ކުރާ ފަރާތްތައް ދަފްތަރުވުމަށް ހުޅުވާލައިފިއެވެ.
ކާބޯތަކެތި އުފެއްދުމުގެ މަސައްކަތްކުރާ އެންމެ ކުދި ވިޔަފާރިތަކަށް ފުރުސަތު ފަހިކޮށްދިނުމުގެ ގޮތުން ބިޒްނަސް ސެންޓާ ކޯޕަރޭޝަން (ބީސީސީ)އާއި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގުޅިގެން މި އަހަރުގެ ފެބްރުއަރީ މަހުގެ 19ވަނަ ދުވަހު "އާމްދަނީ ހޯދުމަށް ޓަކައި ގޭގައި އުފައްދާ ބަންދުކުރާ ކާބޯތަކެއްޗަށް ލޯގޯ ދޫކުރުމުގެ އުސޫލު" ތައާރަފުކުރިއެވެ.
ބީސީސީއިން މިއަދު ނެރުނު ނޫސް ބަޔާނެއްގައިވަނީ އާމްދަނީ ހޯދުމަށް ޓަކައި ގޭގައި އުފައްދައި، ބަންދުކުރާ ކާބޯތަކެއްޗަށް ލޯގޯ ދޫކުރުމުގެ އުސޫލަށް ބަދަލު ގެނައުމަށް ނިންމާފައިވަނީ ކާބޯތަކެތީގެ ރައްކާތެރިކަމާ ގުޅޭ ގާނޫނު ތަންފީޒުކުރަން ފެށުމާ ގުޅިގެން ކަމަށެވެ.
އެމްއެފްޑީއޭއިން މި ކަމާ ގުޅޭ އުސޫލެއް އާންމުކޮށްފައިވާތީ ބީސީސީން މި ކަމާ ގުޅޭގޮތުން 19 ފެބްރުއަރީގައި އާންމުކޮށްފައިވާ އިއުލާން މިހާރުވަނީ ބާތިލްކޮށްފައިވާ ކަމަށް އެ ކޯޕަރޭޝަނުން ބުނެއެވެ.
އެ ގޮތުން ބީސީސީގެ "އާމްދަނީ ހޯދުމަށް ޓަަކައި ގޭގައި ކާބޯތަކެތި އުފައްދާ ބަންދުކުރާ ފަރާތްތަކުގެ ދަފްތަރު" ވެސް މިހާރުވަނީ އުވާލައިފައެވެ. ބީސީސީން ބުނީ މި ގޮތަށް ނިންމާފައިވަނީ އެ ފަދަ މަސައްކަތް ކުރާ ފަރާތްތަކުން ޚިދުމަތް ހޯދުމުގައި އެންމެ ލުއިފަސޭހަވާނެ ގޮތަކަށް އުސޫލު ބައްޓަން ކުރުމުގެ ގޮތުން ކަމަށެވެ.
އެމްއެފްޑީއޭއިން އާންމުކުރި އަމިއްލަ ދިރިއުޅުމަށް ޓަކައި ކާބޯތަކެތި އުފައްދައި ވިއްކުމުގެ މަސައްކަތުގައި އަމަލުކުރަންވީ ގޮތުގެ މިންގަނޑުުގައިވާ ގޮތަށް އެ އޮތޯރިޓީން މި ޚިދުމަތް ހޯދުމަށް ރަޖިސްޓާ ކުރަންޖެހޭނީ މިހާރު ވެސް އަމަލުކުރަންދާ ގޮތަށް ދިރިތި ޕޯޓަލް މެދުވެރިކޮށެވެ.
މީގެ ކުރިން ކާބޯތަކެތި އުފައްދައި، އެ ތަކެތީގެ ވިޔަފާރިކުރާ ފަރާތްތައް ދަފްތަރުކޮށްފައި އޮތީ ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ދަށުގައެވެ. އެހެން ނަމަވެސް ކާބޯތަކެތީގެ ރައްކާތެރިކަމާބެހޭ ގާނޫނުގެ ދަށުން އެ މަސައްކަތް އެމްއެފްޑީއޭގެ ދަށަށް ބަދަލުކޮށް، އެ އިދާރާއަށްވަނީ އެ ގާނޫނުގެ ދަށުން ބާރުތަކެއް ވެސް ދީފައެވެ.
ރާއްޖޭގެ ކުދި އަދި މެދުފަންތީގެ ވިޔަފާރިތަކަށް އެހީތެރިކަން ފޯރުކޮށްދީ، ވިޔަފާރިތައް ކުރިއެރުވުމަށް ޓަކައި ކަމާގުޅުންހުރި ފަރާތްތަކާ ގުޅިގެން ގިނަ މަސައްކަތްތަކެއް ކުރަމުންދާ ކަމަށް ބީސީސީން ބުނެއެވެ.