ޓެސްލާއިން ގިނަ ދުވަސްތަކެއް ވަންދެން އިންތިޒާރު ކުރަމުން އައި "ގިގަ ޓްރެއިން" ނަމަކަށް ކިޔާ ފުރޮޅުނުލާ ކަރަންޓު ރެއިލް ޖަރުމަނުވިލާތުގައި ތަޢާރަފުކޮށްފިއެވެ.
މި ރެއިލްގައި ދަތުރުކުރެވެނީ އަރްކްނަރ ސްޓޭޝަނުން ފެށިގެން ބަރުލިންގެ ދެކުނު-އިރުމަތީގައި 20 މޭލު ދުރުގައިވާ ޓެސްލާގެ އުފެއްދުންތެރިކަމުގެ މަރުކަޒާ ހަމައަށެވެ.
މި ރެއިލްގައި މިހާރު އެއްފަހަރާ 500 މީހުންނަށް ދަތުރުކުރެވެއެވެ. އޭގެ ތެރޭގައި 120 ގޮނޑި އަދި ސައިކަލު ބެހެއްޓޭނެ ޖާގަ ހިމެނެއެވެ. އަދި ދަތުރުވެރިންނަށް މަޢުލޫމާތު ދިނުމުގެ ނިޒާމެއް ވެސް ހިމެނެއެވެ.
މި ރެއިލްގައި ދަތުރުކުރުމަކީ ހިލޭ ޚިދުމަތެއް ކަމަށްވާއިރު، ޓެސްލާގެ މުވައްޒަފުންނާއި އާންމު ފަސިންޖަރުންނަށް ވެސް މި ޚިދުމަތް ލިބެއެވެ.
ޓެސްލާގެ މަޝްރޫޢުގެ މެނޭޖަރު ތެރޭސާ އެގްލަރ ވިދާޅުވި ގޮތުގައި މި ރެއިލް ބޭނުންކުރުމުން އެހެން ރެއިލްތަކާ އަޅާބަލާއިރު އަހަރަކު 50 ޓަނުގެ ކާބަން ޑައިއޮކްސައިޑް ތިމާވެށްޓަށް ބޭރުވިޔަ ނުދެވޭނެއެވެ.
އަދި މިއީ ޓެސްލާގެ ތިމާވެށި ރައްކާތެރިކުރުމުގެ އަމާޒާ އެއްގޮތަށް ކުރެވޭ ކަމެއް ކަމަށްވެސް އޭނާ ވިދާޅުވިއެވެ.
ނިއެދަރްބާނިމާ އައިސެންބާންގެސެލްޝަފްޓް (އެންއީބީ) އިން ބުނާ ގޮތުގައި މި އަހަރުގެ ނިޔަލަށް އެ ކުންފުނީގެ ހުރިހާ ރެއިލްތަކެއް ޑީސަލްއިން ކަރަންޓަށް ބަދަލުކުރުމުގެ ޕްލޭނެއް އެބައޮތެވެ.
މި ރެއިލް ތަޢާރަފުކުރުމަކީ މުވައްޒަފުންނާއި އާންމު ފަރާތްތަކަށް ތިމާވެށްޓާ ރައްޓެހި ދަތުރުފަތުރުގެ ވަސީލަތެއް ބޭނުންކުރުމުގެ ފުރުސަތެއް ލިބިގެންދިއުމެވެ.