މިދިޔަ ބުދަ ދުވަހު ގއ. ވިލިނގިއްޔަށް މަސްތުވާތަކެތި އެތެރެކުރަން އުޅުނު ދެ މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
މި މައްސަލައިގައި ހައްރުކޮށްފައި ވަނީ އުމުރުން 37 އަހަރުގެ ލ. ފޮނަދޫ، ކެނެރީގެ، ޢަލީ މުމްތާޒް އާއި އުމުރުން 29 އަހަރުގެ ބަނގުލަދޭޝް މީހެއް ކަމަށްވާ އިރުޝާދު މިއާއެވެ.
މި މައްސަލައާ ގުޅުވައި މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، އެ ދެމީހުން ހައްޔަރުކުރީ ވިލިނގިއްޔަށް މަސްތުވާތަކެތި އެތެރެކުރަން އުޅޭ ކަމަށް މައުލޫމާތު ލިބުމާއެކު މިދިޔަ ބުދަ ދުވަހު ހިންގި އޮޕަރޭޝަނެއްގައި ކަމަށެވެ.
މި އޮޕަރޭޝަން ހިންގީ ވިލިނގިލީ ޕޮލިސް ސްޓޭޝަނާއި އިންޓެލިޖެންސް ގުޅިގެން ކަމަށް ފުލުހުން ބުނެފައިވެއެވެ.
މި އޮޕަރޭޝަނުގައި ދެ މީހުން ދަތުރުކުރި ދޯނި ކަނޑުމަތިން ހުއްޓުވައި ކޫއްޑޫ ބަނދަރަށް ގެންގޮސް ބަލާފާސްކުރި އިރު، މަސްތުވާތަކެތި ކަމަށް ބެލެވޭ ތަކެތި ފެނިފައިވާ ކަމަށާއި އެތަކެތީގެ ވަގުތީ ބަރުދަނަކީ 126 ގުރާމު ކަމަށް ފުލުހުން ބުންޏެވެ.
އެ ދެމީހުންގެ ބަންދާމެދު ގޮތެއް ނިންމަން ވިލިނގިލީ މެޖިސްޓްރޭޓް ކޯޓަށް ހާޒިރު ކުރުމުން 15 ދުވަހަށް ބަންދު ކުރަން އަމުރުކޮށްފައިވެއެވެ.
މި މައްސަލަ ވިލިނގިލީ ޕޮލިސް ސްޓޭޝަނުން އަންނަނީ އިތުރަށް ތަހުގީގު ކުރަމުންނެވެ.
މަސްތުވާތަކެތީގެ މައްސަލަކީ ހައްލެއް ނުލިބި ގިނަ ދުވަސްތަކެއް ވެފައިވާ މައްސަލައެކެވެ. އެގޮތުން، މަސްތުވާތަކެއްޗާ ގުޅޭ މައުލޫމާތުތައް ލުބުމުން ފުލުހުން އޮޕަރޭޝަންތައް ހިންގާއިރު، އެފަދަ ކުށްތައް މަދު ކުރުމަށް، ހައްޔަރުކުރާ މީހުންގެ ވަނަވަރު ފުލުހުން އަންނަނީ ހާމަކުރަމުންނެވެ.