ބޮލީވުޑްގެ މަޝްހޫރު ބަތަލާ ކަރީނާ ކަޕޫރު ލީޑް ރޯލް ކުޅެފައިވާ ފިލްމު "ދަ ބަކިންގްހަމް މާޑަސް"ގެ ޓްރެއިލާ ބެލުންތެރިންނަށް ދައްކާލައިފިއެވެ.
ކަރީނާ ކޯ-ޕްރޮޑިއުސަރެއްގެ ދައުރު ވެސް ކުޅެފައިވާ މި ފިލްމަކީ، މަޝްހޫރު ހަންސަލް މެހެތާ ޑައިރެކްޓްކޮށްފައިވާ އިންވެސްޓިގޭޓިވް ތުރިލާއެކެވެ. މިދިޔަ އަހަރު ބީއެފްއައި ލަންޑަން ފެސްޓިވަލް އަދި މުމްބާއީ ފިލްމު ފެސްޓިވަލްގައި ޕްރީމިއާކޮށްފައިވާ މި ފިލްމު ސިނަމާތަކަށް ގެންނަން ނިންމާފައިވަނީ މި މަހުގެ 13 ވަނަ ދުވަހުއެވެ.
މި ފިލްމަކީ މިދިޔަ އަހަރު ނެޓްފްލިކްސްއިން ގެނެސްދިން ތުރިލަ ފިލްމު "ޖާނެ ޖާ"އަށްފަހު ކަރީނާ ތަފާތު ރޯލަކުން ބެލުންތެރިންނަށް ފެންނާނެ ދެވަނަ ފިލްމެވެ. މި ފިލްމުގައި ކަރީނާ ފެންނާނީ އިނގިރޭސިވިލާތުގެ ބަކިމްހަމްޝަޔާގައި މަރައިލާ 10 އަހަރުގެ ކުއްޖެއްގެ މަރުގެ ތަހުގީގުކުރާ ޑިޓެކްޓިވްއެއްގެ ރޯލުންނެވެ.
ފިލްމު "ދަ ބަކިންގްހަމް މާޑަސް"ގެ ޓްރެއިލާ ރިލީޒްކުރި އިވެންޓްގައި ޑައިރެކްޓަރު ހަންސަލް މެހެތާ އަދި ޕްރޮޑިއުސަރު އެކްތާ ކަޕޫރު ކަރީނާ ކަޕޫރާއެކު--ފޮޓޯ/ޕިންކްވިލާ
ކަރީނާ އެންމެ ފަހުން ބެލުންތެރިންނަށް ފެނިފައިވަނީ މި އަހަރު ރިލީޒްކުރި ފިލްމު "ކްރޫ"އިންނެވެ. އެކްތާ ކަޕޫރު އަދި ރެއާ ކަޕޫރު ޕްރޮޑިއުސްކޮށްފައިވާ "ކްރޫ"އަށް އާއްމުންގެ ވަރަށް ބޮޑު ތަރުހީބެއް ވަނީ ލިބިފައެވެ.
ކަރީނާ މިހާރު އަހަރެއްގެ މައްޗަށް ކުޅޭ ފިލްމުތަކުގެ މިންވަރު މަދުވެފައިވާއިރު ފިލްމު "ދަ ބަކިންގްހަމް މާޑަސް"އަށް ގިނަ ބަޔަކު އަންނަނީ އިންތިޒާރު ކުރަމުންނެވެ. ކަރީނާގެ އިތުރުން މި ފިލްމުން ފެންނާނެ މުހިއްމު ތަރިންގެ ތެރޭ އޭޝް ޓަންޑަން، ރަންވީރު ބްރާ އަދި ކެއިތު އެލެން ހިމެނެއެވެ.