އެމީހެއްގެ އަޑު އަދިވެސް ފަނޑުނުވެ ހުރި މުހައްމަދު ތައުފީގަށް (ހާޖަރާގޭ ތައުފީގު) ދެމިހުންނަނިވި ޚާއްސަ ޚިދުމަތެއް ކުރުމުގެ ދާއިރާއިން ގައުމީ އިނާމު އެރުވުމަށް ރައީސް ޑރ. މުހައްމަދު މުއިއްޒު މިއަދު ނިންމަވައިފިއެވެ.
މި ޝަރަފު އެރުއްވުމަށް ރައީސް ކަނޑައެޅުއްވީ ގައުމީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައެވެ.
މި ޖަލްސާގައި ޝަރަފުވެރިކަމުގެ ގައުމީ އިނާމާއި، ހިތްވަރު ދިނުމުގެ ގައުމީ އިނާމު ދިނުން އޮންނާނެއެވެ. އެގޮތުން މި އަހަރު ޝަރަފުވެރިކަމުގެ ގައުމީ އިނާމު ހަތް ބޭފުޅަކަށް ލިބިވަޑައިގަންނަވައެވެ.
އެ ބޭފުޅުންގެ ތެރެއިން ދެމިހުންނަނިވި ޚާއްސަ ޚިދުމަތެއް ކުރުމުގެ ދާއިރާއިން ތައުފީގަށް އިނާމު އެރުވުމަށް ރައީސް ވަނީ ނިންމަވާފައެވެ. ތައުފީގަށް މި ޝަރަފު އަރުވަނީ، ކީރިތި ރަސޫލާގެ ސިޔަރަތު ގެނެސްދެއްވާފައިވާ ގޮތް ފުރިހަމަކަމުން ކަމަށް ރައީސް އޮފީހުން ބުންޏެވެ. އަދި ސިޔަރަތު އަޑުއެހުމަށް ދިވެހިންގެ ހިތްތަކުގައި އޮންނަ ޝައުޤުވެރިކަން އިތުރުކުރެއްވުމަށް ތައުފީގު ކުރެއްވި ގައުމީ ޚިދުމަތަށްޓަކައި ކަމަށް ވެސް އެ އޮފީހުން ވަނީ ބުނެފައެވެ.
ތައުފީގު އަވަހާރަވީ 1995 ވަނަ އަހަރުގެ އޭޕްރިލް މަހުގެ 23 ވަނަ ދުވަހުއެވެ. އޭނާ އަކީ މިހާރުގެ އިލެކްޝަންސް ކޮމިޝަންގެ ރައީސް ފުއާދު ތައުފީގާއި ލަވަކިޔުންތެރިޔާ ޝިފާ ތައުފީގުގެ ބައްޕައެވެ.
ފަޟީލަތުއްޝައިޚް ހުސައިން ސަލާހުއްދީން ތަރުޖަމާކުރެއްވި ކީރިތި ރަސޫލާގެ ސިޔަރަތު އަހަރުމެންނަށް އަޑުއިވެނީ ތައުފީގުގެ އަޑުފުޅުންނެވެ. އަދި އަދަށް ދާންވެސް ދިވެހީންގެ ރޯދަ މަހުގެ އަޑަކީ ތައުފީގު ކިޔުއްވާފައިވާ ކީރިތި ރަސޫލާގެ ސިޔަރަތެވެ.
މިހާރު ރޭޑިއޯއިން ގެންނަ ސިޔަރަތަކީ ދިވެހިރާއްޖޭގެ އަޑު ހިންގެވުމުގައި ސަމަރުބުލޫ އިބްރާހިމް މަނިކު ހުންނެވި ދުވަސްވަރު ތައުފީގު ކުރެއްވި މަސައްކަތެކެވެ.
އެތައް ފަހަރެއްގެ މަތީން،"ކީރިތި ރަސޫލާގެ ސިޔަރަތު" އެކި މީހުންގެ އަޑުން ރިކޯޑުކުރިއެވެ. ނަމަވެސް އޭރުގެ ވެރީންނަށް އެންމެ ކަމުދިޔައީ ތައުފީގުގެ އެ އާދަޔާ ޚިލާފު އަޑުން ކިޔުއްވި ސިޔަރަތެވެ. އަދާހަމައަށް ވެސް ދިވެހީންނަށް ވެސް އެ އަޑު ކަމުދެއެވެ.