ރަޝިއާއިން ޖާސޫސް ކުރުމަށް ތަމްރީނުކޮށްފައިވާ ކަމަށް ތުހުމަތުކުރާ ބޮޑު މަސް، ހުވަލްދިމިރް މަރުވެފައި އޮއްވައި ނޯވޭއިން ފެނިއްޖެއެވެ.
ނޯވޭގެ ޕަބްލިކް ބްރޯޑްކާސްޓަރު އެންއާރުކޭ އިން ރިޕޯޓްކޮށްފައިވާ ގޮތުގައި ހޮނިހިރު ދުވަހު ބޮޑު މަސް ފެނިފައި ވަނީ ނޯވޭގެ ދެކުނުގެ ރިސާވިކާ ފަޅުގައި މަރުވެގެން އޮޔާދަނިކޮށެވެ. އެ މަސް ފެނުނީ މަސްވެރިކަމަށް ނުކުމެ އުޅުނު ބަޔަކަށް ކަމަށްވެސް އެ ނޫހުން ރިޕޯޓުކޮށްފައިވެއެވެ.
އެ މަސް ވަނީ ކްރޭނަކުން ނަގާ ކައިރީގައި ހުރި ބަނދަރަކަށް ގެންގޮސްފައެވެ.
ނޯވޭ ބަހުން ބޮޑު މަހަށްކިޔާ ނަން ކަމަށްވާ "ހްވަލް" އާއި ރަޝިޔާގެ ރައީސް ވްލަޑިމިއާ ޕޫޓިންގެ ފުރަތަމަ ނަން އެއްކޮށްގެން އުފައްދާފައިވާ ހުވަލްޑިމިރް އެންމެ ފުރަތަމަ ފެނިފައިވަނީ ނޯވޭގެ އުތުރު އައްސޭރިފަށުން 2019ވަނަ އަހަރުއެވެ. މެރިން ބަޔޮލޮޖިސްޓުންނަށް އެ މަސް ފުރަތަމަ ފެނުނު އިރު އޭގެ ކަރުގައި ކެމެރާ ހަރުކުރެވޭ ގޮތަށް ކަމަރެއް އަޅުވައި، އޭގައި ރަޝިޔާގެ ނަން ލިޔެފައި އޮތެވެ.
އޭރު ނޯވޭގެ މެރިން ބަޔޮލޮޖިސްޓުން ވަނީ އެ ކަމަރު ނައްޓާލުމަށް ފަހު މަސް ދޫކޮށްލައިފައެވެ. ނޯވޭގެ އޮފިޝަލުން ވިދާޅުވެފައިވާ ގޮތުގައި އެއީ ރަޝިއާއިން ޖާސޫސްކުރުމުގެ ބޭނުމަށް ބޮޑު މަސް ތަމްރީންކުރާ ތަނެއްގެ ތެރެއިން ދޫވެގެން އުޅޭ އެއްޗަކަށް ވެދާނެއެވެ.
އެ ތުހުމަތާ ގުޅޭ ގޮތުން ރަޝިޔާއިން ދުވަހަކު ވެސް ވާހަކަ ދައްކާފައެއް ނުވެއެވެ.
ހުދުކުލައިގައި އޮތް ހުވަލްޑިމިރްގެ ދިގުމިނުގައި 14ފޫޓް، ބަރުދަނުގައި 1،225 ކިލޯ ހުރެއެވެ. އަދި އޭގެ އުމުރަކީ 14 ނުވަތަ 15 އަހަރު ކަމަށް ބެލެވޭ ކަމަށް މީޑިއާތަކުން ރިޕޯޓުކޮށްފައިވެއެވެ.